মৰিয়নী সমষ্টিৰ কংগ্ৰেছী বিধায়ক ৰূপজ্যোতি কুৰ্মীয়ে কিছু দিন পূৰ্বলৈকে বিজেপি দলত যোগদান কৰিবলৈ ইচ্ছা প্ৰকাশ কৰাৰ পাছত আজি আকস্মিকভাৱে সলনি কৰিছে নিজৰ সিদ্ধান্ত। বিজেপিত হেনো কোনো কাৰণতে যোগদান নকৰে ৰূপজ্যোতি কুৰ্মীয়ে।
উল্লেখযোগ্য যে, যোৱা ৪ জুলাইৰ দিনা সংবাদ মাধ্যমৰ জৰিয়তে গেৰুৱা সাজ পিন্ধাৰ স্পষ্ট ইংগিত দিছিল বিধায়ক ৰূপজ্যোতিয়ে। লগতে বিজেপিলৈ যাবলৈ তেওঁৰ শুভাকাংক্ষীসকলে পৰামৰ্শ আগবঢ়োৱা বুলিও কৈছিল।
নিজৰ এই সিদ্ধান্তৰ ১৫ দিন পাছতে সুৰ সলাই শুকুৰবাৰে মৰিয়নীত সংবাদমেল সম্বোধন কৰি বিধায়কগৰাকীয়ে কয় ‘মই শুভাকাংক্ষী, শিক্ষাবিদ, সমাজ কৰ্মী আৰু ভিন্নজনৰ সৈতে কথা পাতিছো, ২০২১ ত কেতিয়াও বিজেপি চৰকাৰ নাহে। বিজেপি দলৰ অৰ্থনৈতিক অৱস্থা একেবাৰে বেয়া।‘
তদুপৰি, বানপানীৰ পেকেজ হিচাপে কেন্দ্ৰই কেৱল ২৫১ কোটি দিয়াক লৈ ক্ষুদ্ধ বিধায়কগৰাকীয়ে কয় ‘এইবাৰ বানত কেন্দ্ৰই মাত্ৰ ২৫১ কোটি টকা দিলে। আমাক অতি সোনকালে ২০০০ কোটি টকাৰ পেকেজ লাগে। মাত্ৰ ২৫১ কোটি টকা দি কেন্দ্ৰীয় চৰকাৰে অসমবাসী ৰাইজক প্ৰতাৰণা কৰিছে।‘
তাৎপয্যপূৰ্ণভাৱে, কুৰ্মীয়ে কংগ্ৰেছতে থাকি ২০২১ ত কংগ্ৰেছৰ চৰকাৰ গঠন কৰিব বুলিও উক্ত সংবাদমেলত দাবী কৰে।
‘২০২১ ত কংগ্ৰেছ দলৰ লগত থাকি, নেতৃত্ব বহন কৰি কংগ্ৰেছ দলৰ চৰকাৰ আনিবলৈ প্ৰতিশ্ৰুতিবদ্ধ হৈছো’ ৰূপজ্যোতিয়ে কয়।
আনহাতে, তেওঁৰ প্ৰয়াত মাতৃয়ে সপোনত বিজেপিলৈ যাবলৈ বাধা দিছিল বুলি সংবাদমেলত উল্লেখ কৰে বিধায়কগৰাকীয়ে। শুকুৰবাৰে সম্বোধন কৰা সংবাদমেলৰ বেনাৰত ৰূপজ্যোতিয়ে ‘মা তোমাক সহস্ৰ প্ৰণাম’ বুলি লিখিছিল।
ইপিনে, বিজেপিলৈ নোযোৱাৰ আন এক কাৰণ বাখ্যা কৰি কুৰ্মীয়ে কয় ‘চিণ্ডিকেট, সাৰদা, ৰ’জ ভেলী, ৰাজেন গোহাঁইৰ দৰে নাৰী কেলেংকাৰীৰ সৈতে জড়িত লোক বিজেপি দলত আছে। আই পি এলৰ জুৱা খেলা মানুহ বিজেপি দলত আছে গতিকে সেই দললৈ কেতিয়াও যাৱ নোৱাৰি।
তদুপৰি, বিজেপিয়ে নিৰ্বাচনৰ পূৰ্বে দিয়া এটাও প্ৰতিশ্ৰুতি পালন নকৰাটোও বিজেপিলৈ নোযোৱাৰ এক কাৰণ বুলি কুৰ্মীয়ে কয়।
তেওঁ বিজেপিয়ে নিৰ্বাচনৰ পূৰ্বে বহু প্ৰতিশ্ৰুতি দিছিল। টেট শিক্ষকৰ চাকৰি নিয়মীয়াকৰণ কৰিম বুলিও বিজেপিয়ে কৈছিল কিন্তু এতিয়া বিজেপিয়ে টেট শিক্ষকৰ চাকৰি খাবহে বিচাৰিছে বুলি কুৰ্মীয়ে মন্তব্য কৰে।
তাৎপৰ্য্যপূৰ্ণ যে, কুৰ্মী বিজেপিলৈ গ’লে চাহ জনগোষ্ঠীয় নেতা কামাখ্যা প্ৰসাদ তাছা সংকটত পৰিব পাৰে বুলি ভাবিয়ে হিমন্ত বিশ্ব শৰ্মাই কুৰ্মীক বিজেপিলৈ যোৱাৰ গ্ৰীণ চিগনেল প্ৰদান নকৰিলে নেকি নে কামাখ্যা প্ৰসাদ তাছাৰ অনুৰোধ ৰক্ষা কৰি হিমন্তই কুৰ্মীক নিদিলে বিজেপি গমণৰ সেউজ সংকেত!
প্ৰসংগক্ৰমে উল্লেখ কৰিব পাৰি যে, বিজেপিত যোগদানৰ পূৰ্বে মন্ত্ৰীত্বৰ চৰ্ত বান্ধি দিছিল মৰিয়নিৰ বিধায়কগৰাকীয়ে কিন্তু বিজেপিলৈ অহাৰ পূৰ্বে কোনোধৰণৰ চৰ্ত নিৰ্ধাৰণ কৰি আহিব নোৱাৰিব বুলি এক বিশেষ সূত্ৰৰ তথ্যত প্ৰকাশ পাইছিল। ইপিনে কিছুদিন পূৰ্বে ৰাজেন গোহায়ে কুৰ্মীৰ বিজেপিলৈ অহাৰ তীৰ্ব বিৰোধিতাৰে বিষোদগাৰ প্ৰকাশ কৰিছিল।
