বিকল্প অবিহনে পদপথৰ ব্যৱসায়ীক উচ্ছেদ কৰা বিজেপি নেতৃত্বাধীন হিমন্ত বিশ্ব শৰ্মা চৰকাৰৰ অমানৱীয় কাৰ্যৰ তীব্ৰ বিৰোধিতা কৰিছে ভাৰতৰ গণতান্ত্ৰিক যুৱ ফেডাৰেচন চমুকৈ ডি ৱাই এফ আইৰ অসম ৰাজ্যিক কমিটিয়ে। তেওঁলোকে অনতিপলমে বিকল্প ঠাইত ভুক্তভোগীক স্থায়ীভাৱে সংস্থাপন দিয়াৰ দাবী জনাইছে।
গুৱাহাটী মহানগৰীক স্মাৰ্ট চিটিলৈ ৰূপান্তৰিত কৰা প্ৰতিশ্ৰুতিৰে ডিঙিৰ সিৰ ফুলাই আস্ফালন কৰা মুখ্য মন্ত্ৰী হিমন্ত বিশ্ব শৰ্মা চৰকাৰে অতি নির্মমভাবে চহৰ খনত খাটি খোৱা একাংশৰ জীৱিকাৰ প্ৰতি ভাবুকি নমাই আনিবলৈ কুণ্ঠাবোধ নকৰিলে।
ATDC/৩৫০৮/২০২৩/২৮৭ সংখ্যক অসম পৰ্যটন উন্নয়ন নিগমৰ(ATDC)ৰ এখন জাননী পত্ৰ অনুযায়ী সৌন্দৰ্য্য আৰু ঐতিহ্য ৰক্ষাৰ স্বাৰ্থত দীঘালীপুখুৰীপাৰৰ খাওঁ গলিৰ পদপথৰ ব্যৱসায়ীসকলক উচ্ছেদ কৰাৰ বাবে গুৱাহাটী পৌৰনিগমলৈ অনুৰোধ জনোৱা হয়। উল্লেখ্য যে গুৱাহাটী পৌৰনিগমে কোনো ধৰণৰ জাননী জাৰী নকৰাকৈ ২৬/১১/২০২৪ তাৰিখে ৰাতি ১০ বজাৰ পাছত উচ্ছেদ অভিযান চলায়।
বিড়ম্বনাৰ বিষয়টো হৈছে যি আইনৰ অধীনত এই ব্যৱসায়ী সকলক উচ্ছেদ কৰা হৈছে সেই আইন খন প্ৰকৃততে তেওঁলোকৰ অধিকাৰ সুনিশ্চিত কৰাৰ স্বাৰ্থত হে ২০১৪ চনত ৰূপায়ন হৈছিল। Street Vendors (Protection of Livelihood and Regulation of Street Vending) আইনৰ ৩(১) অনুচ্ছেদ অন্তৰ্গত টাউন ভেন্দিং কমিটিয়ে এক সমীক্ষণ কৰিব লাগে। এই সমীক্ষণৰ ফলত পদপথ ব্যৱসায়ী সকলৰ বাবে উক্ত আইনৰ অনুসূচি ২ৰ অধীনত টাউন ভেণ্ডিং কমিটিয়ে তেওঁলোকৰ সুবিধাৰ্থে বিভিন্ন আঁচনি গ্ৰহণ কৰিব পাৰে যত ভেণ্ডিং জ’নৰ আন্তঃগাথনি নিৰ্মানকে ধৰি প্ৰমাণ পত্ৰ প্ৰেৰণ কৰা দৰে বিষয় বস্তু সন্নিবিষ্ট হৈ আছে।
উপৰোক্ত আইনখনৰ অনুচ্ছেদ ৩৬(১) আৰু (২)ৰ অধীনত অসমতো ২০১৬ চনত Assam Street Vendors Protection of Livelihood and Regulation of Street Vending) Rules অনা হৈছিল যদিও আজি পৰ্যন্ত অসমৰ পদপথ ব্যৱসায়ীসকলে কোনো ধৰণৰ আঁচনিৰ সা-সুবিধা পোৱা দেখা নগ’ল।
দৰাচলতে যিখিনি সময়ত পৃথিৱীৰ উন্নত ৰাষ্ট্ৰ সমূহে পদপথ ব্যৱসায়ক পৰ্যটনৰ তথা অৰ্থনীতিৰ উন্নয়নৰ এক গুৰুত্বপূৰ্ণ দিশ হিচাপে চিহ্নিত কৰিছে তেনে স্থলত চৰকাৰে তেওঁলোকক চৰম অবহেলা কৰাৰ উপৰিও অন্যায় হে কৰিছে। সেয়েহে, ডি ৱাই এফ আইয়ে পদপথ ব্যৱসায়ী সকলৰ বাবে বিকল্প প্ৰদান কৰা তথা উপৰোক্ত আইনৰ সঠিক ৰূপায়নৰ দাবী জনায়।
