অহা ৮ ডিচেম্বৰত ঘোষণা কৰা হৈছে ভাৰত বন্ধ।
ফলত উক্ত দিনা স্তব্ধ হৈ পৰিব সমগ্ৰ দেশৰ জনজীৱন।বন্ধ হৈ পৰিব যান-বাহনৰ চলাচল।
বিভিন্ন ৰাজ্যত বন্ধ হৈ পৰিব চৰকাৰী-বেচৰকাৰী কাৰ্যালয়ৰ লগতে ব্যৱসায়িক প্ৰতিষ্ঠান আদি।
এই ভাৰত বন্ধৰ আহ্বান জনাইছে দেশৰ কেইবাটাও কৃষক সংগঠনে।
ভাৰত বন্ধৰ প্ৰতি বহু কেইটা ট্ৰেচ ইউনিয়নেও সমৰ্থন জনাইছে।
তিনিখনকৈ কৃষি আইনৰ বিৰুদ্ধে দেশৰ বিভিন্ন ৰাজ্যৰ হাজাৰ হাজাৰ কৃষকে যোৱা ৯ দিন ধৰি ৰাজধানী চহৰ নতুন দিল্লীত আন্দোলন অব্যাহত ৰাখিছে।
প্ৰতিবাদী কৃষকসকলৰ সৈতে কেন্দ্ৰীয় চৰকাৰে এতিয়ালৈকে চাৰিবাৰকৈ আলোচনাত মিলিত হৈছে যদিও কোনো সমাধান সূত্ৰ এতিয়ালৈকে ওলোৱা নাই।
কাইলৈ অৰ্থাৎ শনিবাৰেও কৃষক সংগঠনৰে চৰকাৰৰ আলোচনা আছে যদিও সেই আলোচনাও যে সফল হব তাৰো কোনো নিশ্চিতি নাই।
এনে পৰিস্থিতিত কৃষক সংগঠনসমূহে ভাৰত বন্ধৰ দৰে কাৰ্যসূচী গ্ৰহণ কৰিবলৈ বাধ্য হৈছে বুলি ভাৰতীয় কিষাণ ইউনিয়নৰ সাধাৰণ সম্পাদক এইছ এছ লাখোৱালে সাংবাদিকৰ আগত প্ৰকাশ কৰিছে।
চৰকাৰে বিতৰ্কিত কৃষি আইন কেইখন প্ৰত্যাহাৰ কৰিবই লাগিব বুলি লাখোৱালে সকিয়াই দিয়ে।
নিখিল ভাৰত কিষাণ সভাৰ সাধাৰণ সম্পাদক হান্নান মোল্লাই কয় যে চৰকাৰে পূঁজিপতিৰ স্বাৰ্থত কৃষি আইন কেইখন কৰিছে।
এই আইনে কৃষকসকলক ভাতে মাৰিব।
সেয়ে এই হঠকাৰী আইন তিনিখনৰ বিৰুদ্ধে দেশৰ কৃষক সমাজে আন্দোলন চলাই যাব বুলি তেওঁ কয়।