সমষ্টি পুনৰ নিৰ্ধাৰণক লৈ উত্তাল হৈ আছে ৰাজ্য। শাসক-বিৰোধীৰ মাজত চলিছে তীব্ৰ বাক-বিতণ্ডা। ৰাজপথত প্ৰতিবাদমুখৰ হৈ পৰিছে দল-সংগঠন। সমষ্টি পুনৰ নিৰ্ধাৰণৰ খচৰা প্ৰস্তাৱৰ বিৰোধিতাৰে ইতিমধ্যে দিল্লীত উপস্থিত হৈও প্ৰতিবাদ সাব্যস্ত কৰিছে বিৰোধী দলসমূহে।
এই খচৰা প্ৰস্তাৱ সন্দৰ্ভত সৃষ্টি হোৱা বিতৰ্কৰ সমাধান আৰু মতামত সংগ্ৰহৰ বাবে ভাৰতীয় নিৰ্বাচন আয়োগৰ এটা দলে ১৯ জুলাইৰ পৰা ২১ জুলাইলৈ তিনিদিনৰ বাবে অসম ভ্ৰমণ কৰিব।
তিনিদিনীয়া এই ভ্ৰমণৰ সময়ত নিৰ্বাচন আয়োগৰ দলটোৱে ৰাজ্যৰ ৰাজনৈতিক দল আৰু দল-সংগঠনসমূহৰ সৈতে আলোচনাত মিলিত হৈ পৰামৰ্শ বা অভিযোগ গ্ৰহণ কৰিব।
গুৱাহাটীৰ শ্ৰীমন্ত শংকৰদেৱ কলাক্ষেত্ৰত অনুষ্ঠিত হ’ব এই বৈঠক। আয়োগৰ প্ৰতিনিধি দলটোৰ সমুখত ৰাজ্যৰ বিভিন্ন ৰাজনৈতিক দল আৰু দল-সংগঠনে নিজৰ মতামত আৰু উদ্বেগ দাঙি ধৰিব।
নিৰ্বাচন আয়োগৰ দলটোৱে লগতে বিধানসভা আৰু সংসদীয় সমষ্টি উভয়তে প্ৰস্তাৱিত সীমা নিৰ্ধাৰণৰ ক্ষেত্ৰত ৰাজনৈতিক দল আৰু দল-সংগঠনসমূহৰ সৈতে জিলাভিত্তিক আলোচনাতো মিলিত হ’ব।
১৯ জুলাইত কোকৰাঝাৰ, চিৰাং, বাকছা, উদালগুৰি, কাৰ্বি আংলং, পশ্চিম কাৰ্বি আংলং, আৰু ডিমা হাচাও জিলাৰ প্ৰতিনিধিৰ সৈতে দলটোৰ বৈঠক অনুষ্ঠিত হ’ব।
ইয়াৰ পিছদিনা অৰ্থাৎ ২০ জুলাইত ধুবুৰী, গোৱালপাৰা, দক্ষিণ ছালমাৰা, বঙাইগাঁও, বৰপেটা, নলবাৰী, কামৰূপ, কামৰূপ (মেট্ৰ’), নগাঁও, শোণিতপুৰ, মৰিগাঁও, আৰু দৰং জিলাৰ প্ৰতিনিধিৰ সৈতে আলোচনা অনুষ্ঠিত হ’ব।
আনহাতে ২১ জুলাইত দলটোৱে ডিব্ৰুগড়, তিনিচুকীয়া, ধেমাজি, লখিমপুৰ, শিৱসাগৰ, যোৰহাট, চৰাইদেউ, গোলাঘাট, আৰু মাজুলীৰ দল-সংগঠনৰ সৈতে আলোচনাত মিলিত হ’ব।
উল্লেখ্য যে, সমষ্টিৰ সীমা নিৰ্ধাৰণৰ খচৰাৰ বিৰোধিতাৰে সমগ্ৰ অসমতে শেহতীয়াকৈ তীব্ৰ প্ৰতিবাদৰ সৃষ্টি হৈছে। কিন্তু ৰাজ্যজুৰি হোৱা প্ৰতিবাদৰ পিছতো মুখ্যমন্ত্ৰী হিমন্ত বিশ্ব শৰ্মাই এই বিষয়ত ৰাজ্যত কোনো বিৰোধিতা হোৱা নাই বুলিহে দাবী কৰিছে।
