বাক্সাৰ ভাৰত-ভূটান সীমান্তৰ শুকানজূলী ফায়াৰিং ৰেঞ্জত পৰিত্যক্ত অৱস্থাত ড্ৰোন উদ্ধাৰক লৈ তীব্ৰ চাঞ্চল্য
বাক্সা জিলাৰ তামুলপুৰ মহকুমাৰ ভাৰত-ভূটান সীমান্তৰ শুকানজুলী ফায়াৰিং ৰেঞ্জত শুকুৰবাৰে সন্ধিয়া পাঁচ বজাত সীমান্ত সুৰক্ষা বাহিনীৰ লোকে পৰিত্যক্ত অৱস্থাত এখন ড্ৰোণ উদ্ধাৰক কৰে।
ভাৰত-ভূটান সীমান্তৰ পাটকীজূলীস্থিত ৬৪ নম্বৰ সীমান্ত সুৰক্ষা বাহিনীৰ বিষয়াই জানিবলৈ দিয়া মতে স্থানীয় কেইজনমান লোকে শুকুৰবাৰে আবেলি সীমান্তৰ পাহাৰলৈ খৰি কাটিবলৈ যোৱাৰ সময়তে ভাৰতৰ ভূমিৰ ভিতৰত পাহাৰৰ দাতিৰ খাৱৈ এটাত প্ৰায় ছয় ফুট দৈৰ্ঘৰ পাচখন পাংখাযুক্ত ড্ৰোন এখন প্ৰত্যক্ষ কৰে।
পাছত স্থানীয় লোকে সীমান্ত সুৰক্ষা বাহিনীৰ লোকক এই সম্পৰ্কত খবৰ দিয়ে।
স্থানীয় লোকৰ খবৰৰ ভিত্তিত সীমান্ত সুৰক্ষা বাহিনীৰ লোকে দৰংগামেলা আৰক্ষীৰ সহযোগত ড্ৰোণ খন উদ্ধাৰ কৰি দৰংগামেলা আৰক্ষী চকীলৈ লৈ আহে।
সীমান্ত সুৰক্ষা বাহিনীৰ বিষয়াই প্ৰকাশ কৰা মতে অষ্ট্ৰেলিয়াত নিৰ্মীত ড্ৰোণ খন কেনেকৈ আহি ভূটান সীমান্তৰ ভাৰতৰ পাহাৰ অঞ্চলত পৰিল তাকলৈ অনুসন্ধান অব্যাহত ৰাখিছে।
উল্লেখ যোগ্য, ভাৰত-ভূটান সীমান্তৰ শুকানজূলীত থকা ভাৰতীয় সেনা বাহিনীৰ অস্ত্ৰ তথা গোলা-বাৰুদৰ অনুশীলন কৰা দেশৰ অন্যতম ফায়াৰিং ৰেঞ্জৰ সমীপতে পৰিতক্ত অৱস্থাত ড্ৰোণ উদ্ধাৰ হোৱা ঘটনাই সৃষ্টি কৰিছে ৰহস্যৰ।