যোৱা ১৮ আগষ্টত চিকিৎসালয়খনৰ নৱজাতকৰ ইনটেনচিভ কেয়াৰ ইউনিট (এন আই চি ইউ)ত চাৰিদিনীয়া কেঁচুৱাৰ মৰ্মান্তিক মৃত্যুৰ পিছতে অসম চৰকাৰে গুৱাহাটী চিকিৎসা মহাবিদ্যালয় আৰু চিকিৎসালয়ৰ (জিএমচিএইচ) একাধিক কৰ্মচাৰীৰ বিৰুদ্ধে অনুশাসনমূলক ব্যৱস্থা গ্ৰহণ কৰিছে।
জ্যেষ্ঠ চিকিৎসক ডাঃ অনুপমা ডেকা আৰু ডাঃ দিপাংকৰ হাজৰিকা, ডাঃ পূজা, নাৰ্ছ ইনচাৰ্জ গোমতী দেৱী, আই চি ইউৰ টেকনিচিয়ান ঈশানজ্যোতি তালুকদাৰ, ষ্টাফ নাৰ্ছ চন্দনা নাথকে ধৰি ৭ গৰাকী কৰ্মচাৰীক ছমাহৰ বাবে নিলম্বন কৰা হৈছে।
তেওঁলোকে ঘটনাৰ তদন্তকাৰী দলটোক বিপথে পৰিচালিত কৰাৰ লগতে সঠিক তথ্যপাতি ৰখাত ব্যৰ্থ হোৱা বুলি জানিব পৰা গৈছে।
ইয়াৰ উপৰিও শিশু চিকিৎসা বিভাগৰ দুজন স্নাতকোত্তৰ প্ৰশিক্ষাৰ্থী ডাঃ হৃষিকেশ ঠাকুৰিয়া (দ্বিতীয় বৰ্ষ) আৰু ডাঃ পূজা (প্ৰথম বৰ্ষ)ক শ্ৰীমন্ত শংকৰদেৱ স্বাস্থ্য বিজ্ঞান বিশ্ববিদ্যালয়ে (এছ এছ ইউ এইচ এছ) তদন্তৰ প্ৰতিবেদনত গুৰুতৰ অসৎ আচৰণ, কৰ্তব্যত অৱহেলা, চিকিৎসালয়ৰ ৰেকৰ্ড হেৰফেৰ কৰাৰ চেষ্টাৰ উল্লেখ কৰি ছমাহৰ বাবে বহিষ্কাৰ কৰি ৰাখিছে।
সংক্ৰমণ আৰু জণ্ডিচৰ বাবে ভৰ্তি হোৱা নৱজাতকটো জন্মৰ মাত্ৰ চাৰিদিন পিছতেই চিকিৎসা সঁজুলিৰ তাঁৰত ওলমি থকা অৱস্থাত উদ্ধাৰ হয়।
চিকিৎসালয়খন পৰিদৰ্শন কৰা মুখ্যমন্ত্ৰী হিমন্ত বিশ্ব শৰ্মাই পূৰ্বে এই ঘটনাৰ গাফিলতিৰ কথা নিশ্চিত কৰি দায়ীসকলৰ বিৰুদ্ধে কঠোৰ ব্যৱস্থা গ্ৰহণ কৰাৰ আশ্বাস দিছিল।
