গুৱাহাটীত ফিল্মফেয়াৰ পাতি চৰকাৰে কোটি কোটি টকা খৰচ কৰাৰ সময়তে অৱহেলিত হৈ আছে পৰ্যটনৰ প্ৰচুৰ সম্ভাৱনা থকা অসমৰ বহুবোৰ ঐতিহাসিক পৰ্যটনস্থলী।
ইয়াৰ ভিতৰত আন এক অন্যতম পৰ্যটনস্থলী চাপানালাৰ চম্পাৱতী জলপ্ৰপাত এতিয়া চৰকাৰৰ চূড়ান্ত অৱহেলাৰ বাবে লাহে-লাহে যেন ম্লান হ’বলৈ ধৰিছে ইয়াৰ যাউতিযুগীয়া গৰিমা।
নগাঁও চহৰৰ পৰা প্ৰায় ২৫ কিলোমিটাৰ নিলগৰ চাপানালাৰ সমীপৰ লেমলেমী পাহাৰত অৱস্থিত অতি মনোৰম প্ৰাকৃতিক পৰিবেশত থকা এই জলপ্ৰপাতটো চাবলৈ বছৰৰ নৱেম্বৰ মাহৰ পৰা ফেব্ৰুৱাৰী মাহ লৈকে হাজাৰ হাজাৰ লোকৰ সমাগম হয়।
বৃহত্তৰ অঞ্চলটোৰ আৰ্থ-সামাজিক দিশত প্ৰভাৱ পেলোৱা গ্ৰাম্য পৰ্যটনৰ অতি গুৰুত্বপূৰ্ণ এই পৰ্যটনস্থলী উন্নয়নৰ ক্ষেত্ৰত বৰ্তমান পৰ্যন্ত বিশেষ গুৰুত্ব প্ৰদান কৰা দেখিবলৈ পোৱা নাই ৰাজ্যৰ পৰ্যটন বিভাগে।
স্থানীয় ৰাইজে বাৰে বাৰে চৰকাৰক এই বিষয়ে অৱগত কৰি আহিছে যদিও আজি পৰ্যন্ত কোনো এখন চৰকাৰ তথা স্থানীয় বিধায়ক প্ৰফুল্ল কুমাৰ মহন্তই গুৰুত্ব প্ৰদান নকৰাৰ অভিযোগ উত্থাপন হৈছে।
যিটো সময়ত চুবুৰীয়া ৰাজ্য মেঘালয়ৰ পৰ্যটন বিভাগে পৰ্যটকক আকৰ্ষিত কৰিবলৈ পৰ্যটনস্থলী সমূহ অধিক আকৰ্ষণীয় কৰিবলৈ বিভিন্ন পন্থা অৱলম্বন কৰিছে তাৰ বিপৰীতে অসম চৰকাৰৰ পৰ্যটন বিভাগে কেৱল মাত্ৰ ব্যয়বহুল ফিল্মফেয়াৰৰ দৰে অনুষ্ঠানতে সীমাবদ্ধ হৈ থকা বুলি বিভিন্নজনে সমালোচনা কৰিছে।
উল্লেখ্য যে, চাপানালাৰ চম্পাৱতী জলপ্ৰপাত দৰ্শন কৰিবলৈ বনভোজ থলিৰ পৰা অতি দুৰ্গম পথৰে পৰ্যটক সকলে প্ৰায় ৩ কিলোমিটাৰ পদ পথৰে গ’লেহে এই মনোৰম জলপ্ৰপাতটো দৰ্শন কৰিবলৈ পায় যদিও প্ৰতিবছৰে এই স্থানলৈ বহু দেশী-বিদেশী পৰ্যটকৰ আগমন ঘটে।
এই ক্ষেত্ৰত ৰাজ্যৰ পৰ্যটন বিভাগে জলপ্ৰপাতটোৰ উন্নয়নৰ দিশত গুৰুত্ব প্ৰদান কৰিলে প্ৰচুৰ ৰাজহ সংগ্ৰহৰ সুবিধা লাভ কৰিব।
আনহাতে মনোৰম চম্পাৱতী জলপ্ৰপাত তথা পৰ্যটনৰ বিবিধ সম্ভাৰেৰে ভৰপূৰ চাপানালালৈ যোৱা গড়মুৰৰ পৰা চাপানাল সংযোগী মূল পথটোৰ দুৰবস্থাইও এতিয়া দুৰ্ভোগ ভোগাইছে পৰ্যটকৰ লগতে ৰাইজক।
বহুবাৰ আবেদন-নিবেদন কৰি কোনো সুফল নোপোৱা স্থানীয় ৰাইজে এতিয়া উপায়ন্তৰ হৈ সংবাদ মাধ্যমৰ জৰিয়তে প্ৰচুৰ সম্ভাৱনা থকা চাপানালাক সুন্দৰ সুবিধাজনক পৰ্যটনস্থলী ৰূপে গঢ় দিয়াৰ লগতে চাপানালালৈ যোৱা মূল পথচোৱাৰো উপযুক্ত মেৰামতি কৰিবলৈ দাবী জনাইছে শাসনাধিষ্ঠ চৰকাৰখনক।
