শুকুৰবাৰে ৰাজীৱ ভৱনত এক সংবাদমেল আয়োজন কৰি প্ৰাক্তন সাংসদ দ্বিজেন শৰ্মাই গুৱাহাটী পৌৰ নিগমৰ নিৰ্বাচন সম্পৰ্কত সৰ্বদলীয় সভা আহ্বান কৰিবলৈ দাবী জনায়।
ৰাজ্যিক নিৰ্বাচন আয়োগ,ৰাজ্য চৰকাৰ আৰু পৌৰ নিগম কৰ্তৃপক্ষৰ সুকীয়া সুকীয়া স্থিতিৰ অন্তৰালত কি ৰহস্য আছে বুলিও প্ৰশ্ন সাংসদগৰাকীয়ে।
লগতে এৰিয়া সভাৰ নিৰ্বাচন সম্পৰ্কত চৰকাৰ নিমাত কিয় বুলিও প্ৰশ্ন কৰে শৰ্মাই।
শেষৰবাৰলৈ গুৱাহাটী পৌৰ নিগমৰ নিৰ্বাচন ২০১০ চনত অনুষ্ঠিত হৈছিল আৰু ২০১৮ চনৰ ৩১ জুলাই নিৰ্বাচিত স্থানীয় চৰকাৰখনৰ কাৰ্যকালৰ অন্ত পৰিল।
২০১৮ চনৰ পৰা ২০২১ চনৰ শেষলৈকে বিজেপি চৰকাৰে পৌৰ নিগমৰ নিৰ্বাচন অনুষ্ঠিত নকৰাকৈ থাকিল। ক্ষমতাৰ বিকেন্দ্রীকৰণৰ পৰিবৰ্তে ক্ষমতা কুক্ষগত কৰাৰ স্বাৰ্থতে এই সাংবিধানিক বিধি-ব্যৱস্থা নস্যাৎ ক’ৰা হ’ল নেকি?
স্থানীয় চৰকাৰ বা পৌৰ নিগমপৌৰ সভাৰ বাবে আইন প্রণয়ন কৰা, সংশোধন কৰাৰ দায়িত্ব ৰাজ্য চৰকাৰৰ আৰু ৱাৰ্ড-ডিলিমিটেন, ভোটাৰ তালিকা প্রস্তুত আৰু নির্বাচন পৰিচালনাৰ দায়িত্ব ৰাজ্যিক নির্বাচন আয়োগৰ।
কিন্তু গুৱাহাটীৰ পৌৰ নিগমৰ নির্বাচন সন্দৰ্ভত ৰাজ্য চৰকাৰ আৰু ৰাজ্যিক নির্বাচন আয়োগৰ স্থিতিৰ কোনো মিল নাই।
নির্বাচন কেতিয়া হ’ব, কিমানটা ৱাৰ্ডত এইবাৰ হ’ব, সেইবোৰ পাকে প্ৰকাৰে ৰাজহুৱা কৰি আছে, কিন্তু ৰাজ্য চৰকাৰে আৰু এই ক্ষেত্র নির্বাচন আযোগ সম্পূর্ণ মৌন।
একাংশ সংবাদ মাধ্যমে চৰকাৰী সূত্ৰৰ উদ্ধৃতি দি বাতৰি প্রকাশ কৰিছে যে গুৱাহাটী পৌৰ নিগমৰ বাবে এইবাৰ ৫০ টা ৱাৰ্ডত নির্বাচন হ’ব।
ইফালে পৌৰ নিগমৰ উৎসৰ খবৰ মতে এইবাৰ ৫৪ টা ৱাৰ্ডত নিৰ্বাচন পতাৰ মানসেৰে ডিলিমিটেচন জোন প্রস্তুত কৰি ৰাজ্য চৰকাৰৰ সন্নিবিষ্ট বিভাগলৈ ইতিমধ্যে প্ৰেৰণ কৰিছে। এতিয়া প্ৰশ্ন হয়— সঁচা কোনটো?
