উত্তৰ প্ৰদেশৰ এজন বিজেপি বিধায়ক তথা বিধানসভা নিৰ্বাচনৰ প্ৰাৰ্থীক সাম্প্ৰদায়িক তথা উচতনিমূলক মন্তব্য দিয়াৰ অভিযোগত জাননী জাৰি কৰিছে নিৰ্বাচন আয়োগে।
আমেঠিৰ টিলোই বিধানসভা সমষ্টিৰ বিজেপি প্ৰাৰ্থী মায়াংকেশ্বৰ শৰণ সিঙৰ বিৰুদ্ধে আয়োগে প্ৰাথমিকভাৱে আদৰ্শ বিধি আৰু নিৰ্বাচনী আইন উলংঘা কৰাৰ অভিযোগ আনিছে।
নিৰ্বাচনী আয়োগে প্ৰেৰণ কৰা জাননীৰ সঁহাৰি দিবলৈ মায়াংকেশ্বৰ শৰণ সিঙক ২৪ ঘণ্টা সময় দিয়া হৈছে।
উল্লেখ্য যে মায়াংকেশ্বৰ শৰণ সিঙৰ ভাষণৰ এটা ভিডিঅ’ সামাজিক মাধ্যমত ভাইৰেল হৈ পৰিছিল।
ভিডিঅ’টোত আমেঠিৰ সিঙক নিৰ্বাচনী প্ৰচাৰৰ সময়ত মুছলমানসকলৰ বিৰুদ্ধে ঘৃণামূলক বক্তব্য প্ৰদান কৰা দেখিবলৈ পোৱা গৈছে।
বিধায়কজনে কয়, “যদি হিন্দুস্তানৰ হিন্দুসকলে সাৰ পায় তেন্তে মুছলমানৰ দাড়ি টানি আনি বেণী গুঠি দিয়া হ’ব। যদি কোনো মুছলমান হিন্দুস্তানত থাকিব বিচাৰে, তেতিয়াহ’লে ‘ৰাধে ৰাধে’ বুলি ক’ব লাগিব। অন্যথা বিভাজনৰ সময়ত পাকিস্তানলৈ যোৱা সকলৰ দৰে এই সকলো পাকিস্তানলৈ যাব পাৰে। হিন্দুস্তানত তেওঁলোকৰ কোনো প্ৰয়োজন নাই।”
এই ভিডিঅ’টো সামাজিক মাধ্যমত ভাইৰেল হৈ পৰাৰ পাছত তুমুল বিতৰ্কৰ সৃষ্টি হয়।
নিৰ্বাচন আয়োগে উল্লেখ কৰিছে যে ভাৰতীয় দণ্ডবিধি (আইপিচি) আৰু জন প্ৰতিনিধিত্ব আইনৰ প্ৰাসংগিক ধাৰাৰ অধীনত ১৮ ফেব্ৰুৱাৰীত সিঙৰ বিৰুদ্ধে এখন এজাহাৰ দাখিল কৰা হৈছিল।
নিৰ্ধাৰিত সময়ৰ ভিতৰত বিধায়কজনে কোনো সঁহাৰি নজনালে নিৰ্বাচন আয়োগে বিষয়টোত উপযুক্ত ব্যৱস্থা বা সিদ্ধান্ত ল’ব বুলি আয়োগে বিধায়ক সিঙক সকীয়নি দিছে।