হামাছৰ হাতত ৪৭১ দিন গাজাত বন্দী হৈ থকাৰ পিছত তিনিজন ইজৰাইলী নিজৰ দেশলৈ উভতি আহিল। ১৯ জানুৱাৰীত গাজাত যুদ্ধবিৰতি নিৰ্ধাৰিত সময়তকৈ ৩ ঘণ্টা পিছত কাৰ্যকৰী হয়। এই পৰিবেশত পেলেষ্টাইনী সশস্ত্ৰ সংগঠনে তিনিজন ইজৰাইলী বন্দীক ৰেড ক্ৰছৰ হাতত গতাই দিয়ে।
হামাছৰ এজন জ্যেষ্ঠ বিষয়াই সংবাদ সংস্থাক জনোৱা মতে, ইজৰাইললৈ ঘূৰাই পঠোৱাৰ পূৰ্বে আটাইকেইটা বন্দীক আনুষ্ঠানিকভাৱে গাজা চহৰৰ ৰেড ক্ৰছক গতাই দিয়া হৈছে। ইফালে সেই মুহূৰ্তৰ ভিডিঅ’ টেল আভিভৰ প্ৰতিৰক্ষা মুখ্য কাৰ্যালয়ৰ বাহিৰত এখন বিশাল পৰ্দাত দেখুওৱা হৈছিল। তাত তিনিগৰাকী মহিলা কয়দীক হামাছৰ এখন বাহনত আনি তাৰ পৰা নামি অহা দেখা গৈছে। তাৰ পিছত ৰেড ক্ৰছৰ আন্তঃৰাষ্ট্ৰীয় সমিতিৰ বাহনত উঠে। সেই সময়ত প্ৰতিৰক্ষা মন্ত্ৰালয়ৰ চৌহদত হাজাৰ হাজাৰ ইজৰাইলীয়ে আনন্দত ইজনে সিজনক সাৱটি ধৰিছিল। আনকি বহুতে কান্দিছিলো।
খবৰ অনুসৰি হামাছৰ বন্দীত্বৰ পৰা মুক্তি পোৱা ইজৰাইলী বন্দীসকল হ’ল নোভা মিউজিক ফেষ্টিভেলৰ পৰা অপহৰণ কৰা ৰোমি গ’নেন (২৪) আৰু কিবুটজ কাফাৰ আজাৰ পৰা অপহৰণ কৰা এমিলি ডামাৰী (২৮) আৰু ড’ৰন ষ্টেইনব্ৰেচাৰ (৩১)। ইজৰাইলী বাহিনীয়ে হামাছৰ পৰা মুকলি কৰি দিয়া তিনিজন কয়দীৰ প্ৰাৰম্ভিক শাৰীৰিক পৰীক্ষা কৰিব।
এই সন্দৰ্ভত প্ৰতিৰক্ষা বিভাগে এক বিবৃতি প্ৰকাশ কৰে। ইয়াত কোৱা হৈছে যে, “মুক্তিপ্ৰাপ্ত তিনিজন বন্দী ইজৰাইলৰ ভূখণ্ডলৈ উভতি অহাৰ পিছত ইজৰাইলৰ প্ৰতিৰক্ষা বাহিনী আৰু আই এছ এ বাহিনীৰ বিশেষ দলে তেওঁলোকক এস্কৰ্ট কৰিব। প্ৰাথমিক চিকিৎসা আৰু শাৰীৰিক পৰীক্ষা কৰা হ’ব।”
আনহাতে, ইজৰাইলী বন্দীসকলক মুকলি কৰি দিয়াৰ পিছত ইজৰাইলে পেলেষ্টাইনীসকলক মুকলি কৰি দিয়াৰ প্ৰস্তুতি আৰম্ভ কৰে। ইজৰাইলৰ দখলত থকা পশ্চিম পাৰত পেলেষ্টাইনী বন্দী কঢ়িয়াই অনা কেইবাখনো বাছ ৰখাই থোৱা আছিল। এই প্ৰসংগত হামাছে ঘোষণা কৰে যে ইজৰাইলে ৩ গৰাকী ইজৰাইলীক মুকলি কৰি দিয়াৰ বিনিময়ত ৬৯ গৰাকী মহিলা আৰু ২১ গৰাকী পেলেষ্টাইনী কিশোৰক মুকলি কৰি দিছে। ইফালে যুদ্ধবিৰতি আৰম্ভ হোৱাৰ কিছু সময়ৰ পাছতে সাহায্য সামগ্ৰী কঢ়িয়াই ৬৩০খন ট্ৰাক গাজাত প্ৰৱেশ কৰে।
উল্লেখ্য যে ইজৰাইল আৰু হামাছক পূৰ্বে কাটাৰৰ ডোহাত ৯৬ ঘণ্টা ধৰি দীঘলীয়া আলোচনাৰ অন্তত এই যুদ্ধবিৰতিত সন্মতি দিবলৈ ৰাজী কৰা হৈছিল। এই যুদ্ধবিৰতি প্ৰথম অৱস্থাত ৬ সপ্তাহৰ বাবে কাৰ্যকৰী হ’ব। তাৰ পাছত ১৭ জানুৱাৰীত ইজৰাইলৰ নেতানিয়াহু চৰকাৰে হামাছৰ সৈতে যুদ্ধবিৰতি চুক্তিত অনুমোদন জনায়। সেইদিনা ছয় ঘণ্টাৰো অধিক আলোচনাৰ অন্তত অৱশেষত ইজৰাইলৰ মন্ত্ৰীসভাই যুদ্ধবিৰতিৰ বাবে সন্মতি প্ৰকাশ কৰে। ইফালে কেবিনেট বৈঠকত একাংশ উগ্ৰ সোঁপন্থী মন্ত্ৰীয়ে যুদ্ধবিৰতিৰ বিৰুদ্ধে ভোটদান কৰে। কিন্তু মুঠতে নেতানিয়াহুৰ মন্ত্ৰীসভাৰ ২৪ জন সদস্যই যুদ্ধবিৰতিৰ সপক্ষে ভোটদান কৰে, আৰু ইয়াক অনুমোদন জনোৱা হয়।
মন কৰিবলগীয়া যে হামাছে এতিয়াও গাজাত ৯০ জনতকৈ অধিক ইজৰাইলী বন্দীক আবদ্ধ কৰি ৰাখিছে। অৱশ্যে ইয়াৰে কেইবাজনো লোকৰ মৃত্যু হোৱাৰ আশংকা কৰা হৈছে।
