জাপানৰ আইচি-নাগোয়াত অনুষ্ঠিত হৈ থকা এছিয়ান গেমছ ২০২৬ত ভাৰতীয় শ্বুটাৰ ইলাভেনিল ভালাৰিভানে মহিলাৰ ১০ মিটাৰ এয়াৰ ৰাইফলৰ ব্যক্তিগত শাখাত ৰূপৰ পদক অৰ্জন কৰি দেশলৈ গৌৰৱ কঢ়িয়াই আনিছে। দলীয় শাখাৰ পাছত ব্যক্তিগত শাখাতো পদক অৰ্জনেৰে তেওঁ চলিত প্ৰতিযোগিতাখনত ভাৰতীয় শ্বুটিং দলৰ পদকৰ সংখ্যা দুটালৈ বৃদ্ধি কৰে। এই প্ৰতিযোগিতাত জাপানৰ হিনাটা টাইচিয়ে সোণৰ পদক অৰ্জন কৰাৰ বিপৰীতে দক্ষিণ কোৰিয়াৰ বান হিয়োজিনে ব্ৰঞ্জৰ পদক লাভ কৰিবলৈ সক্ষম হয়।
চূড়ান্ত প্ৰতিযোগিতাখনৰ আৰম্ভণিৰে পৰা ইলাভেনিলে সুন্দৰ প্ৰদৰ্শন দাঙি ধৰিছিল। প্ৰথমটো ছিৰিজৰ অন্তত ৫৩.১ স্ক’ৰেৰে তেওঁ শীৰ্ষস্থান দখল কৰে। পৰৱৰ্তী পৰ্যায়তো ধাৰাবাহিকতা অক্ষুণ্ণ ৰাখি দহটা শ্বটৰ অন্তত তেওঁ ১০৬.০ স্ক’ৰেৰে নিজৰ অগ্ৰগতি বজাই ৰাখে। এলিমিনেচন ৰাউণ্ড আৰম্ভ হোৱাৰ পাছতো তেওঁৰ দুৰ্দান্ত প্ৰদৰ্শন অব্যাহত থাকে। বাৰটা শ্বটৰ অন্তত ১২৬.৯ আৰু চৈধ্যটা শ্বটৰ অন্তত ১৪৮.৪ স্ক’ৰেৰে ইলাভেনিলে চীনৰ জিয়াউ হানকে ধৰি আন প্ৰতিদ্বন্দ্বীসকলক পিছ পেলাই ৰাখে। ওঠৰটা শ্বটৰ অন্তত তেওঁ ১৯০.৩ স্ক’ৰ অৰ্জন কৰে। আনকি বিছটা শ্বটৰ অন্তত ২১১.১ স্ক’ৰেৰে তেওঁ জাপানৰ হিনাটা টাইচিতকৈ (২১০.৮) আগবাঢ়ি আছিল।
অৱশ্যে প্ৰতিযোগিতাৰ একেবাৰে অন্তিম পৰ্যায়ত জাপানৰ হিনাটা আৰু দক্ষিণ কোৰিয়াৰ শ্বুটাৰগৰাকীয়ে ইলাভেনিললৈ তীব্ৰ প্ৰত্যাহ্বান আগবঢ়ায়। বাইছটা শ্বটৰ অন্তত ইলাভেনিলৰ স্ক’ৰ আছিল ২৩১.৯ আৰু জাপানৰ হিনাটাৰ স্ক’ৰ আছিল ২৩২.২। নিৰ্ণায়ক অন্তিমটো শ্বটত ভাৰতীয় শ্বুটাৰগৰাকীয়ে ১০.১ স্ক’ৰ কৰাৰ বিপৰীতে হিনাটাই ১০.২ স্ক’ৰ কৰি সোণৰ পদক নিশ্চিত কৰে। চূড়ান্ত পৰ্যায়ত সুন্দৰ খেল প্ৰদৰ্শন কৰিও ইলাভেনিল ৰূপৰ পদকতে সন্তুষ্ট থাকিবলগীয়া হয়। আনহাতে, চূড়ান্ত প্ৰতিযোগিতাত অংশগ্ৰহণ কৰা আনগৰাকী ভাৰতীয় শ্বুটাৰ সোণম মাস্কাৰে ষষ্ঠ স্থান লাভ কৰি প্ৰতিযোগিতাৰ পৰা বিদায় লয়।
উল্লেখযোগ্য যে, ইয়াৰ পূৰ্বে ইলাভেনিল ভালাৰিভান, সোণম মাস্কাৰ আৰু বিদাৰ্শা বিনোদক লৈ গঠিত ভাৰতীয় দলে মহিলাৰ ১০ মিটাৰ এয়াৰ ৰাইফলৰ দলীয় শাখাত ৰূপৰ পদক অৰ্জন কৰিছিল। এই দলীয় পদকটোৱেই আছিল আইচি-নাগোয়া এছিয়ান গেমছত ভাৰতৰ বাবে প্ৰথমটো পদক। ধাৰাবাহিকভাৱে দুটাকৈ পদক জয়েৰে এছিয়ান গেমছত ভাৰতীয় শ্বুটিং দলটোৱে এক সুন্দৰ আৰু ইতিবাচক আৰম্ভণি কৰিবলৈ সক্ষম হৈছে।
