কলিয়াবৰৰ জখলাবন্ধাত সংঘটিত হোৱা ভয়াবহ পথ দুৰ্ঘটনাত এগৰাকী বাইক আৰোহী থিতাতে নিহত হোৱাৰ লগতে আন এগৰাকী ব্যক্তি গুৰুতৰভাৱে আঘাতপ্ৰাপ্ত হয়।
জখলাবন্ধা এন আৰ এল পেট্ৰল ডিপোৰ সন্মুখত ৩৭ নং ৰাষ্ট্ৰীয় ঘাইপথত এই শোকাৱহ পথ দুৰ্ঘটনাটো সংঘটিত হয়।
জানিব পৰা মতে, কলিয়াবৰৰ আমনিস্থিত বন্ধন বেংকৰ কৰ্মচাৰী তথা গোলাঘাটৰ ফৰকাটিং নিৱাসী মিলন হাজৰিকা (২৬) আৰু শৰৎ ভূঞা (২৮)ই কাৰ্যালয়ৰ কাম সামৰি এ এছ ০৩ এক্স ২৩৯০ নম্বৰৰ পালচাৰ মটৰ চাইকেলৰে জখলাবন্ধা এন আৰ এল পেট্ৰল ডিপোত তেল ভৰাই গৃহাভিমুখী হোৱাৰ পথত মালপৰিবাহী ট্ৰাকে পাছফালৰ পৰা খুন্দা মৰাৰ ফলতে শোকাৱহ দুৰ্ঘটনাটো সংঘটিত হয় ৷
দুৰ্ঘটনাত পালচাৰ মটৰ চাইকেলখনৰ আৰোহী নৱবিবাহিত মিলন হাজৰিকা থিতাতে নিহত হোৱাৰ লগতে সহযাত্ৰী শৰৎ ভূঞা গুৰুতৰভাৱে আহত হয়।
আহত শৰৎ ভূঞাক জখলাবন্ধা আৰক্ষীয়ে ততাতৈয়াকৈ জখলাবন্ধা চিকিৎসালয়ত ভৰ্ত্তি কৰে যদিও প্ৰাথমিক চিকিৎসা প্ৰদান কৰি চিকিৎসকে উন্নত চিকিৎসাৰ বাৱে সংকটজনক অৱস্হাত তেজপুৰ চিকিৎসা মহাবিদ্যালয়লৈ প্ৰেৰণ কৰে।