শুকুৰবাৰে ভাৰতীয় নিৰ্বাচন আয়োগে অসমৰ সংসদীয় আৰু বিধানসভা সমষ্টিৰ সীমা নিৰ্ধাৰণৰ চূড়ান্ত তালিকা প্ৰকাশ কৰে।
‘চূড়ান্ত তালিকাখন এক অধিসূচনা হিচাপে কেন্দ্ৰীয় চৰকাৰ আৰু অসম চৰকাৰৰ গেজেটত প্ৰকাশ কৰা হৈছে।
নিৰ্বাচনী আয়োগে দিয়া বিবৃতি অনুসৰি, ২০২৩ চনৰ জুলাই মাহত গুৱাহাটীত প্ৰস্তাৱৰ খচৰাৰ সম্পৰ্কে হোৱা তিনিদিনীয়া ৰাজহুৱা শুনানি আৰু ২০২৩ চনৰ মাৰ্চ মাহত প্ৰতিবেদনৰ খচৰা প্ৰস্তুত কৰাৰ পূৰ্বে হোৱা প্ৰি-মিটিং অনুসৰি এই তালিকা প্ৰস্তুত কৰা হৈছে।
নতুন তালিকা অনুসৰি, অসমত বিধানসভাৰ আসনৰ সংখ্যা ১২৬ আৰু অসমত লোকসভাৰ আসনৰ সংখ্যা ১৪ খন ৰখা হৈছে।
অনুসূচিত জাতি (SC)ৰ বাবে বিধানসভাত ৯খন আসন আৰু লোকসভাত এখন আসন অনুসূচিত জাতিৰ বাবে সংৰক্ষণ কৰা হৈছে।
মুঠ ১৯টা বিধানসভা সমষ্টি আৰু দুটা সংসদীয় সমষ্টি অনুসূচিত জনজাতি (ST)ৰ বাবে সংৰক্ষিত কৰা হৈছে।
ভাৰতীয় সংবিধানৰ ৩৩০ আৰু ৩৩২ নং অনুচ্ছেদত উল্লেখ কৰা নীতিৰ ভিত্তিত অনুসূচিত জাতি আৰু অনুসূচিত জনজাতিৰ বাবে সমষ্টি সংৰক্ষণ কৰা হৈছে বুলি নিৰ্বাচনী আয়োগে উল্লেখ কৰিছে।
এই চূড়ান্ত তালিকাত ১৯টা বিধানসভা সমষ্টি আৰু এটা সংসদীয় সমষ্টিৰ নতুন নামকৰণ কৰা হৈছে।
জনসাধাৰণৰ দাবীৰ প্ৰতি লক্ষ্য ৰাখি এটা সংসদীয় আৰু কিছু বিধানসভা সমষ্টিয়ে যুটীয়া নাম পায় যেনে, দৰং-ওদালগিৰি, হাজো- শুৱালকুছি, বকো-ছয়গাঁও, নগাঁও- বটদ্ৰৱা, ভৱনীপুৰ- সৰভোগ, আলগাপুৰ- কাটলিচেৰা ।
সমষ্টি পুনৰ নিৰ্ধাৰণৰ নতুন তালিকা অনুসৰি বিধানসভাত অনুসূচিত জাতিৰ বাবে সংৰক্ষিত আসন ৮ৰ পৰা ৯ খনলৈ বৃদ্ধি কৰা হৈছে; আনহাতে অনুসূচীত জনজাতিৰ বাবে বিধানসভাৰ সংৰক্ষিত আসনৰ সংখ্যা আসন ১৬ৰ পৰা ১৯খনলৈ বৃদ্ধি কৰা হৈছে।
পশ্চিম কাৰ্বি আংলং জিলাৰ স্বায়ত্তশাসিত জিলাসমূহত বৃদ্ধি কৰা হৈছে এখন বিধানসভাৰ আসন। আনহাতে, বডোলেণ্ডত বিধানসভা সমষ্টিৰ সংখ্যা ১১ৰ পৰা ১৫টালৈ বৃদ্ধি কৰা হৈছে।