ইয়াৰ বিপৰীতে আকৌ ৰাজ্যিক নির্বাচন আয়ুক্তই যোৱা মাহত (নৱেম্বৰ) বাতৰি কাকতত ৰাজহুৱা বিজ্ঞাপন দি গুৱাহাটী পৌৰ নিগম নিৰ্বাচনৰ বাবে বাৰ্ড ভিত্তিত ভোটাৰ তালিকা প্রস্তুত, সংশোধনৰ বাবে ৩১ টা ৱাৰ্ডত ৩১ গৰাকী পঞ্জীয়ন বিষয়া নিযুক্তি দিছে বুলি প্ৰকাশ কৰিছিল।
আপাত দৃষ্টিত ইয়াৰ পৰা বুজা যায় যে নির্বাচন আয়োগে ৩১ টা বাৰ্ডৰ বাবে নির্বাচনী কুচকাৱাজ আৰম্ভ কৰিছে।
ৰাজ্যিক নিৰ্বাচন আয়োগ, চৰকাৰে এতিয়াও স্পষ্ট কৰা নাই ‘ এৰিয়া সভাৰ নিৰ্বাচন হ’বনে নহয়।
কংগ্ৰেছ দলে নিম্নোক্ত বিষয় সমূহত ৰাজ্য চৰকাৰৰ স্পষ্ট উত্তৰ দাবী কৰিছে –
১) নিগম, নিকায় সমূহৰ নিৰ্বাচন পৰিচালনাৰ বাবে এই পর্যন্ত ৰাজ্য চৰকাৰে ৰাজ্যিক নির্বাচন আয়োগক কিমান টকা মোকলাই দিছে?
২)“জৱাহৰলাল নেহৰু নেছনেল আৰবান ৰিনিউবেল মিচন”ৰ পুঁজি লাভ কৰাৰ পূর্বে কেন্দ্রীয় চৰকাৰৰ নগৰ নগৰ উন্নয়ন বিভাগ, ৰাজ্য চৰকাৰৰ গুৱাহাটী উন্নয়ন বিভাগ আৰু গুৱাহাটী পৌৰ নিগমৰ মাজত সম্পন্ন চুক্তি মতে ৰাজ্য চৰকাৰে স্থানীয় চৰকাৰ (পৌৰ নিগম) এলেকাৰ চৰকাৰী বিভাগৰ সংমণ্ডলসমূহসহ গুৱাহাটী পৌৰ নিগমলৈ হস্তান্তৰ কৰিলেনে? এই সম্পৰ্কত ৰাজপত্রিত জাননী জাৰি হ’লনে?
৩)গুৱাহাটী স্মার্ট-চিটি প্রকল্পত গুৱাহাটী পৌৰ নিগমৰ নিৰ্বাচিত প্রতিনিধি, আয়ুক্ত, বিষয়া-কৰ্মচাৰীৰ অস্তিত্ব নাই কিয়?
8) গুৱাহাটী উন্নয়নৰ নামত অহা শ শ কোটি টকা মেয়ৰ, কাউন্সিলৰ, নিগমৰ বিষয়া-কৰ্মচাৰীক জৰিত নকৰাকৈ হৰলুকি কৰাৰ উপযুক্ত তদন্ত কৰিবলৈ মুখ্যমন্ত্রী তথা ৰাজ্য চৰকাৰে সাহস দেখুৱাব নে?
৫)গুৱাহাটী উন্নয়নৰ নামত বিগত ২০ বছৰে খৰচ হোৱা ধনৰ পৰিমাণ আঁচনি সহকাৰে উল্লেখ কৰি অসম চৰকাৰে এখন শ্বেতপত্র প্রকাশ কৰক।
গুৱাহাটী পৌৰ নিগমৰ নির্বাচন সম্পৰ্কত ৰাজ্যিক নির্বাচন আয়োগে তাৎক্ষণিকভাবে এখন সর্বদলীয় সভা অনুষ্ঠিত কৰি সকলো বিষয় পৰিষ্কাৰ কৰিবলৈ অসম প্ৰদেশ কংগ্ৰেছে দাবী জনায়।