অৰুণাচলৰ পৰা আলফা আৰু এনএছচিএনে অপহৰণ কৰি নিয়া কুইপ নামৰ কোম্পানীটোৰ দুই বিষয়াক আলফাই অহা সপ্তাহত চৰম শাস্তি বিহিব বুলি ঘোষণা কৰাৰ পিছতে বিষয়টোকলৈ ছ’চিয়েল মিডিয়াত সমালোচনাৰ ঢৌ উঠিছে।
কেৱল ছ’চিয়েল মিডিয়াতে নহয়, অসমৰ আগশাৰীৰ বহু বিশিষ্ট ব্যক্তিয়েও আলফাৰ এনে ঘোষণাত প্ৰতিক্ৰিয়া ব্যক্ত কৰিছে।
বিশিষ্ট চিন্তাবিদ ডঃ হীৰেন গোঁহায়ে আজি এই সন্দৰ্ভত এখন সংবাদমেল আয়োজন কৰি কয় ‘অপহৃত বিষয়া এটা কোম্পানীৰ বিষয়া। এই কোম্পানীটোৰ নীতি-কাম-কাজ তেওঁলোকে নিৰ্দ্ধাৰণ নকৰে। গতিকে তেওঁলোক এই কোম্পানীটোৰ কাম-কাজৰ কাৰণে কিয় দায়ী হ’ব মই ধৰিব পৰা নাই আৰু ই অসমৰ কি উপকাৰ সাধিব সেইটো মোৰ কাৰণে পৰিস্কাৰ নহয়। ইয়াক ধিক্কাৰ দিয়াৰ বাহিৰে মই অন্য ভাষা বিচাৰি নাপালো ’।
তেওঁ লগতে কয় যে যি হ’বলৈ গৈ আছে এইটো ‘অৰ্থপূৰ্ণ কথা নহয়’।
আলফাৰ সেনাধ্যক্ষ পৰেশ বৰুৱাই এনে দাবী উত্থাপন নকৰি অসম চৰকাৰৰ সৈতে অন্য ধৰণৰ বিনিময়ৰ প্ৰসংগ উত্থাপন কৰিব পাৰিলেহেঁতেন বুলি চিন্তাবিদগৰাকীয়ে কয়।
‘কা’ আন্দোলনত জৰিত হৈ যিসকল কাৰাবন্দী হৈ আছে তেওঁলোকক বিনাচৰ্তে মুকলি কৰি দিবলৈ চৰকাৰক আহ্বান জনাব পাৰিলেহেঁতেন বুলি তেওঁ কয়।
ইয়াৰ বিপৰীতে তেওঁলোকে দুজন নিৰীহক ধৰি নি চৰম শাস্তি বিহাৰ ভাবুকিয়ে সাধাৰণ দয়া মায়া থকা লোকক আকৃষ্ট নকৰিব বুলি ডঃ গোহাঁয়ে তাৎপৰ্যপূৰ্ণ মন্তব্য কৰে। তেওঁ সেয়ে আলফাক কথাবোৰ নতুনকৈ চিন্তা কৰাৰ আহ্বান জনায়।
উল্লেখ্য আলফা আৰু এনএছচিএনে অপহৰণ কৰা কুইপৰ দুই শীৰ্ষ বিষয়াৰ মুক্তিৰ বাবে বান্ধি দিয়া ১৬ ফেব্ৰুৱাৰীৰ অন্তিম সময় সীমা উকলি যোৱাৰ পিছত অহা সপ্তাহত দুই বিষয়াক চৰম শাস্তি বিহা হ’ব বুলি কালি আলফাই ঘোষণা কৰিছিল।
আলফাৰ প্ৰচাৰ বিভাগৰ সদস্য ৰুমেল অসম স্বাক্ষৰিত এক বিবৃতিৰ জৰিয়তে আলফাই বিষয়া দুগৰাকীক চৰম শাস্তি বিহা হ’ব বুলি ঘোষণা কৰিছে।
অৰুণাচলৰ পৰা অপহৃত দুই কুইপৰ বিষয়াৰ মুক্তিৰ প্ৰসংগত কিছুদিন পূৰ্বে আলফাই এক বিবৃতি প্ৰকাশ কৰিছিল।
বিবৃতিটোত আলফাই কুইপৰ কৰ্মচাৰীৰ মুক্তিৰ বাবে সময়সীমা বান্ধি দিছিল।
১৬ ফেব্ৰুৱাৰীৰ ভিতৰত কুইপ নামৰ কোম্পানীটোৱে আলফাই দাবী কৰা মুক্তিপণ আদায় নিদিলে কোম্পানীটোৰ বিহাৰৰ অপহৃত বিষয়া ৰাম কুমাৰক ১৭ ফেব্ৰৱাৰীত হত্যা কৰাৰ ভাবুকি দিয়া হৈছিল। অৱশ্যে সেইবাৰ আলফাই বিষয়া জনৰ বিৰুদ্ধে চৰম পন্থা গ্ৰহণ কৰা নাছিল।
কালি প্ৰকাশ কৰা বিবৃতিত আলফাই কুইপ কোম্পানীটোক দক্ষিণ-পূব এছিয়াত নিষিদ্ধ কৰাৰ কথা ঘোষণা কৰাৰ লগতে কোম্পানীটোত কৰ্মৰত কৰ্মচাৰীসকলক নিজৰ কৰ্ব্যৰ পৰা বিৰত থাকি অইল ইণ্ডিয়া লিমিটেডক কৰ্মসংস্থাপনৰ বাবে হেঁচা দিবলৈ কৈছে।
অন্যথা যিকোনো বিষম পৰিস্থিতিৰ সৃষ্টি হ’লে তাৰ দায়িত্ব কৰ্মচাৰীসকলে নিজেই বহন কৰিব লাগিব বুলি বিবৃতিটোত সতৰ্ক কৰি দিয়া হৈছে। ইপিনে ছ’চিয়েল মিডিয়াতো বহু নেটিজেনে আলফাক মানৱতাৰ খাতিৰতে দুই অপহৃত বিষয়াক মুক্তি দিবলৈ আহ্বান জনাইছে।
