এক মৰ্মান্তিক পথ দুৰ্ঘটনা সংঘটিত হৈছে গুজৰাটত। আৰক্ষীৰ সূত্ৰ অনুসৰি দেওবাৰে এখন ছুইফট ডিজাইৰ এখন এছ ইউ ভিৰ সৈতে সংঘৰ্ষত লিপ্ত হয়। চুইফট গাড়ীখন খাৱৈত পৰাৰ পিছত নিমিষতে অগ্নিকাণ্ড সংঘটিত হয়। গাড়ীৰ ভিতৰত অগ্নিদগ্ধ হৈ ৮ জন লোকৰ মৃত্যু হয়।
নিহতসকলৰ ভিতৰত দুটা শিশু আৰু ৫ গৰাকী মহিলাও আছে। SUV খনত থকা তিনিজন লোক সামান্যভাৱে আঘাতপ্ৰাপ্ত হয়। খবৰ লাভ কৰি ঘটনাস্থলীত উপস্থিত হয় আৰক্ষী। অৱশ্যে গাড়ীখনত অগ্নিকাণ্ড সংঘটিত হোৱাৰ সঠিক কাৰণ এতিয়াও জানিব পৰা হোৱা নাই।
আৰক্ষীৰ সূত্ৰ অনুসৰি, কাডুগ্ৰামৰ পৰা সুৰেন্দ্ৰনগৰ চহৰ অভিমুখে আহিছিল চুইফট গাড়ীখন। সুৰেন্দ্ৰনগৰ জিলাৰ ৱাধৱান তালুকৰ দেদাদৰা গাঁৱৰ সমীপৰ ঘাইপথত বিয়লি ৩:৪০ বজাত সংঘটিত হয় এই দুৰ্ঘটনা। ছুইফট গাড়ীখনে এছ ইউ ভিখনৰ সৈতে মুখামুখি সংঘৰ্ষত লিপ্ত হয়। সংঘৰ্ষৰ ফলত ছুইফট গাড়ীখন পথৰ কাষৰ খাৱৈত পৰাৰ লগে লগে জুই লাগি যায়।
গাড়ীৰ দুৱাৰ খুলিব নোৱাৰাত গাড়ীৰ ভিতৰত থকা ৮ জন যাত্ৰী অগ্নিদগ্ধ হৈ মৃত্যুমুখত পৰে। নিহতসকলৰ ভিতৰত আছে ৩৫-৫৫ বছৰ বয়সৰ ৫ গৰাকী মহিলা আৰু ১০ মাহ আৰু ১৩ বছৰ বয়সৰ দুটা শিশু।
জানিব পৰা মতে, এছ ইউ ভিখনত থকা তিনিজন লোক বৰ্তমান চিকিৎসালয়ত চিকিৎসাধীন হৈ আছে। অৱশ্যে তেওঁলোকৰ এজনো গুৰুতৰভাৱে আহত হোৱা নাই। দুৰ্ঘটনাৰ শব্দ শুনি স্থানীয় ৰাইজে ততাতৈয়াকৈ সেই স্থানত উপস্থিত হয়।
দুৰ্ঘটনাটোৰ পিছত ঘাইপথত প্ৰচণ্ড যান-জঁটৰ সৃষ্টি হয়। সুৰেন্দ্ৰনগৰৰ ডি আই জি গিৰীশ পাণ্ডিয়াই কয় যে এই দুৰ্ঘটনাৰ বাবে এছ ইউ ভিৰ সন্মুখৰ অংশ ক্ষতিগ্ৰস্ত হৈছে। আঠজন লোকৰ মৃতদেহ মৰণোত্তৰ পৰীক্ষাৰ বাবে সুৰেন্দ্ৰনগৰ চৰকাৰী চিকিৎসালয়লৈ প্ৰেৰণ কৰা হৈছে।
