বহু অপৰাধী প্ৰাৰ্থীৰে এতিয়া ভৰি পৰিছে ৰাজনৈতিক ক্ষেত্ৰ খন।
এনে সময়তে কেন্দ্ৰীয় নিৰ্বাচন আয়োগে বিগত লোকসভা নিৰ্বাচনৰ সময়তে ফৌজদাৰী গোচৰ থকা প্ৰাৰ্থীসকলক তেওঁলোকৰ গোচৰৰ তথ্য বাতৰি কাকতত বিজ্ঞাপন দি ৰাজহুৱা কৰিবলৈ কৈছিল যদিও বহু প্ৰাৰ্থীয়ে আয়োগৰ নিৰ্দেশনা সঠিক ৰূপত পালন কৰা নাই।
সেইবাবেই নিৰ্বাচন আয়োগে পুনৰ অপৰাধী গোচৰ থকা প্ৰাৰ্থীসকলক তেওঁলোকৰ অপৰাধৰ কথা তিনিবাৰকৈ বাতৰি কাকতত বিজ্ঞাপন প্ৰকাশ কৰি ৰাজহুৱা কৰিবলৈ নিৰ্দেশনা জাৰি কৰিছে।
ফৌজদাৰী গোচৰ থকা প্ৰাৰ্থীসকলৰ প্ৰতি অধিক কঠোৰ পদক্ষেপ গ্ৰহণ কৰি এইবাৰ কেন্দ্ৰীয় নিৰ্বাচন আয়োগে বিজ্ঞাপন প্ৰকাশৰ বাবে নিৰ্দিষ্ট সময়সীমাও বান্ধি দিছে।
পূৰ্বে ফৌজদাৰী গোচৰ থকা প্ৰাৰ্থীয়ে নিজৰ ইচ্ছামতে তেওঁলোকৰ অপৰাধৰ গোচৰ সম্পৰ্কীয় বিজ্ঞাপন পঢ়ুৱৈৰ চকুত নপৰাকৈ প্ৰকাশ কৰিছিল।
এইবাৰ তেনে প্ৰাৰ্থীয়ে আয়োগে বান্ধি দিয়া দিনৰ ভিতৰত স্পষ্ট ভাবে তেওঁলোকৰ অপৰাধ ৰাজহুৱা কৰিব লাগিব।
সেই অনুসৰি মনোনয়নপত্ৰ দাখিল কৰাৰ পৰা আৰম্ভ কৰি প্ৰচাৰৰ অন্ত পৰালৈকে ফৌজদাৰী গোচৰ থকা প্ৰাৰ্থীয়ে তিনিবাৰ টিভি অথবা বাতৰি কাকতত অপৰাধ সম্পৰ্কীয় বিজ্ঞাপন দিব লাগিব।
নতুন নিৰ্দেশনা অনুসৰি মনোনয়নপ্তৰ দাখিলৰ অন্তিম দিনৰ ৪ দিন আগলৈকে প্ৰথমটো বিজ্ঞাপন দিব লাগিব।
দ্বিতীয়টো বিজ্ঞাপন দিব লাগিব মনোনয়ন দাখিলৰ শেষৰ তাৰিখৰ পিছৰ পৰা ক্ৰমে ৫ বা ৮ দিনৰ ভিতৰত।
তৃতীয়টো বিজ্ঞাপন দিব লাগিব প্ৰচাৰৰ অন্ত পৰাৰ ৯ দিন আগত।
প্ৰাৰ্থীয়ে কেৱল বিজ্ঞাপন দিলেই নহ’ব, সেই বিষয়ে আয়োগক জনাবও লাগিব।
উল্লেখ্য বৰ্তমান দেশৰ ৪৪৪২ গৰাকী জনপ্ৰতিনিধিৰ বিৰুদ্ধে ফৌজদাৰী গোচৰ চলি আছে।