অতি শীঘ্ৰে দুচকীয়া বাহনৰ দাম হ্ৰাস পোৱাৰ সম্ভাৱনা আছে। কিয়নো কেন্দ্ৰীয় চৰকাৰে দুচকীয়া বাহনৰ ক্ষেত্ৰত থকা পূৰ্বৰ জি এছ টিৰ হাৰ হ্ৰাস কৰিব।
জি এছ টিৰ হাৰ হ্ৰাস কৰাৰ সন্দৰ্ভত চৰকাৰে পৰ্যালোচনা কৰি থকাৰ কথা মঙলবাৰে জানিবলৈ দিয়ে বিত্ত মন্ত্ৰী নিৰ্মলাৰমণ সীতাৰমণে।
বিত্ত মন্ত্ৰী গৰাকীয়ে মঙলবাৰে এই সন্দৰ্ভত কয় যে দুচকীয়া বাহনৰ কৰৰ হাৰৰ সন্দৰ্ভত জি এছ টি কাউন্সিলে সিদ্ধান্ত ল’ব।
তেওঁ লগতে কয় যে অটো ইণ্ডাষ্ট্ৰিৰ জি এছ টি হাৰ হ্ৰাস কৰাৰ বাবে উত্থাপন কৰা দাবী সন্দৰ্ভত পৰ্যালোচনা কৰা হ’ব।
জি এছ টি হ্ৰাস কৰাৰ পৰামৰ্শ সন্দৰ্ভত বিত্ত মন্ত্ৰী সীতাৰমণে কয় যে বাস্তৱ ক্ষেত্ৰত এইটো এটা ভাল পৰামৰ্শ, এইটো জি এছ টি কাউন্সিলৰ বৈঠকত উত্থাপন কৰা হ’ব, কিয়নো দুচকীয়া বাহন বিলাসী সামগ্ৰীত নপৰে।
বৰ্তমান দুচকীয়া বাহনৰ জি এছ টি ২৮ শতাংশ।
উল্লেখ্য যে, ক’ৰ’না ভাইৰাছৰ বাবে দেশজুৰি জাৰি কৰা লকডাউনৰ ফলত অটো ইণ্ডাষ্ট্ৰি বৃহৎ লোকচানৰ সন্মুখীন হৈছে। সেয়ে দুচকীয়া বাহনৰ জি এছ টি হাৰ হ্ৰাস কৰি ইয়াৰ চাহিদা বৃদ্ধি কৰাৰ পৰিকল্পনা কৰিছে কেন্দ্ৰীয় চৰকাৰে।