মঙলদৈ আৰক্ষী থানাৰ সমীপৰ শিক্ষা প্ৰতিষ্ঠানত নিশা চোৰে চলালে লুটপাট

মঙলদৈ আৰক্ষীৰ নিৰ্লিপ্ততাৰ সুযোগ গ্ৰহণ কৰি শনিবাৰে নিশা এটা অচিনাক্ত দুৰ্বৃত্তৰ দলে মঙলদৈ চহৰৰ এখন আগশাৰীৰ প্ৰাথমিক শিক্ষা প্ৰতিষ্ঠানত প্রৱেশ কৰি চুৰি কাৰ্য সংঘটিত কৰে। এই ঘটনাক কেন্দ্ৰ কৰি চহৰখনত সম্প্ৰতি এক চেপা উত্তেজনাময় পৰিৱেশে বিৰাজ কৰা পৰিলক্ষিত হৈছে।

ৰাষ্ট্ৰীয় ঘাইপথৰ সমীপত তথা মঙলদৈ আৰক্ষী থানাৰ পৰা মাত্ৰ কেইখোজমান নিলগত অৱস্থিত বিদ্যালয়খনত নিশা চোৰৰ দলটোৱে প্ৰৱেশ কৰি বিদ্যালয়খনৰ বহু গুৰুত্বপূৰ্ণ নথিপত্ৰ চুৰি কৰাৰ লগতে সা-সম্পত্তি ভাঙি-চিঙি লণ্ড-ভণ্ড কৰে।

মঙলদৈ বেবাৰঘাট এম ই স্কুলৰ প্ৰধান শিক্ষক খগেন বৰুৱাই ঘটনা সন্দৰ্ভত জানিবলৈ দি কয় যে চোৰৰ দলটোৱে বিদ্যালয়খনৰ গুৰুত্বপূৰ্ণ নথিপত্ৰ চোৰ কৰাৰ লগতে বিদ্যালয়খনৰ কেইবাটাও ষ্টীল আলমিৰা ভাঙি চিঙি লণ্ড-ভণ্ড কৰিছে। আজি ৰাতিপুৱা কিছু ছাত্ৰ-ছাত্ৰী বিদ্যালয়খনত উপস্থিত হোৱাৰ পিছতহে এই সমগ্ৰ ঘটনাটো গম পোৱা বুলি প্ৰধান শিক্ষকগৰাকীয়ে জনায়।

ইফালে বিদ্যালয়খনৰ প্ৰধান শিক্ষকে মঙলদৈ আৰক্ষী থানাত এখন এজাহাৰ দাখিল কৰিছে। আৰক্ষীয়ে এজাহাৰ লাভ কৰাৰ পাছতে ঘটনা সন্দৰ্ভত তদন্ত আৰম্ভ কৰিছে যদিও এই পৰ্যন্ত কোনো দুৰ্বৃত্তকে আটক বা চিনাক্ত কৰিব পৰা নাই।

উল্লেখ্য যে কি কাৰণত দুৰ্বৃত্তৰ দলে বিদ্যালয়খনত প্ৰৱেশ কৰি নথিপত্ৰ চুৰ কৰি নিয়ে সেই কথা এতিয়াও জানিব পৰা হোৱা নাই। আনহাতে চহৰৰ মাজ মজিয়া তথা আৰক্ষী থানাৰ নিচেই সমীপতে থকা বিদ্যালয়ত এইদৰে চোৰে লুটপাট চলোৱা কাৰ্যক মঙলদৈৰ সচেতন সমাজে ধিক্কাৰ দিয়াৰ লগতে চহৰখনত আৰক্ষীৰ নিৰাপত্তাৰ ফোপোলা স্বৰূপটোৱে পোহৰলৈ আহিছে।