বিশ্বনাথঘাট পানপুৰ মথাউৰিত এজাক বৰষুণতে খহনীয়া; নিৰ্মীয়মান অৱস্থাতে খহিল কাৰ্পেট
বিশ্বনাথঘাট পানপুৰ মথাউৰিত এজাক বৰষুণতে আৰম্ভ হৈছে খহনীয়া। ঠিকাদাৰে অতি নিম্ন মানৰ কাম কৰাৰ ফলতে এতিয়া তীব্ৰ ভাবুকি আহিছে বিশ্বনাথ চতিয়া তথা জামুগুৰিহাটৰ ৰক্ষা কৱচ এই বিশ্বনাথঘাট পাণপুৰ মথাউৰিলৈ।
১৫ কোটি টকাৰ আঁচনিৰ জিঅ’ বেগৰ কাম আৰম্ভ হৈ থকাৰ সময়তে সামান্য এজাক বৰষুণতে খহি পৰিল কাৰ্পেট।
উক্ত অঞ্চলত ব্ৰহ্মপুত্ৰ নদীয়ে সৃষ্টি কৰিছে তীব্ৰ খহনীয়া। যাৰ বাবে এতিয়া ১৫ কোটি টকা পানীত পৰাৰ উপক্ৰম হৈছে।
স্থানীয় লোকৰ অভিযোগ যে আচঁনিৰ মতে সঠিকভাবে কাম নকৰাত আৰু লেহেমীয়া গতিৰে কৰা কামৰ বাবেই গৰাখহনীয়াই আকৌ তীব্র ৰপ ধাৰণ কৰিছে।
তদুপৰি, কিছু অঞ্চলত এতিয়াও জিঅ’ বেগৰ কাম আৰম্ভ হোৱাই নাই। এতিয়া যদি ঠিকাদাৰ আৰু বিভাগীয় কৰ্তৃপক্ষই এই জিঅ’ বেগৰ কাম খৰতকীয়া নকৰে তেনেহ’লে অনাগত বাৰিষাত সম্পূৰ্ণ বুৰ যাব বিশ্বনাথ আৰু চতিয়াৰ শতাধিক গাঁও।
উল্লেখ্য যে ২০১২ চনত এই অঞ্চলতে বানে সংহাৰী ৰূপ ধাৰণ কৰি প্ৰায় এশতকৈ অধিক গাওঁ বুৰাই পেলাইছিল। বহু লোকে মৃত্যুক সাৱটিবলগীয়া হোৱাৰ উপৰিও অঞ্চলবাসীয়ে নিজৰ ঘৰ দুৱাৰ হেৰুৱাব লগীয়া হৈছিল।
সেয়েহে, যাতে পুনৰ এই অঞ্চলত এনে ঘটনাৰ পুনৰাবৃত্তি নহয়, তাৰ বাবে ব্যৱস্থা গ্ৰহণ কৰিবলৈ চৰকাৰক স্থানীয় ৰাইজ তথা আমছুয়ে দাবী জনাইছে।