ভোটাধিকাৰ সাব্যস্ত কৰিবলৈ আজি দিল্লীৰ পৰা গুৱাহাটী পায়হি অসমৰ দুজন বিশিষ্ট ভোটাৰ- প্ৰাক্তন প্ৰধান মন্ত্ৰী মনমোহন সিং আৰু তেওঁৰ পত্নী গুৰচৰণ কৌৰ।
২ বজাত বৰঝাৰ বিমান বন্দৰত উপস্থিত হোৱা সিং আৰু কৌৰে ২ বাজি ৫৫ মিনিটত ২২৭ নং দিচপুৰ চৰকাৰী উচ্চতৰ মাধ্যমিক বিদ্যালয়ত ভোটদান কৰে। অৱশ্যে আনকেইবাৰৰ দৰে ড০ মনমোহন সিঙে এইবাৰ শাৰীত থিয় নহ’ল। ভোটকেন্দ্ৰত উপস্থিত হৈয়ে দুয়ো পোনেপোনে ভোটাধিকাৰ সাব্যস্ত কৰে।
প্ৰাক্তন প্ৰধান মন্ত্ৰীজনে ভোটাদান কৰিব বাবেই পুৱাৰে পৰা বিদ্যালয়খনত গঢ়ি তোলা হৈছিল কটকটীয়া নিৰাপত্তা ব্যৱস্থা|
উল্লেখ কৰিব পাৰি, দীৰ্ঘদিন ধৰি এই ভোটকেন্দ্ৰতে ভোটদান কৰি আহিছে প্ৰাক্তন প্ৰধান মন্ত্ৰী তথা অসমৰ ৰাজ্যসভাৰ সাংসদজনে। ১৯৯১ চনৰ পৰা ৰাজ্যসভাত অসমক প্ৰতিনিধিত্ব কৰা ড০ সিঙে নিৰ্বাচন আয়োগত দাখিল কৰা শপতনামাত সৰু মটৰীয়াৰ নন্দন নগৰত থকা ভাড়াঘৰৰ ঠিকনাই ব্যৱহাৰ কৰিছে।
প্ৰয়াত মুখ্য মন্ত্ৰী হিতেশ্বৰ শইকীয়াৰ ঘৰটোৰ এটা অংশ বহু বছৰৰ পৰা ভাড়াত লৈ আছে ড০ সিঙে।
অঞ্চলটোৰ বাসিন্দা হিচাপে ভোটাৰ তালিকাত নাম থকা ড০ সিঙৰ ক্ৰমিক নম্বৰ ৬২৩ আৰু তেওঁৰ পত্নী গুৰচৰণ কৌৰৰ ক্ৰমিক নম্বৰ ৬২৪।
ভোট দি আজৰি হোৱাৰ লগে লগে দুয়ো ৰাওনা হয় সৰু মটৰীয়াস্থিত ভাড়াঘৰলৈ| ভাড়াঘৰটোৰ গৰাকী প্ৰাক্তন মুখ্য মন্ত্ৰী হিতেশ্বৰ শইকীয়াৰ পত্নী হেমপ্ৰভা শইকীয়াই আগ্ৰহেৰে তেওঁলোকক লগ পাবলৈ ৰৈ থকাৰ কথা কালি সংবাদ মাধ্যমৰ আগত প্ৰকাশ কৰিছিল।
ভাড়াঘৰত এঘণ্টাৰ বাবে জিৰণি লৈ দুয়ো পুনৰ দিল্লীলৈ ৰাওনা হ’ব।
ভোটকেন্দ্ৰত প্ৰাক্তন প্ৰধান মন্ত্ৰীজনক সাক্ষাৎ কৰে প্ৰদেশ কংগ্ৰেছৰ সভাপতি ৰিপুণ বৰা আৰু গুৱাহাটী সমষ্টিটোৰ কংগ্ৰেছ প্ৰাৰ্থী ববিতা শৰ্মা। ববিতা শৰ্মাই এখন ফুলাম গামোচাৰে ড০ সিঙক আদৰে।
সময়ৰ অভাৱৰ বাবে সংবাদ মাধ্যমক নিজৰ ভাষ্য বা মন্তব্য দিবলৈ অস্বীকাৰ কৰে প্ৰাক্তন প্ৰধান মন্ত্ৰীজনে।
