সৰ্বানন্দ সোণোৱালৰ নেতৃত্বাধীন মিত্ৰজোঁটৰ চৰকাৰখনে ৰাজ্যৰ কৃষকৰ সুবিধাৰ্থে বিভিন্ন অভিলাষী আচঁনি ৰূপায়ন কৰি আহিছে ।এই অভিলাষী আচঁনিৰ নামত কোটি কোটি টকা ব্যয় কৰি আহিছে !কিন্তু এই আচঁনি সমূহৰ সুফল প্ৰকৃত কৃষক সকলে পাইছে নে ,তাকেলৈ সৰ্বত্ৰে প্ৰশ্ন উথাপন হৈছে ।
কৃষক সকলৰ অভিযোগ মতে চৰকাৰৰ এই অভিলাষী আচঁনিৰ সুফল লাভ কৰিছে ছদ্মবেশী কৃষক সকলে ।শেহতীয়াকৈ মৰিগাঁও জিলা কৃষি বিভাগত সংঘটিত হৈছে বিয়াগোম কেলেংকাৰী।
জিলাখনৰ লাহৰীঘাটত নহৰুৰ কঠিয়া প্ৰকৃত কৃষকৰ পৰিৱৰ্তে মধ্যভোগীৰ পাকঘৰত সোমাইছে ।
জানিব পৰা মতে , লাহৰীঘাটৰ তিনিটা কৃষি উন্নয়ন চক্ৰত কৃষকৰ বাবে ৩৬ কুইন্টল নহৰুৰ কঠিয়া কৃষি বিভাগে যোগান দিছে। ইয়াৰে প্ৰতিটো গাঁও পঞ্চায়তত এক কুইন্টল আৱন্টন দিয়াৰ লগতে তিনিটা কৃষি উন্নয়ন চক্ৰত আৰু ৪ কুইন্টল কৈ নহৰুৰ কঠিয়া আৱন্টন কৰি দিছে।
লাহৰীঘাটৰ তিনিটা কৃষি উন্নয়ন চক্ৰৰ বিষয়া কৰ্মচাৰী সকলে নহৰুৰ কঠিয়া প্ৰকৃত কৃষকৰ মাজত বিতৰণ নকৰি মধ্যভোগী আৰু ছদ্মবেশী কৃষকৰ হাতত তুলি দিছে।যি সময়ত বীজ ক্ৰয় কৰিবলৈ বান খহনীয়াত বিধ্বস্ত কৃষক সকলে ধনৰ অভাৱত হাহাকাৰ কৰিব লগা হৈছে ,সেই সময়ত চৰকাৰে কৃষকৰ বাবে বিনামূলীয়াকৈ যোগান দিয়া নহৰুৰ কঠিয়াই মধ্যভোগীৰ পাকঘৰ শুৱনি কৰিছে।
কৃষি বিভাগৰ বিষয়া কৰ্মচাৰী সকলে প্ৰকৃত কৃষকৰ লগত কোনো যোগাযোগ নাৰাখি পোনে পোনে নহৰুৰ কঠিয়া মধ্যভোগী দালালৰ হাতত তুলি দিছে।
মধ্যভোগী দালাল সকলে নহৰুৰ কঠিয়া বজাৰত বিক্ৰী কৰাৰ লগতে পাকঘৰত সোমাই ,ভূৱা বিতৰণৰ তালিকা প্ৰস্তত কৰি বিতৰণ কৰা বুলি দেখুৱাই আহিছে।
লাহৰীঘাটৰ প্ৰকৃত কৃষক সকলে কৃষি বিভাগৰ কোনো বিষয়া কৰ্মচাৰীক চিনি নাপায়!লাহৰীঘাটৰ বহু কেইগৰাকী প্ৰকৃত কৃষকক লগ ধৰাত জানিব দিয়ে নহৰুৰ কঠিয়া পোৱা দূৰৰ কথা চৰকাৰে যোগান দিয়া বুলি নামেই শুনা নাই।
কৃষক সকলে অভিযোগ কৰা মতে চৰকাৰে ৰূপায়ন কৰি থকা আচঁনি সমূহৰ সুফল কেৱল মধ্যভোগী দালাল সকলেহে লাভ কৰে আৰু প্ৰকৃত কৃষক সকল সদায় বঞ্চিত হৈ আহিছে।
শেহতীয়াকৈ কৃষি বিভাগে যোগান দিয়া বাদামৰ বীজো কৃষক সকলে পোৱা নাই বুলি অভিযোগ উঠিছে ।
এই দৰেই চলিছে মৰিগাঁও জিলাৰ কৃষি বিভাগ।
