শিশুৰ সাংস্কৃতিক তথা সামাজিক বিকাশৰ লক্ষ্যৰে প্ৰতিষ্ঠিত আৰোহনৰ উদ্যোগত ২০০৫ চনৰে পৰা ড。ভবেন্দ্ৰ নাথ শইকীয়াৰ ওপজা দিনটোত বিভিন্ন কাৰ্যসূচী অনুষ্ঠিত কৰা হৈছে ৷
তিনি দিনীয়া কাৰ্যসূচীৰে ৰবীন্দ্ৰ ভৱনত অনুষ্ঠিত হ’ব নাট সমাৰোহৰ লগতে বঁটা প্ৰদান অনুষ্ঠান ৷
২০ ফেব্ৰুৱাৰিৰ দিনা ড。ভবেন্দ্ৰ নাথ শইকীয়াৰ অষ্টাশীতিতম ওপজা দিন উপলক্ষ্যে আৰোহনৰ চৌহদত ড。শইকীয়াৰ পুৰ্ণাঙ্গ প্ৰতিমূৰ্তি উন্মোচন কৰা হ’ব ৷ উন্মোচন কৰিব অসম চৰকাৰৰ মুখ্য সচিৱ সঞ্জয় কৃষ্ণই ৷ অনুষ্ঠানত মুখ্য অতিথি ৰূপে উপস্থিত থাকিব বিশিষ্ট সাহিত্যিক ড。লক্ষীনন্দন বৰা ৷
অৰ্থাৰাইটিছ ৰোগত আক্ৰান্ত হৈ জীৱনৰ এছোৱা সময় শয্যাশায়ী হৈ থকা মনিকা দাসক ২০১৯ বৰ্ষৰ ড。ভবেন্দ্ৰ নাথ শইকীয়া সোৱৰণী বঁটা প্ৰদান কৰা হ’ব ৷ তেখেতে শাৰীৰিক প্ৰত্যাহ্বানকো নেওচি অব্যাহত ৰাখিছে সাহিত্য চৰ্চা ৷
তেখেতৰ প্ৰাকাশিত কাব্যগ্ৰন্থ কেইখন হ’ল- এদিনৰ বাবে মোক আপোনাৰ প্ৰেয়সী বুলি ভাবক, তোমাৰ হাতত হাত থৈ আৰু নিৰ্বাচিত কবিতাৰ লগতে বিভিন্ন কাকত আলোচনীত নিয়মীয়াকৈ প্ৰকাশ পাই আহিছে বিভিন্ন কবিতা ৷
শাৰীৰিক প্ৰত্যাহ্বানকো নেওচি সাহিত্য চৰ্চাত নিজক ব্ৰতী ৰখাৰ বাবেই নিৰ্বাচন কৰা হৈছে এই বঁটাৰ বাবে ৷
২০ ফেব্ৰুৱাৰি সন্ধিয়া ৫·৩০ বজাৰ পৰা ৰবীন্দ্ৰ ভৱনত অনুষ্ঠিত হ’ব লগীয়া বঁটা প্ৰদান অনুষ্ঠানত অসমৰ বিশিষ্ট সাহিত্যিক তথা সাহিত্য সভাৰ প্ৰাক্তন সভাপতি ড。লক্ষীনন্দন বৰাই মনিকা দাসক এই বঁটা প্ৰদান কৰিব৷
বঁটাত আছে ২৫ হাজাৰ টকা, মানপত্ৰ, স্মাৰক, কিতাপৰ টোপলা আদি ৷ এক সংবাদমেল যোগে এই কথা জনাই মুখ্য ন্যাসৰক্ষী প্ৰীতি শইকীয়াই ৷ লগতে উপস্থিত থাকে ন্যাসৰক্ষী তথা সম্পাদক মলয়া গোস্বামী, ন্যাসৰক্ষী গোপাল জালান, ইন্দ্ৰজিৎ দাস ৷