প্ৰতিবন্ধী তথা বিশেষভাৱে সক্ষম লোকসকলক উচ্চ শিক্ষা গ্ৰহণ কৰাৰ পৰা বঞ্চিত কৰাৰ ষড়যন্ত্ৰত লিপ্ত হৈছে অসম চৰকাৰ এই গুৰুতৰ অভিযোগ উত্থাপন কৰিছে প্ৰতিবন্ধী সুৰক্ষা সংস্থা অসমে।
শুকুৰবাৰে গুৱাহাটী প্ৰেছ ক্লাৱত এখন সংবাদমেল সম্বোধন কৰি সংস্থাৰ সাধাৰণ সম্পাদক নৃপেন মালাকাৰে চৰকাৰৰ শিক্ষা বিভাগৰ প্ৰতি প্ৰশ্ন উত্থাপন কৰি কয় ‘প্ৰতিবন্ধী হোৱাৰ বাবে উচ্চ শিক্ষা লাভ কৰাৰ পৰা বঞ্চিত হ’ব নেকি দৃষ্টিহীন ছাত্ৰ-ছাত্ৰী? তেওঁলোক শিক্ষাবিভাগৰ বাবে আৱৰ্জনা নেকি?’
ইয়াৰোপৰি, সংস্থাই দীৰ্ঘদিনৰ পৰা কৰি অহা দাবীৰ পৰিপ্ৰেক্ষিতত মন্ত্ৰী প্ৰমীলা ৰাণী ব্ৰহ্মই গুৱাহাটীৰ লটাকটাস্থিত দৃষ্টিহীন বিদ্যালখনক উচ্চতৰ মাধ্যমিক পৰ্য্যায়লৈ উন্নীত কৰাৰ বাবে চেষ্টা চলোৱাৰ লগতে বিদ্যালয়খনক উন্নীত কৰিব বুলি ঘোষণা কৰিছিল বুলি সংবাদমেলত মালাকাৰে উল্লেখ কৰে। আনকি যোৱা ৪ মে’ত শিক্ষা বিভাগৰ উচ্চ স্তৰৰ বিষয়াসসকলৰ উপস্থিতিত বৈঠক অনুষ্ঠিত কৰি চলিত বৰ্ষৰ পৰাই উচ্চতৰ মাধ্যমিক শাখাত পাঠদান আৰম্ভ কৰাৰো সিদ্ধান্ত গ্ৰহণ কৰিছিল বুলিও তেওঁ কয়।
‘কিন্তু পৰিতাপৰ বিষয় সম্পূৰ্ণ দুমাহৰ পাছত যোৱা ১৫ জুলাইৰ দিনা শিক্ষা মন্ত্ৰীৰ নিৰ্দেশ মৰ্মে শিক্ষা বিভাগৰ যুটীয়া আয়ুক্তই মাধ্যমিক শিক্ষা বিভাগৰ সঞ্চালকলৈ এক পত্ৰ প্ৰেৰণ কৰে। য’ত স্পষ্টকৈ উল্লেখ আছিল যে বিদ্যালয়খন উন্নীতকৰণৰ ক্ষেত্ৰত কোনো কাৰণতে বিদ্যালয়খনত শিক্ষক নিযুক্তিকে ধৰি অন্য কোনো দায়িত্বই শিক্ষা বিভাগে গ্ৰহণ নকৰে’। সংবাদমেলত মালাকাৰে এইদৰে কয়।
আনহাতে, যদিও বিদ্যালয়খনত উচ্চতৰ মাধ্যমিকৰ শ্ৰেণী আৰম্ভ কৰাৰ বাবে সমাজ কল্যাণ বিভাগে শিক্ষক-কৰ্মচাৰীক নিযুক্তি দিয়ে, সেইসমূহ শিক্ষক-কৰ্মচাৰীয়ে কেতিয়াও শিক্ষা বিভাগৰ অধীনত কোনো কাৰণতে নিয়মীয়াকৰণৰ বাবে দাবী কৰিব নোৱাৰিব বুলিও স্পষ্টকৈ উল্লেখ আছে পত্ৰখনত।
উক্ত সংবাদমেলতে শিক্ষা বিভাগৰ প্ৰতি ক্ষোভ উজাৰি মালাকাৰে কয় ‘এই নিৰ্দেশ বাতিল হ’বই লাগিব। এই নিৰ্দেশ বাতিল কৰি শিক্ষা বিভাগৰ অধীনতে বিদ্যালয়খনক উন্নীত কৰাৰ বাবে আমি দাবী জনাইছো। অনথ্যা আমি গণতান্ত্ৰিক আন্দোলনৰ কাৰ্য্যসূচী গ্ৰহণ কৰিবলৈ বাধ্য হ’ম’।
আজি পৰ্য্যন্ত সমগ্ৰ উত্তৰ-পূবত দৃষ্টিহীন ছাত্ৰ-ছাত্ৰীয়ে উচ্চ শিক্ষা গ্ৰহণ কৰিব পৰাকৈ উচ্চতৰ মাধ্যমিক বিদ্যালয় নাই বুলি উল্লেখ কৰি মালাকৰে সমাজ কল্যাণ বিভাগৰ মন্ত্ৰীয়ে লোৱা প্ৰচেষ্টাক শিক্ষা বিভাগে সহযোগ কৰিলেহে ‘সবকা সাথ সবকা বিকাশ’ নীতি সম্ভৱ হৈ উঠিব বুলি মত প্ৰকাশ কৰে।