আত্মনিৰ্ভৰ ভাৰতৰ দিশে আৰু এখোজ আগবাঢ়িছে ভাৰতবৰ্ষ!
প্ৰধানমন্ত্ৰী নৰেন্দ্ৰ মোদীৰ আত্মনিৰ্ভৰ শ্লোগানক সাৰোগত কৰি ভাৰতীয় সেনা বাহিনীৰ হাতত অৰ্পণ কৰা হ’ব দেশীয়ভাৱে নিৰ্মাণ কৰা এক অত্যাধুনিক মাৰণাস্ত্ৰ।
বৃহস্পতিবাৰে দেশৰ প্ৰতিৰক্ষা মন্ত্ৰণালয়ে জনায় যে প্ৰতিৰক্ষা গৱেষণা আৰু উন্নয়ন সংস্থা(DRDO) আৰু ভাৰতীয় সেনাবাহিনীৰ যৌথ প্ৰচেষ্টাত এটা অত্যাধুনিক পিস্তল নিৰ্মাণ কৰা হৈছে।
আৰু অতি শীঘ্ৰেই এই অত্যাধুনিক পিস্তলটো ভাৰতীয় সেনাবাহিনীৰ হাতত অৰ্পণ কৰা হ’ব।
অন্যান্য অত্যাধুনি পিস্তলতকৈ ই অধিক কাৰ্যক্ষম হ’ব বুলি দাবী কৰা হৈছে।
DRDOএ জনোৱা অনুসৰি ৯ এম এম ইঞ্জিনযুক্ত পিস্তলটো নিৰ্মাণ কৰা হৈছে উৰাজাহাজত ব্যৱহাৰ কৰা উন্নত মানৰ এলুমিনিয়ামৰ লগতে অতি মজবুত তথা পাতল ওজনৰ কাৰ্বন ফাইবাৰেৰে।
থ্ৰী ডাইমেনশ্যন প্ৰিণ্টিঙৰ মাধ্যমেৰে মাৰণাস্ত্ৰবিধৰ নক্সা তৈয়াৰ কৰাৰ বাবে ইয়াৰ লক্ষ্য অব্যৰ্থ হ’ব বুলি দাবী কৰা হৈছে।
ইয়াৰ মূল্য প্ৰায় ৫০ হাজাৰ টকাৰ হোৱাৰ সম্ভাৱনা আছে আৰু এই মাৰণাস্ত্ৰবিধ ভাৰতীয় সেনাবাহিনীৰ লগতে আইটিবিপি, এছএছবি, চিআৰপিএফ আৰু বিএছএফ জোৱানক অৰ্পণ কৰা হ’ব বুলি জানিব পৰা গৈছে।
ইফালে আত্মনিৰ্ভৰ ভাৰতৰ অধীনত ২০২৫ বৰ্ষৰ ভিতৰত ৫ বিলিয়ন এই অত্যাধুনিক মাৰণাস্ত্ৰবিধ নিৰ্মাণৰ লক্ষ্য ধাৰ্য কৰি লোৱা হৈছে।
