আজিৰ পৰা ভাৰত আৰু দক্ষিণ আফ্ৰিকাৰ মাজত অনুষ্ঠিত হ’ব ঘৰুৱা ক্ৰিকেট শৃংখলা। আফ্ৰিকাৰ দলটোৱে টি-২০ ছিৰিজেৰে আৰম্ভ কৰিব ভাৰত ভ্ৰমণ।
টি-২০ ছিৰিজৰ প্ৰথমখন মেচ আজি সন্ধিয়া ৭ বজাৰ পৰা ভাৰতৰ অন্যতম আকৰ্ষণীয় ষ্টেডিয়াম ধৰমশালাত অনুষ্ঠিত হ’ব।
ভাৰতীয় দলৰ বাবে আজিৰ এই মেচখন কিছু সুকীয়া। কিয়নো বিৰাট কোহলী নেতৃত্বাধীন টীম ইণ্ডিয়াই ষ্টেডিয়ামত প্ৰৱেশ কৰিব নতুন জাৰ্চিৰে সৈতে।
দীৰ্ঘদিন ধৰি ভাৰতীয় দলৰ সৈতে জড়িত হৈ থকা অপো (OPPO)ৰ পৰিৱৰ্তে নতুন বাইজুচ (BYJU’s)ৰ জাৰ্চি পৰিধান কৰি খেল পথাৰত নামিব।
ভাৰতীয় দলৰ সৈতে চাইনীজ স্মাৰ্ট ফোন নিৰ্মাতা প্ৰতিষ্ঠান অপোৰ চুক্তি সমাপ্ত হোৱাৰ পাছতে ভাৰতীয় ক্ৰিকেট নিয়ন্ত্ৰণ ব’ৰ্ড চমুকৈ বি চি চি আইৰ সৈতে বাংগালুৰুস্থিত লাৰ্নিং এপ বাইজুচে চুক্তি সম্পাদন কৰে।
উল্লেখ্য যে অপোৱে ভাৰতীয় দলৰ সৈতে থকা চুক্তিৰ ম্যাদ আধাতে ভংগ কৰাত বি চি চি আইয়ে যোৱা ২৫ জুলাইত বাইজুচৰ সৈতে চুক্তি কৰে। বাইজুচৰ এই চুক্তি ২০২২ বৰ্ষলৈ থাকিব।
তিনিখনীয়া টি-২০ শৃংখলাৰ প্ৰথমখন মেচ আজি ধৰমশালাত আৰু বাকী দুখন মেচ ক্ৰমে ১৮ ছেপ্তেম্বৰত মোহালিত আৰু ২২ ছেপ্তেম্বৰত বাংগালুৰুত অনুষ্ঠিত হ’ব।
