২০০৮ চনৰ আহমেদাবাদৰ ধাৰাবাহিক বিস্ফোৰণৰ গোচৰত গুজৰাট উচ্চ ন্যায়ালয়ে গুৰুত্বপূৰ্ণ ৰায় দিয়ে। নিম্ন ন্যায়ালয়ৰ ৰায় বাহাল ৰাখি উচ্চ ন্যায়ালয়ৰ বিভাগীয় বিচাৰপীঠে ৩৮ জন দোষীৰ মৃত্যুদণ্ডৰ কথা ঘোষণা কৰিছে। ইয়াৰ সমান্তৰালকৈ আৰু ১১ জন দোষীৰ যাৱজ্জীৱন কাৰাদণ্ডও বাহাল ৰখা হৈছে।
সন্ত্ৰাসবাদী সংগঠন ‘ভাৰতীয় মুজাহিদীন’ (আই এম)ৰ সদস্যসকলৰ বিৰুদ্ধে উত্থাপিত অভিযোগ প্ৰমাণিত হোৱাৰ লগে লগে আদালতে এই চূড়ান্ত সিদ্ধান্ত গ্ৰহণ কৰে।
উল্লেখ্য যে ২০০৮ চনৰ ২৬ জুলাইত আহমেদাবাদৰ বিভিন্ন স্থানত মাত্ৰ ৭০ মিনিটৰ ভিতৰত ২১টা বিস্ফোৰণ সংঘটিত হৈছিল। এই ভয়াবহ আক্ৰমণত ৫৬ জন লোক নিহত হোৱাৰ লগতে ২০০ৰো অধিক লোক আহত হয়।
কেৱল মহানগৰীৰ জনবসতিপূৰ্ণ অঞ্চলকে নহয়, আহতসকল চিকিৎসাধীন হৈ থকা চিকিৎসালয়সমূহকো লক্ষ্য কৰি বিস্ফোৰণৰ ঘটোৱা হয়। বিস্ফোৰণৰ মাত্ৰ কেইমিনিটমান পূৰ্বে আক্ৰমণৰ দায়িত্ব স্বীকাৰ কৰি বিভিন্ন সংবাদ মাধ্যমলৈ ইমেইল প্ৰেৰণ কৰি ভাবুকি দিয়া হৈছিল।
২০২২ চনৰ ফেব্ৰুৱাৰী মাহত এখন বিশেষ আদালতে এই গোচৰটোক ‘বিৰলতম’ অপৰাধ বুলি শ্ৰেণীভুক্ত কৰিছিল আৰু ৩৮জনক মৃত্যুদণ্ড আৰু ১১জনক যাৱজ্জীৱন কাৰাদণ্ডৰ শাস্তি প্ৰদান কৰিছিল। দোষীসকলে উচ্চ ন্যায়ালয়ত আবেদন জনায় যদিও ন্যায়াধীশ এ.ৱাই. কোগজে আৰু ন্যায়াধীশ সমীৰ ড’ভেৰ বিচাৰপীঠে এই আবেদন খাৰিজ কৰে।
তদন্তকাৰী সংস্থাৰ তথ্য মতে, ২০০৭ চনৰ ডিচেম্বৰ মাহত কেৰালাৰ এৰ্নাকুলাম জিলাত নিষিদ্ধ সংগঠন ‘ষ্টুডেণ্টছ ইছলামিক মুভমেণ্ট অৱ ইণ্ডিয়া’ (SIMI)ৰ গোপন প্ৰশিক্ষণ শিবিৰত এই আক্ৰমণৰ পৰিকল্পনা কৰা হৈছিল। তদানীন্তন ছিমিৰ মুৰব্বী ছফৰ নাগৰিৰ নেতৃত্বত তাত প্ৰায় ৫০ জন সদস্যক অস্ত্ৰ-শস্ত্ৰ আৰু শাৰীৰিক প্ৰশিক্ষণ দিয়া হৈছিল।
গোচৰৰ শুনানিৰ সময়ত এইটোও জানিব পৰা গৈছে যে জেলত থকাৰ সময়ত ২৪ জন অভিযুক্তই ২১৩ ফুট দীঘল সুৰংগ খান্দি পলায়নৰ পৰিকল্পনা কৰিছিল, যিটো শেষ মুহূৰ্তত জেল কৰ্তৃপক্ষই ব্যৰ্থ কৰি পেলায়। দীৰ্ঘ ১৮ বছৰৰ অন্তত এই ৰায়দানৰ ফলত গোচৰটোৰ এটা গুৰুত্বপূৰ্ণ অধ্যায়ৰ নিষ্পত্তি হ’ল।
