ৰাজনৈতিক নেতাৰ পুত্ৰ হ’লেই যি মন যায় তাকে কৰিব পাৰে নেকি? বিশেষকৈ বিজেপিৰ শক্তিশালী নেতাৰ সন্তানে? মহাৰাষ্ট্ৰৰ বিজেপিৰ ৰাজ্যিক সভাপতি চন্দ্ৰশেখৰ বাৱনকুলৰ পুত্ৰৰ কাণ্ডত এতিয়া এই প্ৰশ্ন উত্থাপন হৈছে।
দেওবাৰে গভীৰ নিশা নাগপুৰত বিজেপিৰ নেতাগৰাকীৰ পুত্ৰৰ গাড়ীয়ে খুন্দা মৰাৰ ফলত কেইবাখনো গাড়ীৰ ক্ষতিসাধন হয়। কেইবাখনো গাড়ীত খুন্দিয়াই পলায়ন কৰে নেতাজনৰ পুত্ৰ আৰু তেওঁৰ সংগীসকলে।
আৰক্ষীৰ সূত্ৰ অনুসৰি নগপুৰৰ ৰামদাসপথ অঞ্চলত সংঘটিত হৈছে এই ঘটনা। মহাৰাষ্ট্ৰ বিজেপিৰ ৰাজ্যিক সভাপতি চন্দ্ৰশেখৰ বাৱনকুলৰ পুত্ৰ সংকেতৰ অ’ডি গাড়ীয়ে কেইবাখনো গাড়ীত খুন্দা মাৰে।
জানিব পৰা মতে, সংকেত বাৰ এখনৰ পৰা উভতি আহিছিল। সুৰাৰ নিশাত মত্ত আছিল সংকেত আৰু বন্ধুসকল। দুৰ্ঘটনা সংঘটিত হোৱাৰ সময়ত বিজেপি নেতাৰ পুত্ৰ, বন্ধু-বান্ধৱী আৰু চালককে ধৰি মুঠ ৫জন লোক গাড়ীখনত আছিল।
সীতাবুল্ডি থানাৰ এগৰাকী আৰক্ষী বিষয়াই সংবাদ মাধ্যমৰ আগত জনোৱা মতে, গাড়ীখনত অহা সংকেত আৰু তিনিজন লোক পলায়ন কৰে। বাকী দুজনক ধৰি আৰক্ষীক গতাই দিয়ে স্থানীয় ৰাইজে।
গাড়ীখনৰ চালক অৰ্জুন হাউৱে আৰু আন এজন ব্যক্তি ৰনিত চিত্তমৱাদক গ্ৰেপ্তাৰ কৰা হৈছে। ইতিমধ্যে অভিযুক্ত দুজনে জামিন লাভ কৰিছে। লগতে আৰক্ষীয়ে ঘটনাৰ তদন্ত অব্যাহত ৰাখিছে।
ইফালে পুত্ৰৰ গোচৰ সন্দৰ্ভত মহাৰাষ্ট্ৰ বিজেপিৰ সভাপতিৰ বক্তব্য, “আইন সকলোৰে বাবে সমান। আৰক্ষীয়ে নিৰপেক্ষ তদন্ত কৰিব লাগে।”
