দেশৰ এতিয়া মূল্যৱান সামগ্ৰীৰ অন্যতম হৈ পৰিছে বিলাহী। আকাশলঙ্ঘী মূল্যবৃদ্ধিৰ প্ৰকোপত বিলাহী এতিয়া হৈ পৰিছে ৰাজকীয় খাদ্য। সেয়ে খাদ্যৰসিকৰ খাদ্যৰ তালিকাৰ পৰাও প্ৰায় বাদ পৰাৰ দৰেই হৈছে বিলাহী।
বিলাহীৰ অভূতপূৰ্ব মূল্যবৃদ্ধিৰ বাবে শেহতীয়াকৈ দেশত কেইবাটাও ঘটনাৰ খবৰ পোহৰলৈ আহিছিল। ক’ৰবাত যদি বিলাহীৰ চুৰি হৈছে, ক’ৰবাত বিলাহী সুৰক্ষাৰ বাবে নমাব লগা হৈছে গাৰ্ড। আকৌ ক’ৰবাত বিলাহীৰ বাবে সংসাৰেই ভাগিছে।
বিলাহীৰ বৰ্ধিত মূল্যৰ বাবে এইবাৰ মহাৰাষ্ট্ৰৰ এগৰাকী কৃষকে তেওঁৰ খেতিৰ বিলাহী যাতে চুৰি নহয়, তাৰ বাবে বিলাহী খেতি কৰা ফাৰ্মত চিচিটিভি কেমেৰা স্থাপন কৰিবলৈ বাধ্য হৈছে।
শাৰদ ৰাউটে নামৰ খেতিয়কগৰাকীয়ে জানিবলৈ দিয়া মতে, ঔৰংগাবাদৰ পৰা প্ৰায় ২০ কিলোমিটাৰ নিলগৰ শ্বাহপুৰ বঞ্জাৰত আছে তেওঁৰ বিলাহীৰ ফাৰ্ম। ফাৰ্মৰ পৰা ইতিপূৰ্বে চুৰি হোৱাৰ বাবে এতিয়া তেওঁ চিচিটিভি কেমেৰাৰ জৰিয়তে বিলাহীৰ খেতি সুৰক্ষিত কৰিব লগা হৈছে।
ৰাউটেই জানিবলৈ দিয়া মতে তেওঁৰ এই ফাৰ্মখন ৫ একৰ মাটি জুৰি বিস্তৃত হৈ আছে আৰু ইয়াৰে ১.৫ একৰ মাটিত তেওঁ বিলাহীৰ খেতি কৰিছে। এই খেতিৰ পৰা তেওঁ সহজেই ৬-৭ লাখ টকা উপাৰ্জনৰ আশা কৰিছে।
তেওঁ কয় যে, বিলাহী আজিৰ দিনত আটাইতকৈ বেছি চাহিদা থকা পাচলি আৰু সেয়ে কাৰোবাৰ হাতত এই চাহিদাপূৰ্ণ বিলাহী হেৰুওৱাৰ সামৰ্থ্য তেওঁৰ নাই।
“প্ৰায় ১০ দিন পূৰ্বে গংগাপুৰ তালুকত মোৰ ফাৰ্মৰ পৰা ২০-২৫ কিলো বিলাহী চুৰি হৈছিল। এতিয়াও পকিবলগীয়া বাকী থকা বিলাহী সুৰক্ষিত কৰিবলৈ মই ২২ হাজাৰ টকা মূল্যৰ চিচিটিভি কেমেৰা স্থাপন কৰিছো।”– ৰাউটেই কয়।
নতুনকৈ স্থাপন কৰা এই চিচিটিভি কেমেৰা সৌৰশক্তি চালিত বাবে ইয়াৰ বিদ্যুৎ যোগানক লৈ চিন্তা কৰিব নালাগে বুলিও ৰাউটেই উল্লেখ কৰে। খেতিৰ বিলাহী সুৰক্ষিত আছে নে নাই, সেয়া এতিয়া যিকোনো স্থানৰ পৰাই মোবাইলত চাব পৰা হ’ব বুলি লগতে মন্তব্য কৰে ৰাউটেই।
লগতে পঢ়কঃ উচ্চতম ন্যায়ালয়ৰ যুক্তিসংগত ৰায়ৰ বাবে অধিক জিলিকি উঠিব নেকি ৰাহুল গান্ধী?
লগতে পঢ়কঃ প্ৰস্তাৱিত পাম খেতিয়ে অসমত মৰুভূমি সৃষ্টি কৰিবঃ ডি ৱাই এফ আই
লগতে পঢ়কঃ চুৰিদাৰ পৰিধান কৰি অহাৰ বাবেই অধ্যাপিকাৰ শ্ৰেণী বৰ্জন কলজীয়া শিক্ষাৰ্থীৰ
