চলিত বৰ্ষৰ ২০ আগষ্ট তাৰিখে পদ্মশ্ৰী ডাঃ নৰেন্দ্ৰ ডাভোলকাৰৰ স্মৃতিত “ৰাষ্ট্ৰীয় বিজ্ঞানমনস্কতা দিৱস” উপলক্ষে ইলোৰা বিজ্ঞান মঞ্চৰ বৃহত্তৰ ঢেকিয়াজুলি শাখাৰ দ্বাৰা শোণিতপুৰ জিলা ভিত্তিত অনুষ্ঠিত ৰচনা প্ৰতিযোগিতাৰ বঁটা বিজয়ীসকলক বঁটা বিতৰণ কৰি আহিছে শাখাটোৱে।
বঁটা বিজয়ী ছাত্ৰ-ছাত্ৰীসকলে অধ্যয়ন কৰা বিদ্যালয়ত উপস্থিত হৈ বঁটা প্ৰদান কৰি অহা ঢেকিয়াজুলি শাখাৰ সদস্যসকলে আজি প্ৰতিযোগিতাত “বিচাৰকৰ দ্বাৰা বিশেষভাৱে নিৰ্বাচিত শ্ৰেষ্ঠতম বঁটা”টি চন্দ্ৰনাথ শৰ্মা উচ্চতৰ মাধ্যমিক বিদ্যালয়ৰ ছাত্ৰ দেৱাশীষ নাথক আৰু প্ৰতিযোগিতাখনৰ “খ” শাখাৰ দ্বিতীয় পুৰস্কাৰটি একেখন বিদ্যালয়ৰে ছাত্ৰী প্ৰিয়ংকা দেৱীক প্ৰদান কৰে।
উক্ত বঁটা প্ৰদান কৰাৰ উদ্দেশ্যে অনুষ্ঠিত চমু সভাখনিত সভাপতিত্ব কৰে বিদ্যালয়খনৰ অধ্যক্ষা, শিক্ষকতাৰ বাবে ৰাষ্ট্ৰীয় বঁটা বিজয়ী মীনাক্ষী গোস্বামীয়ে। ইলোৰা বিজ্ঞান মঞ্চৰ শীৰ্ষ-সংগীতেৰে আৰম্ভ হোৱা সভাখনিৰ আঁত ধৰে মঞ্চৰ বৃহত্তৰ ঢেকিয়াজুলি শাখাৰ সম্পাদক প্ৰজিত নাথে আৰু উদ্দেশ্য ব্যাখ্যা কৰে শাখাৰ সহকাৰী সম্পাদক কাবেৰী ডেকা নাথে।
উল্লেখযোগ্য যে আজিৰ অনুষ্ঠানটিত উপস্থিত থাকে ইলোৰা বিজ্ঞান মঞ্চৰ দৰং জিলা শাখা সমিতিৰ সম্পাদক তথা বৃহত্তৰ ঢেকিয়াজুলি শাখাৰ পথ-প্ৰদৰ্শক, মঙলদৈ নিৱাসী অনুবাদিকা ৰুমা অধিকাৰী কুমাৰ। অনুষ্ঠানটিত তেওঁ ছাত্ৰ-ছাত্ৰীৰ লগতে সকলোৰে বাবে অতিকৈ গুৰুত্বপূৰ্ণ তথা উপযোগী, বিজ্ঞানমনস্কতাৰ বিভিন্ন দিশ সামৰি এক চমু যদিও অত্যন্ত সাৰুৱা বক্তব্য প্ৰদান কৰে।
উক্ত সভাৰ অন্যতম কাৰ্যসূচী হিচাপে বিদ্যালয়ৰ অধ্যক্ষাগৰাকীলৈ ৰাষ্ট্ৰীয় বঁটা লাভ কৰাৰ বাবে অভিনন্দনসূচক ভাৱে ৰুমা অধিকাৰী কুমাৰৰ দ্বাৰা ৰচিত “অভিনেত্ৰী ইত্যাদি গল্প” শীৰ্ষক কিতাপখনি শাখাৰ ফালৰ পৰা আগবঢ়োৱা হয়।
তদুপৰি বিদ্যালয়খনৰ পুথিভঁৰাললৈ উপহাৰ হিচাপে বিশিষ্ট চিন্তাবিদ তথা লেখক ড° শিৱনাথ বৰ্মনৰ দ্বাৰা সম্পাদিত তথা ইলোৰা বিজ্ঞান মঞ্চৰ দ্বাৰা প্ৰকাশিত “অসমত বিজ্ঞানমনস্কতাৰ বাটকটীয়াঃ হেমচন্দ্ৰ বৰুৱা” আৰু “ডাঃ নৰেন্দ্ৰ ডাভোলকাৰৰ দুটা প্ৰবন্ধঃ বিজ্ঞানমনস্কতা” শীৰ্ষক দুখনি কিতাপ শাখাৰ কৰ্ম-কৰ্তাসকলে আগবঢ়ায়।
ইলোৰা বিজ্ঞান মঞ্চৰ বৃহত্তৰ ঢেকিয়াজুলি শাখাৰ সভাপতি গণশিল্পী ৰত্নেশ্বৰ ৰাভাই শলাগৰ শৰাই আগবঢ়োৱাৰ লগতে এটি প্ৰগতিশীল গীত পৰিৱেশন কৰি উপস্থিতসকলক মোহিত কৰে। সভাপতিৰ সাৰুৱা মন্তব্যৰে অন্ত পৰা অনুষ্ঠানটিত উপস্থিত থাকে শাখাৰ সাংস্কৃতিক বিভাগৰ সম্পাদক পম্পী শইকীয়াৰ লগতে আন আন সদস্য তথা বিদ্যালয়খনৰ সমূহ শিক্ষক-কৰ্মচাৰী।
উল্লেখযোগ্য যে এই ৰচনা প্ৰতিযোগিতাখনিত ব্যক্তিগত খণ্ডৰ শিক্ষানুষ্ঠানৰ তুলনাত চৰকাৰী খণ্ডৰ শিক্ষানুষ্ঠানৰ এনে চমকপ্ৰদ সাফল্য যথেষ্ট আশাব্যঞ্জক বুলি মন্তব্য কৰে অনুষ্ঠানটিত উপস্থিত থকা বিভিন্নজনে।