এক শোকাৱহ মৃত্যুৰ সন্মুখীন হ’বলগীয়া হৈছে ইণ্ডোনেছিয়াৰ এগৰাকী জিম ট্ৰেইনাৰ। নিজ পেছাই মৃত্যুৰ কাৰণ হৈ পৰে যুৱ ফিটনেছ ট্ৰেইনাৰগৰাকীৰ। ওজন দঙাৰ সময়তে ওজন প্লেট গাত সৰি পৰাৰ ফলত মৰ্মান্তিকভাৱে দুৰ্ভগীয়া ট্ৰেইনাৰগৰাকীৰ মৃত্যু ঘটে।
নিহত ট্ৰেইনাৰগৰাকীৰ নাম হৈছে জাষ্টিন বিকি। প্ৰকাশিত খবৰ অনুসৰি, যোৱা ১৫ জুলাইত ইণ্ডোনেছিয়াৰ বালিৰ জিমত ৱৰ্কআউট কৰি থকাৰ সময়তে এই দুৰ্ঘটনা সংঘটিত হয়। কান্ধত বাৰবেল লৈ স্কুৱাটৰ চেষ্টা চলাওঁতেই এইদৰে মৃত্যুমুখত পৰে বিকি।
কান্ধত তুলি লোৱা ওজন ধৰি ৰাখিবলৈ বিকিৱে চেষ্টা কৰে যদিও বাৰবেলডাল তললৈ নামি অহাত বহি পৰে। ইফালে বিকিক এই সময়ত সহায় আগবঢ়োৱা স্পটাৰগৰাকীয়েও এই আকস্মিক ঘটনাত ভাৰসাম্য হেৰুৱাই পিছলৈ পৰে।
প্ৰকাশিত খবৰ অনুসৰি, জাষ্টিন বিকিয়ে দুৰ্ঘটনাৰ সময়ত ২১০ কিলোগ্ৰাম ওজন তুলিবলৈ চেষ্টা কৰিছিল।দুৰ্ঘটনাৰ পৰিণতিত তেওঁৰ ডিঙি ভাঙি যোৱাৰ লগতে হৃদযন্ত্ৰ আৰু হাওঁফাওঁৰ সৈতে সংযোগ হোৱা স্নায়ু সংকোচিত হৈ পৰে।
তাৎক্ষণিকভাৱে তেওঁক চিকিৎসালয়লৈ লৈ যোৱা হয়। অৱশ্যে জৰুৰীকালীন অপাৰেচনৰ কিছু সময়ৰ পিছতে তেওঁৰ মৃত্যু হোৱা বুলি সংবাদ মাধ্যমত প্ৰকাশ পাইছে।
