আসন্ন লোকসভা নিৰ্বাচনত প্ৰাৰ্থীসকলৰ নিৰ্বাচনী ব্যয়ৰ ওপৰত নিৰ্বাচন আয়োগে সতৰ্ক দৃষ্টি ৰাখিব। সোমবাৰে দিচপুৰত অনুষ্ঠিত এখন সংবাদমেলত অসমৰ মুখ্য নিৰ্বাচন বিষয়া মুকেশ চন্দ্ৰ চাহুৱে জানিবলৈ দিয়ে যে সমগ্ৰ নিৰ্বাচনী প্ৰক্ৰিয়াটোৰ তদাৰক কৰাৰ বাবে আয়োগে কেন্দ্ৰীয় সাধাৰণ পৰ্যবেক্ষক, ব্যয় পৰ্যবেক্ষক আৰু আৰক্ষী পৰ্যবেক্ষক ৰাজ্যখনলৈ প্ৰেৰণ কৰিব।
সাধাৰণ পৰ্যবেক্ষক মনোনয়ন-পত্ৰ দাখিলৰ অন্তিম দিনাৰে পৰা নিৰ্বাচনী প্ৰক্ৰিয়া সম্পন্ন হোৱালৈকে প্ৰতিটো লোকসভা সমষ্টিৰ অঞ্চলত বাহৰ পাতি সামগ্ৰিকভাৱে প্ৰক্ৰিয়াটোৰ তদাৰক কৰিব।
আনহাতে, ব্যয় পৰ্যবেক্ষক সমগ্ৰ নিৰ্বাচনী প্ৰক্ৰিয়াটোত মুঠতে তিনিবাৰ আহিব। ইয়াৰ বিপৰীতে আৰক্ষী পৰ্যবেক্ষকে সম্পূৰ্ণ নিৰাপত্তা ব্যৱস্থাৰ তদাৰক কৰিব।
মুখ্য নিৰ্বাচন বিষয়া চাহুৱে লগতে কয় যে এইবাৰৰ নিৰ্বাচনত এজন প্ৰাৰ্থীয়ে সৰ্বাধিক ৭০ লাখ টকা ব্যয় কৰিব পাৰিব। তদুপৰি, নিৰ্বাচনত ধন জমা আৰু ব্যয়ৰ বাবে প্ৰাৰ্থীয়ে এটাই একাউণ্ট ব্যৱহাৰ কৰিব লাগিব।
ইপিনে,সমগ্ৰ নিৰ্বাচনী প্ৰক্ৰিয়াটোত প্ৰাৰ্থী এজনে তিনিবাৰকৈ হিচাপ দেখুৱাব লাগিব আৰু ভোটগণনাৰ অন্তত নিৰ্বাচনী ব্যয়ৰ বিতং হিচাপ দাখিল কৰিব লাগিব।
আনহাতে, আয়োগে প্ৰাৰ্থীৰ ব্যয় সম্পৰ্কত এখন ‘শ্বেড’ ৰেজিষ্টাৰ’ খুলিব আৰু ইয়াত প্ৰাৰ্থী একোজনৰ সভা-সমিতিকে ধৰি প্ৰচাৰ অভিযান আদিৰ আনুমানিক খৰচ লিপিবদ্ধ থাকিব। পৰৱৰ্তী সময়ত প্ৰাৰ্থীয়ে দাখিল কৰা হিচাপৰ সৈতে ‘শ্বেড’ ৰেজিষ্টাৰ’ মিলাই চোৱা হ’ব।
উক্ত হিচাপত গুৰুতৰ বিসংগতি পালে বিষয়টো আয়োগক অৱগত কৰা হ’ব। মুখ্য নিৰ্বাচন বিষয়া চাহুৱে নিৰাপত্তা ব্যৱস্থা সম্পৰ্কত পূৰ্বৰ ১৪’ৰ নিৰ্বাচনৰ দৰেই ব্যাপক নিৰাপত্তা ব্যৱস্থা গ্ৰহণ কৰাৰ কথা জানিব দিয়ে।
