নাগালেণ্ডত নতুনকৈ পাঁচগৰাকী লোক কোভিড-১৯-ৰ দ্বাৰা আক্ৰান্ত হৈছে।
নতুনকৈ আক্ৰান্ত হোৱা এই পাঁচগৰাকী লোকক লৈ নাগালেণ্ডত কোভিড-১৯ আক্ৰান্ত লোকৰ সংখ্যা ৯ গৰাকীলৈ বৃদ্ধি পায়।
নাগালেণ্ডত কোভিড-১৯-ত আক্ৰান্ত আটাই কেইগৰাকী লোক অলপতে চেন্নাইৰ পৰা নিজ গৃহ ৰাজ্যলৈ উভতি আহিছিল।
নাগালেণ্ডৰ স্বাস্থ্য আৰু পৰিয়াল কল্যাণ মন্ত্ৰী এছ পাংগয়ু ফ’মে টুইটাৰ যোগে এই কথা প্ৰকাশ কৰে।
‘‘আপডেট- চেন্নাইৰ পৰা উভতি অহা আৰু পাঁচ গৰাকী লোকৰ শৰীৰত কোভিড-১৯ৰ উপস্থিতি আজি ৰাতিপুৱা ধৰা পৰে; ৪ গৰাকী ডিমাপুৰৰ আৰু এগৰাকী কোহিমাৰ। ইয়াকে লৈ নাগালেণ্ডত কোভিড-১৯ত আক্ৰান্তৰ সংখ্যা ৯ গৰাকীলৈ বৃদ্ধি পায়,’’ স্বাস্থ্য মন্ত্ৰী গৰাকীয়ে টুইট কৰে।
নাগালেণ্ডত কোভিড-১৯ আক্ৰান্ত লোক সকলক বৰ্তমান ডিমাপুৰ আৰু কহিমাৰ চিকিৎসালয়ত চিকিৎসা প্ৰদান কৰি থকা হৈছে।
নাগালেণ্ডৰ লগতে অসমৰ চুবুৰীয়া ৰাজ্য মেঘালয়তো মঙলবাৰে পাঁচগৰাকী লোকৰ শৰীৰত কোভিড-১৯ৰ উপস্থিতি ধৰে পৰে।
মুখ্য মন্ত্ৰী কনৰাড চাংমাই আটাইকেইগৰাকী কোভিড-১৯ আক্ৰান্ত বহিঃৰাজ্যৰ পৰা উভতি অহা বুলি জানিবলৈ দিয়ে।
