চৰকাৰৰ কেবিনেট মন্ত্ৰী চন্দ্ৰমোহন পাটোৱাৰীয়ে বুধবাৰে এক গুৰুত্বপূৰ্ণ ঘোষণাযোগে অসমৰ কৃষি ভুমি অ-কৃষি কাৰ্যলৈ হস্তান্তৰ কৰিবলৈ যি সিদ্ধান্তৰ কথা ঘোষণা কৰিছে তাক ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই)ৰ অসম ৰাজ্যিক কমিটিয়ে তীব্ৰ প্ৰতিবাদ জনাইছে।
এয়া অকল কৃষকৰ বাবেই নহয়, সমগ্ৰ কৃষি ক্ষেত্ৰৰ বাবে ভাবুকি বুলি সংগঠনটোৱে অভিহিত কৰিছে।
কোনো কৃষি ভূমি চৰকাৰী অনুমতি অবিহনে অ-কৃষি কাৰ্যলৈ ৰূপান্তৰিত কৰিব খোজা কাৰ্য অতি ভয়াবহ, ইয়ে ভবিষ্যতে সাধাৰণ ৰাইজৰ ভূমিৰ ওপৰত থকা অধিকাৰত আঘাত হানিব।
ক’ৰ’না মহামাৰীৰ বাবে সৃষ্টি হোৱা ব্যাপক অৰ্থনৈতিক বিপৰ্যয়ৰ অজুহাতত সকলো চৰকাৰী বাধা-নিষেধ উলাই কৰি কৃষি ভুমিসমূহ নিজ ইচ্ছাৰেই অ-কৃষি কাৰ্যলৈ হস্তান্তৰৰ বাবে অসম চৰকাৰে মুকলি কৰি দিছে।
ইতিমধ্যে ৰাজ্যখনৰ বৃহৎ পৰিমানৰ কৃষি ভুমি একাংশ ব্যৱসায়ী আৰু দালালে মিলি অ-কৃষি ক্ষেত্ৰলৈ অবৈধভাৱে হস্তান্তৰিত কৰিছে।
ইয়াৰ ফলত কৃষি ভুমি সংকোচিত হৈ কৃষি ক্ষেত্ৰলৈ ভাবুকি নামি আহিছে।
পুনৰ চৰকাৰীভাৱে কৃষি ভুমি অ-কৃষি কাৰ্যলৈ হস্তান্তৰিত কৰাৰ অনুমতি দিয়াৰ ফলত বৃহৎ সংখ্যক কৃষি ভুমি ব্যৱসায়ীৰ হাতলৈ গুচি যোৱাতো নিশ্চিত হৈছে বুলি সংগঠনটোৱে দাবী কৰে।
সংগঠনটোৱে কয় যে ইয়াৰ ফলস্বৰূপে বহু কৃষকে ভুমি হেৰুৱাৰ উপক্ৰম হ’ব আৰু ৰাজ্যখনৰ কৃষিৰ ওপৰত থকা স্বনিৰ্ভৰতাও হেৰুৱাব।
ইতিমধ্যে বহু কৃষি ভূমিত উদ্যোগ স্থাপন কৰিম বুলি লোৱাৰ পাছতো কোনো উদ্যোগ স্থাপন হোৱা নাই অথচ সেই কৃষি ভূমি উদ্যোগপতিৰ ব্যক্তিগত সম্পত্তি হিচাপেই হস্তগত হৈছে বুলি দাবী কৰে সংগঠনটোৱে।
সেয়েহে, এই ভয়ংকৰ কৃষি আৰু কৃষক বিৰোধী সিদ্ধান্ত তৎকালে বাতিল কৰিবলৈ ডি ৱাই এফ আয়ে দাবী কৰিছে।