ই-২০ৰ পিছত বজাৰলৈ আহিব নেকি ই-২৫ পেট্ৰ’ল? কি ক’লে কেন্দ্ৰই…

সামাজিক মাধ্যমৰ পৰা ৰাজপথলৈ ইথানল মিশ্ৰিত পেট্ৰলকলৈ বিৰোধ প্ৰদৰ্শন কৰি থকাৰ মাজতে, বজাৰত অতি সোনকালেই পঁচিশ শতাংশ ইথানল মিশ্ৰিত ‘ই-২৫’ পেট্ৰ’ল মুকলি কৰা হ’ব বুলি শেহতীয়াকৈ সংবাদ মাধ্যমত প্ৰকাশ পোৱা বাতৰিসমূহ কেন্দ্ৰীয় চৰকাৰে সম্পূৰ্ণৰূপে প্ৰত্যাখ্যান কৰিছে। বৰ্তমান প্ৰচলিত ই-২০ পৰ্যায়ৰ বাহিৰে ইথানলৰ মিশ্ৰণ অধিক বৃদ্ধি কৰাৰ ক্ষেত্ৰত চৰকাৰে এতিয়ালৈকে কোনো সিদ্ধান্ত গ্ৰহণ কৰা নাই বুলি শীৰ্ষ চৰকাৰী সূত্ৰই সদৰী কৰিছে। যান-বাহন আৰু ইন্ধনৰ কাৰ্যক্ষমতাৰ ওপৰত ইথানলৰ প্ৰভাৱক লৈ চলি থকা বিতৰ্কৰ মাজতে চৰকাৰে স্পষ্ট কৰি দিছে যে কেৱল বৈজ্ঞানিক প্ৰমাণ আৰু পৰীক্ষণৰ ভিত্তিতহে ভৱিষ্যতে এই সন্দৰ্ভত পৰৱৰ্তী পদক্ষেপ গ্ৰহণ কৰা হ’ব।

 ই-২৫ পেট্ৰ’লৰ প্ৰচলন সন্দৰ্ভত প্ৰকাশিত বাতৰিসমূহক ভিত্তিহীন আৰু বিভ্ৰান্তিকৰ বুলি অভিহিত কৰি এগৰাকী জ্যেষ্ঠ চৰকাৰী বিষয়াই কয় যে এই বাতৰি সম্পূৰ্ণ মিছা, কিয়নো বৰ্তমান পৰীক্ষণ প্ৰক্ৰিয়া চলি থকাৰ সময়ত ই-২৫ মুকলিৰ কথা কেনেকৈ আহিব পাৰে। বিষয়াসকলে জানিবলৈ দিয়া মতে, বৰ্তমান বিভিন্ন ব্ৰেণ্ড আৰু শ্ৰেণীৰ যান-বাহনত ই-২৫ৰ সামঞ্জস্যতাৰ পৰীক্ষা চলাই থকা হৈছে। এই পৰীক্ষাৰ ফলাফল এতিয়ালৈকে চৰকাৰৰ হাতলৈ অহা নাই আৰু ফলাফলৰ পুংখানুপুংখ পৰ্যালোচনা নকৰাকৈ কোনো সিদ্ধান্ত গ্ৰহণ কৰা নহ’ব।

চৰকাৰী সূত্ৰৰ মতে, ইথানল মিশ্ৰণ কাৰ্যসূচী ৰূপায়ণৰ ক্ষেত্ৰত চৰকাৰে অটোম’বাইল কোম্পানী আৰু তেল বিপণন কোম্পানীসমূহৰ সৈতে আলোচনা কৰি অতি সাৱধানতাৰে আগবাঢ়িছে। বিগত আঢ়ৈ বছৰতকৈও অধিক সময় ধৰি ভাৰতত ইথানল মিশ্ৰিত ইন্ধন কোনো সমস্যা অবিহনে ব্যৱহাৰ হৈ আছে। নিয়ম অনুসৰি ২০২৩ চনৰ এপ্ৰিলত ই-১৫, ২০২৪ চনৰ এপ্ৰিলত ই-১৯ আৰু ২০২৫ চনৰ এপ্ৰিলৰ পৰা ই-২০ পেট্ৰ’লৰ প্ৰচলন আৰম্ভ কৰা হৈছিল। প্ৰতিটো পৰ্যায়তে ব্যৱস্থাটোৰ গভীৰ পৰীক্ষণ আৰু মূল্যায়ন কৰা হৈছিল। বৰ্তমান দেশত পেট্ৰ’লেৰে চলা প্ৰায় বিশ কোটি দুচকীয়া আৰু বিশ লাখ চাৰিচকীয়া বাহনে সফলতাৰে আৰু নিৰাপদে ইথানল মিশ্ৰিত ইন্ধন ব্যৱহাৰ কৰি আছে।

ইথানল মিশ্ৰণক লৈ বিয়পোৱা এনে ভুল তথ্যই সমাজত আতংকৰ সৃষ্টি কৰাৰ লগতে ভাৰতৰ শক্তি নিৰ্ভৰশীলতাৰ পথত বাধা জন্মোৱাৰ এক প্ৰয়াস বুলি চৰকাৰী সূত্ৰই সন্দেহ প্ৰকাশ কৰিছে। ৰাইজক উদ্দেশ্যি এটা সূত্ৰই কয় যে ইয়াত আতংকিত হ’বলগীয়া একো নাই, কিয়নো এই কাৰ্যসূচীৰ প্ৰতিটো পদক্ষেপ বিজ্ঞানসন্মতভাৱে প্ৰমাণিত। পৰীক্ষা-নিৰীক্ষা সম্পূৰ্ণ হোৱাৰ পিছত আৰু বিশেষজ্ঞসকলে গ্ৰাহক তথা যান-বাহনৰ ইঞ্জিন, সুৰক্ষা আৰু ইন্ধনৰ কাৰ্যক্ষমতাৰ বাবে ই সুৰক্ষিত বুলি নিশ্চিত হোৱাৰ পিছতহে ভৱিষ্যতে ইথানলৰ মাত্ৰা বৃদ্ধিৰ সন্দৰ্ভত পৰৱৰ্তী সিদ্ধান্ত গ্ৰহণ কৰা হ’ব বুলি চৰকাৰে স্পষ্টিকৰণ দিছে।