অসম চৰকাৰৰ অধীনৰ তৃতীয়–চতুৰ্থ বৰ্গৰ পদৰ লগতে আৰক্ষী, বনৰক্ষী বাহিনী, স্বাস্থ্য বিভাগ আৰু প্রাথমিক, উচ্চ প্রাথমিক, হাইস্কুল আৰু উচ্চতৰ মাধ্যমিক বিদ্যালয়ৰ শিক্ষক পদৰ নিযুক্তিৰ মুঠ ৫১৩৯৭ টা পদৰ বাবে প্ৰাৰ্থী তালিকা শীঘ্ৰেই প্রকাশ পাব। এই তালিকাত একেজন প্ৰাৰ্থীয়ে একাধিক পদত নিৰ্বাচিত অৰ্থাৎ অ’ভাৰলেপিং হোৱাৰ পূৰ্ণ সম্ভাৱনা প্রকট হৈ পৰিছে। ইয়াৰ ফলত কেইবা হাজাৰ পদ খালী হৈ থকাৰ বিপৰীতে নিযুক্তি পাম বুলি আশা কৰি থকা হাজাৰ হাজাৰ প্ৰাৰ্থী বঞ্চিত হৈ পৰিব বুলি শংকিত হৈ পৰিছে।
ভাৰতৰ গণতান্ত্রিক যুৱ ফেডাৰেছন (ডি ৱাই এফ আই)ৰ অসম ৰাজ্যিক কমিটিয়ে বিষয়টোক লৈ উদ্বিগ্নতা প্রকাশ কৰিছে আৰু যিকোনো এটা বিভাগৰ এটা খালী পদৰ বিপৰীতে এজন প্রাৰ্থীৰে চূড়ান্ত বাচনি তালিকা প্রকাশ কৰিবলৈ দাবী কৰিছে। ইয়াৰ বাবে প্রাৰ্থী সকলোক নিজৰ পচন্দৰ যিকোনো বিভাগৰ এটা পদত অগ্ৰাধিকাৰ দিয়াৰ এক সুব্যৱস্থা কৰি দিবলৈও ডি ৱাই এফ আইয়ে দাবী কৰিছে, যাতে শেষ মুহূৰ্তত এটা খালী পদৰ বিপৰীতে এজন প্ৰাৰ্থীহে বাচনি হয়। তৃতীয় বৰ্গৰ পদত উত্তীৰ্ণ হোৱা বহু প্ৰাৰ্থীয়ে চতুৰ্থ বৰ্গৰ পদতো উত্তীৰ্ণ হৈছে।
একেদৰে কম্পিউটাৰৰ জ্ঞান প্রয়োজন হোৱা পদত উত্তীৰ্ণ বহু স্নাতক প্ৰাৰ্থীয়ে কম্পিউটাৰৰ জ্ঞানৰ প্রয়োজন নোহোৱা পদতো উত্তীৰ্ণ হৈছে। একেদৰে হাইস্কুল, উচ্চত মাধ্যমিক বিদ্যালয়, উচ্চ প্রাথমিক বিদ্যালয় আৰু প্রাথমিক বিদ্যালয়ত শিক্ষক হিচাপে বাচনি হ’বলগীয়া বহু প্ৰাৰ্থী অন্য তৃতীয়, চতুৰ্থ বৰ্গৰ পদ অথবা স্বাস্থ্য বিভাগৰ পদত বাচনিভূক্ত হ’বলৈ সক্ষম হ’‘ব। এজন প্ৰাৰ্থীয়ে ৪/৫ টা পদত নিৰ্বাচিত হোৱাৰ পূৰ্ব সম্ভৱনা আছে।
লক্ষণীয় যে পূৰ্বে ৪৯ হাজাৰ পদত নিযুক্তি দিয়া বুলি মুখ্যমন্ত্ৰীয়ে ঘোষণা কৰিছে। কিন্তু এই পদসমুহৰ ভিতৰতো বহুতে দুই তিনিটা পদত বাচনি হোৱা বাবে বহু পদ খালী হৈয়ে পৰি আছে। স্নাতকোত্তৰ শিক্ষক পদত যোগদান কৰা বহু প্ৰাৰ্থীয়ে প্রাথমিক, উচ্চপ্লাথমিক আৰু হাইস্কুলৰ শিক্ষক পদৰ চূড়ান্ত বাচনি তালিকাত স্থান পাইছিল যদিও শেষত এটা অৰ্থাৎ উচ্চ পদহে যোগদান কৰিছে। অচৰিত কথা হৈছে অসম বিধান সভাৰ মজিয়াত এই বিষয়টোক লৈ দুটা পৰিসংখ্যা দিয়া পৰিলক্ষিত হৈছে।
