ডাংকি-বা ডংকী ফ্লাইট-হৈছে বিদেশলৈ অবৈধভাৱে কৰা এক প্ৰব্ৰজনৰ প্ৰক্ৰিয়া। এক কথাত দেশ বা ৰাষ্ট্ৰৰ সীমাক বে-আইনীভাৱে অতিক্ৰম কৰাৰ এটি পন্থা ডংকী ফ্লাইট। আন আন দেশৰ দৰে ভাৰতৰ পৰাও বহু লোকে প্ৰতি বছৰে বিদেশলৈ যাবৰ বাবে গ্ৰহণ কৰা এই পন্থাৰ ফলত লোকসকলৰ কিমান আলৈ-আহুকাল হয়-এই প্ৰক্ৰিয়াৰ ওপৰত ভিত্তি কৰিয়েই নিৰ্মিত প্ৰযোজক,পৰিচালক ৰাজকুমাৰ হিৰানীৰ নৱতম মুক্তিপ্ৰাপ্ত ছবি ডাংকি। ছবিখনৰ পৰিচালনা তথা সম্পাদনা ৰাজকুমাৰ হিৰানীৰ। চিনেমাখনৰ কাহিনী আৰু চিত্ৰনাট্য লিখিছে ৰাজকুমাৰ হিৰানী সমন্বিতে অভিজাত যোশী আৰু কণিকা ধিলনে। ২১ডিচেম্বৰ তাৰিখে মুক্তিপ্ৰাপ্ত এই ছবিখন বৰ্তমানেও ভিন্ন ছবিগৃহত চলি আছে।
ছবিৰ আৰম্ভণি হয় লণ্ডনৰ পৰা কিছু বয়স্ক তাপসী পান্নু(মন্নু)ৱে চিকিৎসালয়ৰ পৰা পলায়ন কৰাৰ দৃশ্যৰে। চিনেমাত শ্বাহৰুখ খানৰ চৰিত্ৰটোৰ প্ৰৱেশ গতানুগতিক বলীউডী নায়কমূলক ছবিৰ দৰেই উত্তেজনাপূৰ্ণ। আৰম্ভণিৰে পৰাই কাহিনী গতিশীল। আৰম্ভণিৰ কিছু অংশৰ পিছৰে পৰাই কাহিনীয়ে ফ্লেছবেকত গতি কৰে। পাঞ্জাৱৰ এখন ঠাইৰ তিনিজন যুৱক-যুৱতীৰ লণ্ডনলৈ গৈ অধিক অৰ্থ উপাৰ্জনৰ স্বপ্নৰ লগত ব্যক্তিগত এক কামত অহা শ্বাহৰুখ খান(হাৰ্ডি)সংপৃক্ত হৈ পৰে। আৰম্ভণিৰে পৰাই ৰাজকুমাৰ হিৰানীৰ আন আন ছবিৰ দৰে ডাংকিতো মৃদু হাস্যৰসৰ উপস্থাপন কৰা হৈছে। পিছে,ছবিখনৰ পৰৱৰ্তী অংশলৈ এই হাস্যৰসৰ উপস্থাপন জোৰ কৰি কৰাৰ দৰে অনুভূত হ’ল,অৰ্থাৎ তেনে পৰিস্থিতিত য’ত হাস্যৰসৰ অৱতাৰণা কৰাৰ চেষ্টা কৰা হৈছিল,তাত হঁহাৰ কোনো অৱকাশেই নাছিল। ছবি এখনত স্বতঃস্ফূত হাস্যৰসৰ উপস্থাপন এক কলা,আৰু ৰাজকুমাৰ হিৰানীৰ দৰে এজন অভিজ্ঞ চলচ্চিত্ৰ নিৰ্মাতাৰ পৰা চিত্ৰনাট্যত এনেধৰণৰ উপস্থাপন অপ্ৰত্যাশিত আছিল। পৰৱৰ্তী পৰ্যায়তো বলীউডী ছবিৰ মনোৰঞ্জনধৰ্মীতাৰ অধিক পয়োভৰ ছবিখনৰ কাহিনীৰ মুল বিষয়বস্তুত বাধক হৈ পৰে। এইখিনিতে কাহিনী আৰু মূলতঃ চিত্ৰনাট্যৰ কথা ক’ব লাগিব। কাহিনীৰ গাঠনি পূৰ্বে উল্লেখ কৰাৰ দৰেই দুৰ্বল আৰু তদ্ৰূপ চিত্ৰনাট্যও। যদিওবা ছবিখনৰ কাহিনীভাগত সংবেদনশীলতা আনিব পৰা বহু উপাদানেই আছিল,কিন্তু চিত্ৰনাট্যত সেই সংবেদনশীলতাক তুলি ধৰিব পৰাৰ কোনো থলেই নাছিল। সেয়ে কোনো অংশতেই কোনোধৰণৰ আৱেগে স্পৰ্শ কৰিবলৈ সক্ষম নহ’ল। এনে নহয় যে ডাংকীত কোনো আৱেগিক দৃশ্যাংশ নাছিল। আছিল,পিছে তাৰ উপস্থাপনে দৰ্শকক স্পৰ্শ কৰিবলৈ সক্ষম নহ’ল,যাৰবাবে ছবিখনৰ লগত কোনো অংশতেই একত্ৰ অনুভৱ কৰিব পৰা নগ’ল। ২৫ বছৰৰ পূৰ্বেই লণ্ডনৰ পৰা উভতি আহি মন্নু(তাপসী পান্নু)ৰ পিতৃ-মাতৃৰ লগতে ঘৰখনৰ সম্পূৰ্ণ দায়িত্ব পালন কৰি থকা হাৰ্ডি(শ্বাহৰুখ খান)ৰ ফোন নাম্বাৰটোও ২৫ বছৰৰ পিছত মন্নুৰ লগত নথকাতো আন এক চকুত পৰা খুঁট। লগতেই উল্লেখ কৰিবলগা আন এটি দৃষ্টিকটূ দিশ হ’ল ২৫ বছৰ আগতে সম্পূৰ্ণ তৰুণ ৰূপত দেখুওৱা চাৰিওজন যুৱক-যুৱতীৰেই ২৫ বছৰৰ পিছত যেতিয়া পুনৰমিলন ঘটে,তেতিয়া তেওঁলোকৰ চেহেৰাত বয়সৰ চাপৰ মাত্ৰাধিক প্ৰদৰ্শন। এইটো মেক-আপৰ ক্ষেত্ৰত এটি গাফিলতি বুলিব লাগিব। লগতেই,কাহিনী আৰু চিত্ৰনাট্যৰ মূল বিষয়বস্তুত অধিক গুৰুত্ব প্ৰদান কৰি,ছবিখনৰ দৈৰ্ঘ্য কিছুখিনি কম কৰা হয়,ইয়াক উপভোগ্য কৰি তুলিব পৰাৰ এক থলো ৰৈ গ’ল।
ৰাজকুমাৰ হিৰানীৰ সম্পাদনাৰ দিশ ভাল,যিদৰে ভাল চিনেমেট’গ্ৰাফীৰ কাম। আৱহ-সংগীতৰ প্ৰয়োগ সমুচিত। অভিনয়ৰ ক্ষেত্ৰত যদিওবা শ্বাহৰুখ খান,তাপসী পান্নুৰ অভিনয় উল্লেখনীয়,তথাপি বিশেষ ভূমিকাত কম সময়ৰ বাবে ভুমুকি মাৰা ভিকি কৌশলৰ অভিনয় অধিক প্ৰশংসনীয়। এক কথাত ক’বলৈ গ’লে ৰাজকুমাৰ হিৰানীৰ এক নিস্ফল প্ৰয়াস-ডাংকী।
ৰিমলী বৰকটকী।
Mail- [email protected]
