সমগ্ৰ ৰাজ্য বানপানীৰ তলত থকাৰ সময়ত ৰাজ্যৰ জলমগ্ন ২৮ খন জিলাৰ লগতে ভাৰত আৰু বাংলাদেশ সীমান্তৱৰ্তী ধুবুৰী আৰু দক্ষিণ শালমাৰা-মানকাচাৰ জিলাতে বানপানীয়ে ক্ৰমাৎ ভয়াবহ ৰূপ ধাৰণ কৰিবলৈ আৰম্ভ কৰিছে।
সোমবাৰে ভাৰত-বাংলাদেশ সীমান্তৰ আলগাত বানপানীয়ে সীমান্তৰ কাঁইটীয়া তাঁৰৰ বেৰ উটুৱাই দিয়ে। সোমবাৰে বিয়লি অহা প্ৰবল বানপানীয়ে আলগা বি এছ এফ কেম্পৰ ওচৰতে থকা কাঁইটীয়া তাঁৰৰ প্ৰায় ১৫ মিটাৰ অংশ উটুৱাই লৈ যায়।
আনহাতে, সীমান্তৰ কাঁইটীয়া তাঁৰৰ বেৰৰ লগতে পহৰা দিয়া সীমান্ত পথটো বানপানীয়ে ভাঙি পেলোৱাত কৰ্তব্যৰত বি এছ এফৰ জোৱান সকল পহৰা দিয়াৰ ক্ষেত্ৰত যথেষ্ট অসুবিধাৰ সন্মুখিন হ’বলগীয়া হৈছে। বানপানীৰ সুবিধা লৈ যাতে যি কোনো ধৰণৰ অবৈধ চক্ৰই ভাৰতত প্ৰবেশ কৰিব নোৱাৰে তাৰবাবে সষ্টম হৈ আছে পহৰাদাৰী বি এছ এফৰ জোৱানসকল।
দক্ষিণ শালমাৰা জিলাৰ বৰ্তমান প্ৰায় ৯০ শতাংশ গাঁও বানপানীৰ কবলত পৰা বুলি খবৰ লাভ কৰা হৈছে। স্থানীয় বিধায়কৰ লগতে বি এছ এফৰ উচ্চ পৰ্যায়ৰ বিষয়ববীয়া সকলে জিলাখনৰ বানপৰিস্থিতিৰ লগতে সীমান্তৰ পৰিস্থিতিৰ বুজ লৈছে।
উল্লেখযোগ্য যে, ধুবুৰী আৰু দক্ষিণ শালমাৰা জিলাৰ ভাৰত-বাংলাদেশ সীমান্তৰ ৩০ কিলোমিটাৰৰো অধিক কাঁইটীয়া তাঁৰৰ বেৰ বৰ্তমান বানপানীৰ ফলত ক্ষতিগ্ৰস্ত হোৱাৰ আংশকা প্ৰকাশ কৰা হৈছে।