শেহতীয়াকৈ অসম লোকসেৱা আয়োগে অনুষ্ঠিত কৰা Squad Commander under SDRF (in the rank of Station Officer) under Home and Political Department, Assam. (Advt. No. 06/2022 Dated 08/04/2022) ১১টা পদ আৰু Station Officer in fire & Emergency Services, Assam under Home amd Political Department, Assam (Advt. No.-05/2022 dated 08/04/2022)) ৯ টা পদৰ বাবে হোৱা পৰীক্ষাৰ ফলাফল ৩১ মাৰ্চ, ২০২৩ ত প্রকাশ কৰিছে। কিন্তু দেখা গৈছে এই ফলাফলত ৫ জন প্ৰাৰ্থীয়ে দুয়োটা পদতে উত্তীৰ্ণ হৈছে। এই ৫ জন প্ৰাৰ্থীয়ে কেৱল এটা পদতহে যোগদান কৰিব আৰু যিকোনো এটা বিভাগৰ পদত খালী হৈ থাকিব।
এই সমগ্ৰ বিষয়টো চৰকাৰে গুৰুত্বসহকাৰে লোৱা প্রয়োজন আৰু বিভাগসমূহৰ মাজত এক সমন্বয় সৃষ্টিৰ মাজেৰে এটাও পদ যাতে খালী পৰি থাকিবলগীয়া নহয় তাৰ ব্যৱস্থা কৰিবলৈ দাবী কৰিছে। ইয়াৰ বাবে চূড়ান্ত বাচনি তালিকা প্রকাশ কৰাৰ আগতে নিজৰ পচন্দৰ এটা পদত অগ্ৰাধিকাৰ দিয়াৰ ব্যৱস্থা কৰিলে এই সমস্যাটো সমাধান কৰিব পৰা যাব।
যিহেতু এটা পদৰ নিযুক্তিৰ বাবে চূড়ান্ত অনুমোদন পাবলৈ বিত্ত বিভাগৰ অনুমোদনৰ লগতে কেইবাটাও পৰ্যায় পাৰ কৰিব লাগে সেয়ে খালী হৈ পৰা পদত নিযুক্তি দিবলৈ হ’লে আকৌ দীঘলীয়া প্রক্ৰিয়াৰে যাব লাগিব।
ৰাজ্যখনৰ নিবনুৱাই এটা চাকৰিৰ বাবে হাহাকাৰ কৰি থকাৰ সময়তে যোৰহাটস্থিত উত্তৰ পূব বিজ্ঞান আৰু প্রযুক্তি প্রতিষ্ঠান (নেইষ্ট)ত ৫ টা তৃতীয় বৰ্গৰপদৰ নিযুক্তিৰ বাৰে বামনি পৰীক্ষা অনুষ্ঠিত হৈছে। আচৰিত কথা হৈছে এই তৃতীয় বৰ্গৰ পদতো বহিঃৰাজ্যৰ প্ৰাৰ্থীয়ে নিযুক্তি লাভৰ সম্বাৱনা প্রকট হৈ পৰিছে। ইয়াৰ পূৰ্বে উত্তৰ পূব সীমান্ত ৰেইলৰ তৃতীয় আৰু চতুৰ্থ বৰ্গৰ পদত বহিঃৰাজ্যৰ প্ৰাৰ্থীয়ে নিযুক্তি লাভ কৰিবলৈ সক্ষম হৈছে। DYFI এ দাবী কৰিছে যে তৃতীয় আৰু চতুৰ্থ বৰ্গৰ পদত ৰাজ্যৰ স্থানীয় যুৱক–যুৱতীক নিযুক্তি দিয়াৰ ব্যৱস্থা কৰক।
