বিটিএডিত ৰাজ্যপালৰ শাসন প্ৰৱৰ্ত্তনৰ সময়ছোৱাতে স্থগিত বিটিএডিৰ নিৰ্বাচনক কেন্দ্ৰ কৰি বড়োভূমিত বিপিএফ আৰু ইউপিপিএল দলৰ মাজত চলিছে এক অঘোঁষিত শীতল যুঁজ ৷
আনকি উভয় দলৰ মাজত ছচিয়েল মিডিয়াত চলা আকৰ্ষণীয় যুজঁখনৰ মাজতে শেহতীয়াকৈ ফেচবুক পেজত অচিনাক্ত লোকে বিপিএফৰ জ্যেষ্ঠ নেত্ৰী তথা সমাজ কল্যাণ মন্ত্ৰী প্ৰমিলা ৰাণী ব্ৰহ্মক দলৰ মজিয়াত ভাৱমূৰ্তি হেয় প্ৰতিপন্ন কৰিবলৈ প্ৰয়াস চলাইছে ৷
অশুভ শক্তিটোৱে ফেচবুকৰ ভুৱা প্ৰফাইলত বিপিএফৰ উপ সভানেত্ৰী তথা মন্ত্ৰী প্ৰমিলা ৰাণী ব্ৰহ্মই ইউপিপিএলৰ সমৰ্থক বুলি ৰাইজক ট্ৰেক্টৰৰ প্ৰতীকত ভোট দিবলৈ বড়ো ভাষাৰে দিয়া আহ্বানে জোঁকাৰি বিপিএফ দলত জোকাৰণি তুলিছে ৷
এইক্ষেত্ৰত মন্ত্ৰী প্ৰমিলা ৰাণী ব্ৰক্ষই তেওঁৰ বিৰুদ্ধে ছচিয়েল মিডিয়া যোগে দুষ্ট চক্ৰই অপপ্ৰচাৰ চলোৱা বুলি দেওবাৰে সংবাদমেলযোগে সদৰী কৰি বিষয়টো আৰক্ষীয়ে তদন্ত কৰিলে ওলাই পৰিৱ বুলি ব্যক্ত কৰে।
তেওঁ বিষয়টোক এক সাংঘাতিক অপৰাধ বুলি আঙুলিয়াই দি কয়,‘’মই এজন বিপিএফৰ সক্ৰিয় কৰ্মী ৷গতিকে ইউপিপিএলৰ কোনো দুষ্ট প্ৰবৃত্তিৰ লোকে মোক বিপিএফ দলৰ মজিয়াত ভাৱ মূৰ্তি বিনিষ্ট কৰিবলৈ ষড়যন্ত্ৰ কৰিছে।‘’
যি ব্যক্তিয়ে এনে কাৰ্য সংঘটিত কৰিছে তেওঁলোকক আৰক্ষী প্ৰশাসনে চিনাক্ত কৰি শাস্তি বিহাৰ দাৱী তোলে মন্ত্ৰী প্ৰমিলা ৰাণী ব্ৰহ্মই ৷
তেওঁ লগতে কোভিড-১৯ সন্দৰ্ভত সজাগ আৰু সামাজিক ব্যৱৰ্ধানৰ পৰামৰ্শ দি অসম বংগ সীমান্তবৰ্তী শ্ৰীৰামপুৰেদি আহি থকা প্ৰবাসী আসম বাসীক স্বাস্থ্য পৰীক্ষা কৰোৱাই কোৱাৰেন্টাইন কৰাৰ উপৰি মাৰাত্বক কৰ’না ভাইৰাছকলৈ নিয়োজিত সকলো কৰ্মী বিষয়াসকলক ভালদৰে কাম কৰাৰো আহ্বান জনায়।
ইপিনে, মন্ত্ৰী প্ৰমিলা ৰাণী ব্ৰহ্মৰ বিৰুদ্ধে ফেচবুকৰ ভুৱা একাউন্ট খুলি চলোৱা অসাধু চক্ৰৰ বিৰুদ্ধে বিপিএফৰ মহিলা কোষৰ সভানেত্ৰী আৰু সম্পাদক ক্ৰমে জয়মতী বসুমতাৰী আৰু ৰমা দেৱী ছেত্ৰীয়ে আৰক্ষীক গোচৰ দিয়ে।
তেওঁলোকে কোকৰাঝাৰ সদৰ থানাত তদন্তৰ জৰিয়তে দোষীক কৰায়ত্তৰ দাৱীত ভাৰতীয় দণ্ডবিধি আইনৰ ৬৬/৬৭ আই টি এক্ট ২০০০ মৰ্মে ৫০০/৫০১ ধাৰাত এখন এজাহাৰ দাখিল কৰিছে ৷
