ছেপ্টম্বৰৰ মধ্য ভাগৰ পৰা ৰাজ্যত অনানুষ্ঠানিক শিক্ষা ব্যৱস্থা আৰম্ভ কৰা হ’ব। আজি বিয়লি জনতা ভৱনত অনুষ্ঠিত এক সংবাদ মেলত এই কথা প্ৰকাশ কৰে শিক্ষা মন্ত্ৰী ডঃ হিমন্ত বিশ্ব শৰ্মাই।
মন্ত্ৰী গৰাকীয়ে সংবাদ মেলত লগতে ১৫ ছেপ্টেম্বৰলৈকে শিক্ষক শিক্ষয়িত্ৰীৰ কোভিড টেষ্টৰ সীমা বৃদ্ধি কৰা বুলি জানিবলৈ দিয়ে।
“১৫ ছেপ্টেম্বৰলৈকে বিদ্যালয় চেনিটাইজ কৰিব লাগিব। যিসকল শিক্ষকে কোভিড টেষ্ট কৰালে বা নিগেটিভ আহিল তেওঁলোক ১ চেপ্টেম্বৰৰ পৰাই বিদ্যালয় যাব লাগিব।” সংবাদ মেলত শিক্ষা মন্ত্ৰী গৰাকীয়ে কয়।
১৫ ছেপ্টেম্বৰৰ পৰা পৰীক্ষামূলক ভাৱে ১৫ দিনীয়াকৈ অনানুষ্ঠানিকভাৱে শিক্ষা ব্যৱস্থা আৰম্ভ হ’ব। কিন্তু এই অনানুষ্ঠানিক শিক্ষা ব্যৱস্থাৰ পদ্ধতি কেনেকুৱা হ’ব সেই বিষয়ে মন্ত্ৰী গৰাকীয়ে সবিশেষ জনোৱা নাই।
অৱশ্যে মিড দে’ মিল নিবলৈ আহোঁতে প্ৰাথমিক পৰ্যায়ৰ ছাত্ৰ-ছাত্ৰীক এঘণ্টাৰ বাবে শিক্ষা প্ৰদান কৰিব লাগিব বুলি কয় মন্ত্ৰী গৰাকীয়ে।
১৫-ছেপ্টেম্বৰৰ পৰা হায়াৰ চেকেণ্ডাৰী দ্বিতীয় বৰ্ষ আৰু স্নাতক তৃতীয় বৰ্ষৰ ৪-৫ টা গ্ৰুপত ভাগ কৰি অনানুষ্ঠানিক শ্ৰেণী আৰম্ভ কৰা হ’ব।
কোৱাৰেন্টাইন আৰু কোভিড কেয়াৰ চেণ্টাৰ হিচাপে ব্যৱহাৰ কৰি থকা বিদ্যালয়ৰ শিক্ষকসকল বিদ্যালয়লৈ যাব নালাগে।
কিন্তু উপায়ুক্তই দায়িত্ব দিলে যাব লাগিব বুলিও মন্ত্ৰী গৰাকীয়ে উল্লেখ কৰে।
ইফালে ১২ ছেপ্টেম্বৰৰ দিনা মেট্ৰিকত ষ্টাৰ পোৱা ছাত্ৰ ছাত্ৰীসকলক ২০ হাজাৰ টকাকৈ একাউন্টত জমা দিয়া হ’ব জানিবলৈ দিয়ে শিক্ষা মন্ত্ৰী গৰাকীয়ে।
“১৬,৯৪৪ গৰাকী ছাত্ৰ ছাত্ৰীক কম্পিউটাৰৰ পৰিৱৰ্তে এই ধন জমা দিয়া হ’ব। ইতিমধ্যে ছাত্ৰ ছাত্ৰী সকলৰ পৰা বেংক একাউণ্ট নম্বৰ সংগ্ৰহ কৰা হৈছে।” শিক্ষামন্ত্ৰী গৰাকীয়ে সংবাদ মেলত কয়।
