মহা সংকটত ৰাম গোপাল! কাৰাদণ্ডৰ নিৰ্দেশ আদালতৰ; জাৰি জামিনবিহীন গ্ৰেপ্তাৰী পৰোৱানা 

ডাঙৰ বিপদত পৰিছে ৰাম গোপাল বাৰ্মা। চেক বাউন্সৰ গোচৰত মুম্বাইৰ আদালতত দোষী সাব্যস্ত হৈছে চলচ্চিত্ৰ পৰিচালকগৰাকী। সেই গোচৰত মুম্বাইৰ আন্ধেৰীৰ দণ্ডাধীশ আদালতে তেওঁক ৩ মাহৰ কাৰাদণ্ডৰ শাস্তি প্ৰদান কৰিছে।

চেক বাউন্সৰ সৈতে জড়িত গোচৰটো ৭ বছৰ ধৰি চলি আছিল। যোৱা মঙলবাৰে আদালতে এই গোচৰৰ ৰায়দান কৰাৰ কথা ঘোষণা কৰিছিল। কিন্তু সেইদিনা আদালতত উপস্থিত নাছিল ৰাম গোপাল। সেইবাবেই তেওঁক গ্ৰেপ্তাৰৰ বাবে নন-বেইলেবল ৱাৰেণ্ট জাৰি কৰা হৈছে।

এই গোচৰত ৰাম গোপাল বাৰ্মাক ৩.৭২ লাখ টকা ক্ষতিপূৰণ দিবলৈও আদালতে নিৰ্দেশ দিছে।ছবি পৰিচালকগৰাকীয়ে এই ধন অভিযোগকাৰীক দিব লাগিব। যদি অহা তিনিমাহৰ ভিতৰত এই ক্ষতিপূৰণ দিব নোৱাৰে তেন্তে ৰাম গোপাল বাৰ্মাই আৰু তিনিমাহ কাৰাগাৰত কটাব লাগিব।

২০১৮ চনৰ ঘটনা। ৰাম গোপাল বাৰ্মা আৰু শ্ৰী নামৰ কোম্পানী এটাৰ মাজত আৰ্থিক লেনদেনত সমস্যাৰ সৃষ্টি হয়। পৰিচালকগৰাকীৰ বিৰুদ্ধে চেক বাউন্স কৰাৰ অভিযোগ উঠে। তিনিমাহ সময় থকাৰ পিছতো ৰাম গোপালৰ একাউণ্টত নাছিল ৩.৭২ লাখ টকা। ফলত সংস্থাটোৱে পৰিচালকগৰাকীৰ বিৰুদ্ধে এজাহাৰ দাখিল কৰে। ইয়াৰ পিছত কেইবাটাও শুনানি অনুষ্ঠিত হয়।

অৱশ্যে এই গোচৰত ৰাম গোপালে আদালতক সহযোগ কৰা নাছিল বুলি জানিব পৰা গৈছে। কেইবাটাও শুনানিত তেওঁৰ অনুপস্থিতিয়ে বিষয়টো আৰু অধিক জটিল কৰি তোলে।