গোলাই চোৰ চিনেমাখনৰ নামটো ইতিমধ্যেই অসমত যথেষ্ট চৰ্চাত আছে। আগত ১৭ জানুৱাৰী,২০২৫ তাৰিখে মুক্তি লাভ কৰা এই ছবিখনৰ কাহিনীভাগ লিখিছে ৰক্তিম কমল বৰুৱাই। ছবিখনৰ পৰিচালনাও কৰিছে ৰক্তিম কমল বৰুৱাই। চিত্ৰনাট্য লিখিছে ৰক্তিম কমল বৰুৱা, মৃন্ময় শইকীয়া আৰু আকাশদ্বীপে।
ছবিৰ আৰম্ভণি হয় ১৯৮৩ চনৰ অসমৰ গ্ৰাম্য পৰিবেশত। ৰেডিঅ‘ত বিশ্বকাপ ক্ৰিকেটৰ ধাৰাভাস্য চলি থাকে। এজন ব্যক্তিয়ে বিয়া মাতিবলৈ আহি,গাঁৱৰে এঘৰত আশ্ৰয় লয়হি। ঘৰৰ গৰাকীক নিজৰ অলপ মুদ্ৰা আলমীৰাত থ’বলৈ দিয়ে ব্যক্তিজনে। পিছে মাজনিশা আহি পুলিচে সেই ঘৰত চোৰে আশ্ৰয় লৈছে বুলি চোৰকো ধৰে আৰু মুদ্ৰাখিনিৰ লগতে গৰাকীৰ ঘৰৰ বাকী সকলো সা-সম্পত্তি বাজেয়াপ্ত কৰে। লগতে কৈ থৈ যায় যে পুৱা থানালৈ আহি তাৰে পৰা তেওঁলোকৰ নিজৰ সম্পত্তিখিনি বাচি লৈ যায়হি যাতে। হতভম্ব হয় যদিও পুৱা ঘৰৰ গৰাকী থানালৈ গৈ উপস্থিত হয়। তাত হে তেওঁৰ মুৰত আকাশী সৰগ ভাগি পৰে।
কাহিনী এইবাৰ ফ্লেছবেকত ১৯৪৫ চনলৈ গতি কৰে। কদমণি গাঁৱৰ দিগা চোৰৰ কাহিনীৰে গাওঁ তেতিয়া ৰৌজাল-বৌজাল। পিছে দিগা চোৰক কোনেও দেখা নেপাই,ধৰা পেলাবও নোৱাৰে। সেয়ে মানুহৰ মাজৰ এজন হৈ দিগা চোৰ ঘূৰি ফুৰে। সেই ১৯৪৫ৰ দিগা চোৰ আৰু ১৯৮৩ ৰ দিগা চোৰ আৰু দিগা চোৰৰ লগত সংপৃক্ত কিছু চৰিত্ৰক লৈ ছবিখনৰ কাহিনীভাগ আগবাঢ়ে।
কাহিনীভাগ অগতানুগতিক তথা ভিন্ন। মৃদু-মধুৰ হাস্যৰসৰ উপস্থাপনো কৰা হৈছে। ১৯৮৩ ৰ দিগা চোৰৰ কাহিনীলৈ আগমন ঘটা আন আন চৰিত্ৰৰ মাজতে এক প্ৰধান চৰিত্ৰ গোলাপী(হিমাংশু গগৈ)ৰ ভূমিকা ছবিখনৰ এক শক্তিশালী অংশ। গোলাই চোৰত এক অতি সংবেদনশীল প্ৰেম কাহিনীৰো উপস্থাপন কৰা হৈছে। ছবিখনত কাহিনী কথনো চলে মাজে-সময়ে। প্ৰথমাৰ্দ্ধত কাহিনী কিছু মন্থৰ গতিত আগুৱাই,এনে লাগে যেন পৰৱৰ্তী অংশত কি হ’বলৈ গৈ আছে তাৰ প্ৰতি আগ্ৰহ নজন্মিবই!পিছে দ্বিতীয়াৰ্ধত কাহিনীভাগে ইয়াৰ গহন অন্তৰ্ভাগলৈ গতি কৰে। অধিক উপভোগ্য হৈ পৰে ছবিখনৰ দ্বিতীয়াৰ্ধ। ছবিখনৰ আৱহ-সংগীত সম্পূৰ্ণ পৰিস্থিতি সাপেক্ষ। প্ৰয়াস শৰ্মা তামূলীৰ আলোকশিল্পৰ কাম প্ৰশংসনীয়। সম্পাদনাৰ দিশ কিছু দুৰ্বল।
এতিয়া আহিছো ছবিখনৰ অভিনয়ৰ দিশলৈ। অভিনয় শিল্পীসকল সকলোৱেই নিজ নিজ চৰিত্ৰত স্বাভাৱিক। কিন্তু প্ৰধানতঃ গোলাপীৰ চৰিত্ৰত অভিনয় কৰা হিমাংশু গগৈ আৰু দিগা চোৰৰ ভূমিকাত অভিনয় কৰা টনী দেউৰী বসুমতাৰীৰ অনবদ্য অভিনয়ৰ কথা বিশেষভাৱে উল্লেখ কৰিবই লাগিব। হিমাংশু গগৈ নিজ চৰিত্ৰৰ লগত ইমানেই বেছি সংপৃক্ত হৈ পৰিছে যে তেওঁৰ অভিনয়ে ছবিখনক আন এক মাত্ৰা প্ৰদান কৰিছে। মুঠতে এক কথাত ক’বলৈ গ’লে গোলাই চোৰ চাই আপুনি নিৰাশ নহয়।
লেখিকাৰ মেইল – [email protected]
