মাজনিশা চিকিৎসালয়ত সংঘটিত এক অগ্নিকাণ্ডত কমেও পাঁচজন লোকৰ মৃত্যু হৈছে। বাতৰি অনুসৰি নিহত সকলৰ ভিতৰত দুজন চিকিৎসকো আছে। শুকুৰবাৰে নিশা ৰাঁচীৰ পৰা প্ৰায় ১৭০ কিলোমিটাৰ দূৰত ধানবাদৰ বেংক মোৰ অঞ্চলৰ এখন ব্যক্তিগত চিকিৎসালয়ত সংঘটিত হয় এই ঘটনা।
সূত্ৰসমূহে জানিবলৈ দিয়া অনুসৰি, মৃতসকলৰ ভিতৰত আছে চিকিৎসালয়খনৰ মালিক তথা চিকিৎসক বিকাশ হাজৰা, তেওঁৰ পত্নী ডাঃ প্ৰেমা হাজৰা আৰু পৰিচাৰিকা তাৰা দেৱী।
ইয়াৰ উপৰিও, সোহান খানাৰী নামৰ আন এজন ব্যক্তিৰ মৃতদেহ চিনাক্ত কৰা হৈছে। সকলো মিলি চিকিৎসক দম্পতীসহ পাঁচজন লোকৰ মৃত্যু হৈছে।
বাতৰি অনুসৰি এটা পোহনীয়া কুকুৰো অগ্নিদগ্ধ হৈ মৃত্যুমুখত পৰিছে। অগ্নিকাণ্ডৰ ঘটনাটোত আন কেইবাজনো লোক আহত হৈছে। আৰক্ষীয়ে জনোৱা অনুসৰি, জুইলগাৰ পিছত শ্বাস-প্ৰশ্বাসৰ সমস্যাৰ বাবে এই মৃত্যুৰ ঘটনা ঘটিছে।
আৰক্ষীয়ে জনায় যে শুকুৰবাৰে নিশা চিকিৎসালয়খনত জুই লাগিছিল। ঝাৰখণ্ড আৰক্ষী আৰু অগ্নি নিৰ্বাপক বাহিনী ঘটনাস্থলীত উপস্থিত হৈ কেইবা ঘণ্টাৰ প্ৰচেষ্টাৰ পিছত জুই নিয়ন্ত্ৰণলৈ আনিবলৈ সক্ষম হয়।
