সৰু সংসাৰখনত মাতৃৰ ঠাই নাই। পত্নীয়ে স্পষ্টকৈ ক’লে যে তেওঁ মাকৰ যত্ন ল’ব নোৱাৰে। বাৰে বাৰে তেওঁ শাহুৱেকক নিজৰ পুৰণি ঘৰলৈ উভতি যাবলৈ হেঁচা দিবলৈ ধৰিলে। আনকি শাহুৱেকৰ লগত থাকিব নোৱাৰাৰ কথাও গিৰিয়েকক জনাই দিলে। পত্নীৰ হেঁচাত মানসিকভাৱে বিধ্বস্ত হৈ পৰা এজন যুৱকে চৰম সিদ্ধান্ত গ্ৰহণ কৰিলে। বাসগৃহৰ পৰা জপিয়াই আত্মহত্যা কৰিলে।
সৰ্বভাৰতীয় সংবাদ মাধ্যমৰ সূত্ৰ অনুসৰি এই ঘটনা সংঘটিত হৈছে ফৰিদাবাদত। আৰক্ষীৰ সূত্ৰ অনুসৰি মৃত যুৱকজনৰ নাম যোগেশ কুমাৰ। পেছাত তেওঁ আছিল ৰেডিঅ’লজিষ্ট। নিজ বাসগৃহৰ ১৬ নং মহলাৰ পৰা জপিয়াই তেওঁ আত্মহত্যা কৰে। তেওঁ পৰিয়ালৰ সৈতে গ্ৰেটাৰ ফৰিদাবাদ অঞ্চলত বাস কৰিছিল। সেই বাসগৃহৰ ওপৰৰ পৰাই জপিয়াই আত্মহত্যা কৰে।
মৃত যুৱকজনৰ খুড়াকে থানাত এজাহাৰ দাখিল কৰিছে। তেওঁ যোগেশ কুমাৰৰ পত্নী আৰু পৰিয়ালৰ লোকৰ বিৰুদ্ধে এজাহাৰ দাখিল কৰিছে। মৃত যুৱকজনৰ খুড়াকে অভিযোগ কৰে যে যোগেশৰ পত্নীয়ে প্ৰায়ে তেওঁক বিভিন্ন ধৰণে হাৰাশাস্তি কৰিছিল। আনকি যোগেশৰ মাক সেই ফ্লেটত থকাকলৈও তেওঁৰ সমস্যা হৈছিল। তেওঁ কেইবাবাৰো কৈছিল যে শাহুৱেকে সিহঁতৰ লগত থাকিব নোৱাৰে। পত্নীৰ বাবেই যোগেশ মানসিকভাৱে বিধ্বস্ত হৈ পৰিছিল।
ভূপানী আৰক্ষী থানাত আত্মহত্যাত সহযোগ কৰাৰ অভিযোগত ৫জন লোকৰ বিৰুদ্ধে এজাহাৰ দাখিল কৰিছে আৰক্ষীয়ে। অভিযুক্তৰ ভিতৰত যোগেশৰ পত্নী, তেওঁৰ দুই ভায়েক, শহুৰেক আৰু শাহুৱেক আছে। আৰক্ষীয়ে লগতে জনোৱা মতে, মৃত যুৱকজন প্ৰথমে মধ্যপ্ৰদেশৰ গোৱালিয়ৰৰ বাসিন্দা আছিল। গুৰুগ্ৰামৰ এখন ব্যক্তিগত চিকিৎসালয়ত ৰেডিঅ’থেৰাপিষ্ট হিচাপে কাম কৰিছিল। ৯ বছৰ পূৰ্বে তেওঁৰ বিবাহ হৈছিল নেহা নামৰ যুৱতীগৰাকীৰ সৈতে। তেওঁলোকৰ এটা ছবছৰীয়া সন্তান আছে।
ইয়াৰ পূৰ্বে দম্পতীহালে নয়ডাত বাস কৰিছিল। সেই সময়ত নেহাই ব্যক্তিগত প্ৰতিষ্ঠানত কাম কৰিছিল। যিহেতু স্বামী-স্ত্ৰী দুয়োজনেই কাম কৰি আছিল, সেয়েহে যোগেশে মাকক নিজৰ ঘৰলৈ লৈ আহিছিল পুত্ৰক চোৱা-চিতা কৰিবলৈ। কেইমাহমানৰ আগতে যোগেশে পুত্ৰৰ সৈতে ছেক্টৰ ৮৭ৰ এটা নতুন ফ্লেটলৈ গুচি আহিছিল। কিন্তু নেহা তেওঁৰ লগত নাহিল। পুত্ৰৰ কাৰণে মাকক লৈ আহিছিল। এমাহ আগতে নেহাও এই ফ্লেটটোত থাকিবলৈ আৰম্ভ কৰিছিল।
তেতিয়াৰ পৰাই নেহা আৰু তেওঁৰ ভায়েক যোগেশে তেওঁক মানসিক অত্যাচাৰ কৰিবলৈ ধৰিলে। তেওঁ কেইবাবাৰো কৈছিল যে মাকক এই ফ্লেটত ৰাখিব নোৱাৰে। ইয়াৰ ফলত বহু অশান্তিৰ সৃষ্টি হয়। যোৱা বৃহস্পতিবাৰে নয়দাৰ নেহাৰ ফ্লেটত উপস্থিত হৈ যোগেশ এই বাসগৃহলৈ উভতি আহে। ইয়াৰ পিছতে তেওঁ চৰম পদক্ষেপ ল’লে।
