নাৰী স্বতন্ত্ৰতা, সমতা, অধিকাৰৰ নীতি সৰোগত কৰি সমগ্ৰ বিশ্বই মঙ্গলবাৰে আন্তঃৰাষ্ট্ৰীয় মহিলা দিৱস উদযাপন কৰিলে। দেশৰ দক্ষিণ-পূব ৰে’লৱেৰ চক্ৰধৰপুৰ (চিকেপি) বিভাগে এক ব্যতিক্ৰমী কাৰ্যসূচীৰে নাৰী দিৱস উদযাপন কৰে।
নাৰী দিৱস উপলক্ষে মঙলবাৰে দক্ষিণ-পূব ৰে’লৱেৰ চক্ৰধৰপুৰ (চিকেপি) বিভাগৰ এখন এক্সপ্ৰেছ ৰে’ল কেৱল মহিলা কৰ্মচাৰী সকলে পৰিচালনা কৰে।
দানাপুৰৰ পৰা দূৰ্গলৈ যোৱা ১৩২৮৮ দক্ষিণ বিহাৰ এক্সপ্ৰেছখন মঙলবাৰে মহিলা দিৱস উপলক্ষে চক্ৰধৰপুৰৰ পৰা ৰাউৰকেলা ষ্টেচনৰ মাজত মহিলা বিশেষ ৰে’ল হিচাপে পৰিচালনা কৰা হয়।
ৰে’লখন পৰিচালনা কৰা লোকো পাইলট, গাৰ্ড, টিটিই, নিৰাপত্তাকৰ্মীকে ধৰি সকলো কৰ্মচাৰীৰ ৰূপত কেৱল মহিলা কৰ্মচাৰী নিয়োগ কৰি নাৰী দিৱস উদযাপন কৰে বিভাগটোৱে।
বিভাগীয় ৰে’ল ব্যৱস্থাপক বিজয় কুমাৰ চাহুৱে চক্ৰধৰপুৰত মহিলা বিশেষ ৰে’লখন ফ্লেগ অফ কৰে। তেওঁৰ সৈতে উপস্থিত থাকে দক্ষিণ-পূব ৰে’লৱেৰ মহিলা কল্যাণ সংস্থাৰ অধ্যক্ষ অঞ্জুলা চাহু।
দক্ষিণ-পূব ৰে’লৱেই অৱশ্যে পূৰ্বেও নাৰী দিৱসৰ দিনটো এনেদৰেই পালন কৰি আহিছে যদিও প্ৰথম বাৰৰ বাবে এইবাৰ মহিলা চালকক যে এক্সপ্ৰেছ ৰে’ল চলাবলৈ দায়িত্ব দিয়া হৈছিল।
তদুপৰি ষ্টেচনৰ লগতে ৰে’লখনৰ সুৰক্ষাৰ দায়িত্বত থকা ৰে’ল সুৰক্ষা বাহিনীৰ (আৰপিএফ) ক্ষেত্ৰতো কেৱল মহিলা বিষয়াসকলকেই দায়িত্ব অৰ্পণ কৰে দক্ষিণ-পূব ৰে’লৱেই।
