বিধেয়কৰ মুখঠেকেচাৰ পিছতে উত্তৰ-পূবক লৈ মন্তব্য ড’নাৰ মন্ত্ৰীৰ
নাগৰিকত্ব বিধেয়ক গৃহীতকৰণ দূৰ, ৰাজ্যসভাত উত্থাপনেই কৰিব নোৱাৰি ভীষণ অস্বস্তিত পৰা বিজেপি চৰকাৰৰ ড’নাৰ মন্ত্ৰী জিতেন্দ্ৰ সিঙে বৃহস্পতিবাৰে পুনৰ দোহাৰিছে উত্তৰ-পূবৰ উন্নয়নৰ কথা।
বিজেপিয়ে বহু চেষ্টা কৰা বিধেয়কখনে উত্তৰ-পূৰ্বাঞ্চলৰ খিলঞ্জীয়াৰ মাজত বনজুইসদৃশ প্ৰতিবাদৰ সৃষ্টি কৰাৰ বিপৰীতে মোদী চৰকাৰৰ প্ৰচেষ্টাত অঞ্চলটোত শান্তি আৰু উন্নয়ন হোৱা বুলি দাবী কৰিছে মন্ত্ৰী সিঙে।
“প্ৰধান মন্ত্ৰী নৰেন্দ্ৰ মোদীয়ে যোৱা চাৰি বছৰত নিজেই উত্তৰ-পূবৰ বিভিন্ন ঠাইলৈ গৈ উন্নয়নমূলক প্ৰকল্পসমূহৰ অগ্ৰগতিৰ বুজ লৈছে। নৰেন্দ্ৰ মোদী চৰকাৰে উত্তৰ-পূবৰ ৰাজ্যসমূহৰ উন্নয়নৰ বাবে বিভিন্ন উদ্যোগ গ্ৰহণ কৰিছে। এই প্ৰচেষ্টাই উত্তৰ-পূবক শান্তি আৰু উন্নয়নৰ দিশলৈ লৈ গৈছে,” সিঙৰ মন্তব্য।
লগতে পঢ়ক– স্বাধীন মিজোৰাম আদৰণিৰে প্ৰতিবাদী জনতাত বিলীন ৫ বাৰৰ মুখ্য মন্ত্ৰী
মণিপুৰৰ বিজেপি চৰকাৰে গ্ৰহণ কৰা “Hill Area Development Programme”ৰ উল্লেখ কৰি তেওঁ কয় যে ভাৰতৰ অধিক উন্নত ৰাজ্যসমূহৰ সমান পৰ্য্যায়লৈ নিয়াতো মোদী চৰকাৰৰ অগ্ৰাধিকাৰ।
সদৌ মণিপুৰ দলিত উন্নয়ন সংস্থাৰ এটি প্ৰতিনিধি দলৰ সৈতে বৈঠকত এইসমূহ মন্তব্য কৰিছে ড’নাৰ মন্ত্ৰীজনে।
সংগঠনটোৰ এখন স্মাৰকপত্ৰও গ্ৰহণ কৰে মন্ত্ৰী সিঙে।