অবৈধ অৰুণাচলী সুৰাৰ বিৰুদ্ধে কঠোৰ অভিযান অব্যাহত ৰাখিছে আবকাৰী বিভাগে। বৃহস্পতিবাৰে চৰাইদেউ জিলাত অভিযান চলাই এক্সাইজ ইনটেলিজেন্স ব্যুৰ’ৰ সহযোগত স্থানীয় আবকাৰী বিভাগে ৯০০ কেচৰো অধিক পৰিমাণৰ অৰুণাচলী সুৰা জব্দ কৰিবলৈ সমৰ্থ হয়।
শিৱসাগৰৰ আবকাৰী অধীক্ষকৰ নিৰ্দেশমৰ্মে শিৱসাগৰ সদৰৰ লগতে চৰাইদেউ জিলাৰ চৰাইদেউ আৰু সাপেখাতীত চলোৱা অভিযানকালত অৰুণাচলত প্ৰস্তুত কৰা ৯০০ কেচৰো অধিক পৰিমাণৰ মেকডুৱেল চেলিব্ৰেশ্যন ৰাম কঢ়িয়াই নি থকা অৱস্থাত AS01 LC 8788 নম্বৰৰ এখন ট্ৰাক জব্দ কৰে।
চৰাইদেউ জিলাৰ চেপন তিনিআলিৰ নাতিদূৰৈত ট্ৰাকখন জব্দ কৰাৰ লগতে চালকজনকো কৰায়ত্ত কৰিবলৈ সমৰ্থ হয় অভিযানকাৰী দলটো। ধৃত চালকজনক সোণাৰিৰ সত্ৰ ন্যায়াধীশৰ আদালতত হাজিৰ কৰোৱা হ’ব বুলি জানিব পৰা গৈছে।
আনহাতে, গোলাঘাট জিলাৰ আবকাৰী বিভাগে এক্সাইজ ইনটেলিজেন্স ব্যুৰ’ৰ সহযোগত সাৰ পৰিবহনকাৰী বাহনত লুকুৱাই নিয়া ২৬০ কাৰ্টন অফিচাৰ্চ চইচ ব্লু নামৰ অৰুনাচলত নিৰ্মিত বিলাতী সুৰা জব্দ কৰে।
জব্দ কৰা সুৰা পৰিবাহী বাহনৰ বিৰুদ্ধে অসম আবকাৰী আইন অনুসৰি কঠোৰ ব্যৱস্থা গ্ৰহণ কৰিবলৈ আবকাৰী আয়ুক্তই নিৰ্দেশ দিছে।
উল্লেখ্য যে, অক্টোবৰ মাহত আবকাৰী বিভাগে সংগ্ৰহ কৰা ৰাজহৰ পৰিমাণ হৈছে প্ৰায় ২১৫ কোটি টকা। এয়া বৰ্তমানলৈ সৰ্বাধিক বুলি জনাইছে আবকাৰী বিভাগৰ এটি সূত্ৰই।
চৰকাৰী তথ্য অনুযায়ী বিগত বৰ্ষত অক্টোবৰ মাহত আবকাৰী বিভাগে সংগ্ৰহ কৰা ৰাজহৰ পৰিমাণ আছিল মাত্ৰ ১২৩ কোটি টকা। একেদৰে বিগত বিত্তীয় বৰ্ষৰ মুঠ ৰাজহ ৯২৪ কোটি টকাৰ বিপৰীতে এইবাৰ অক্টোবৰ মাহলৈকে বিভাগটোৱে সংগ্ৰহ কৰা ৰাজহৰ পৰিমাণ হৈছে ৯৭০ কোটি টকা।
তাৎপৰ্যপূৰ্ণ কথা এয়ে যে, ২০১৬ চনত পৰিমল শুক্লবৈদ্যই বিভাগটোৰ দায়িত্ব গ্ৰহণ কৰাৰ পিছৰে পৰা বিভাগটোৰ আমূল সংস্কাৰ সাধান হোৱাৰ লগতে ৰাজহ সংগ্ৰহৰ পৰিমাণো পূৰ্বতকৈ কেবাগুণে বৃদ্ধি পাইছে।
এই সময়ছোৱাত বিভাগটোত দীৰ্ঘদিন ধৰি চলি অহা কমিছনৰাজ বন্ধ হোৱাৰ লগতে অবৈধ সুৰাৰ বিৰুদ্ধেও অভিযান তীব্ৰতকৈও তীব্ৰতৰ হোৱা পৰিলক্ষিত হৈছে।
উদাহৰণ হিচাপে যোৱা দুৰ্গা পূজাৰ সময়ত গুৱাহাটী মহানগৰী আৰু ইয়াৰ সমীপৱৰ্তী অঞ্চলত চলি থকা কেবাটাও অবৈধ সুৰা প্ৰস্তুতকৰা ফেক্টৰী আৰু গুদামত অভিযান চলাই সেয়া বন্ধ কৰিবলৈ সমৰ্থ হৈছে আবকাৰী বিভাগ।
বিভাগটোৰ এনে কাৰ্যক লৈ সন্তুষ্টি প্ৰকাশ কৰাৰ লগতে কোনো কাৰণতে যাতে দুৰ্নীতি আৰু অবৈধ কাৰ্য-কলাপক প্ৰশ্ৰয় দিয়া নহয় তাৰ বাবেও বিষয়া-কৰ্মচাৰীসকলক সকীয়াই দিছে মন্ত্ৰী শুক্লবৈদ্যই।
বিশেষকৈ দিপাৱলীৰ সময়ত ৰাজ্যখনৰ ক’তো যাতে অবৈধ সুৰাৰ সৰবৰাহ আৰু ক্ৰয়-বিক্ৰয় চলিব নোৱাৰে সেয়াও নিশ্চিত কৰিবলৈ নিৰ্দেশ প্ৰদান কৰিছে মন্ত্ৰীগৰাকীয়ে।