গৃহ মন্ত্ৰালয়ৰ শেহতীয়া তথ্য অনুসৰি ২০২৪ বৰ্ষত অসমত আত্মহত্যাৰ হাৰ বৃদ্ধি পোৱা পৰিলক্ষিত হৈছে। যোৱা এটা বছৰত ৰাজ্যখনত মুঠ ৩,২০৩ টা আত্মহত্যাৰ ঘটনা পঞ্জীয়ন কৰা হৈছে। ২০২৩ বৰ্ষৰ তুলনাত এই সংখ্যা প্ৰায় পাঁচ শতাংশ অধিক। ২০২৩ চনত অসমত ৩,০৫১ গৰাকী লোকে নিজৰ জীৱন বিসৰ্জন দিছিল যদিও এইবাৰ সেই পৰিসংখ্যা বৃদ্ধি পাইছে যিয়ে সচেতন মহলক চিন্তিত কৰি তুলিছে।
প্ৰতিবেদনখনত উল্লেখ কৰা অনুসৰি পাৰিবাৰিক সমস্যা, প্ৰেমজনিত সংঘাত, দীৰ্ঘদিনীয়া অসুস্থতা আৰু বিবাহ সংক্ৰান্তীয় কাৰণসমূহেই হৈছে আত্মহত্যাৰ মূল কাৰক। এই চৰম সিদ্ধান্ত লোৱা লোকসকলৰ মাজত ডিঙিত ফাঁচ লগাই আত্মহত্যা কৰাৰ প্ৰৱণতা আটাইতকৈ বেছি দেখা গৈছে। বিশেষকৈ সামাজিক আৰু ব্যক্তিগত জীৱনৰ বিভিন্ন জটিলতাই মানুহক এই দিশলৈ ঠেলি দিছে বুলি ধাৰণা কৰা হৈছে।
গৃহ মন্ত্ৰালয়ৰ এই পৰিসংখ্যাই আন এক গুৰুত্বপূৰ্ণ দিশ উন্মোচন কৰিছে। তথ্য অনুসৰি আৰ্থিকভাৱে পিছপৰা শ্ৰেণীৰ লোক আৰু যিসকলৰ শিক্ষাগত অৰ্হতা কম, তেওঁলোকৰ মাজত আত্মহত্যাৰ ঘটনা বেছিকৈ ঘটিছে। আৰ্থিক নাটনি আৰু সঠিক শিক্ষাৰ অভাৱত মানসিক চাপ সহ্য কৰিব নোৱাৰি বহু লোকে এনে চৰম পথ বাছি লৈছে। সমাজত মানসিক স্বাস্থ্যৰ গুৰুত্ব আৰু সজাগতা বৃদ্ধি কৰাটো এতিয়া সময়ৰ আহ্বান হৈ পৰিছে।
