ধেমাজি জিলাৰ আটাইতকৈ পূব প্ৰান্তৰ জোনাই মহকুমাত শুকুৰবাৰে বান পৰিস্থিতি অধিক শোচনীয় হৈ পৰিছে।
চিয়াং, লালি আৰু ব্ৰহ্মপুত্ৰৰ বানপানীয়ে মহকুমাটোৰ নতুন নতুন অঞ্চল বুৰাই পেলাইছে।
জোনাইৰ চক্ৰ বিষয়া চুমবৰ চুতীয়াই জনোৱা মতে চক্ৰটোৰ ২২৮খন গাঁৱৰ ৮০হাজাৰ লোক চলিত বানত ক্ষতিগ্ৰস্ত হৈছে। এই সংখ্যা কাইলৈলৈ অধিক বৃদ্ধি পাব পাৰে।
খবৰ মতে, বেৰাচাপৰি, বিজয়পুৰ, গালি, বৰং, ৰামধন আৰু মিছামৰাত নৈৰ কোবাল সোঁতে গাঁৱলীয়া পথ আৰু দলং উটুৱাই নিছে।
বাহিৰ-জোনাই অঞ্চলৰ বেৰা বেংগলিত নৈৰ মথাউৰি পানীত বুৰ গৈছে। মথাউৰিটোত আশ্ৰয় লৈ থকা প্ৰায় ১৩০গৰাকী লোকক এন ডি আৰ এফ আৰু এছ ডি আৰ এফৰ জোৱানে উদ্ধাৰ কৰিছে।
তাৰোপৰি ৫০০তকৈ অধিক পৰিয়ালে গালি মেচাকিত ওখ ঠাইত আশ্ৰয় লৈ আছে। লামাজানত আশ্ৰয় লৈ আছে ৩০টা পৰিয়ালে।
মহকুমা প্ৰশাসনে বিভিন্ন ঠাইত চাৰিটা আশ্ৰয় শিৱিৰ মুকলি কৰিছে আৰু ১০০টাতকৈ অধিক পৰিয়ালে ইয়াত আশ্ৰয় লৈছে।
জোনাইত উদ্ধাৰ অভিযানত ৰবৰৰ নাৱত এটা ১৭জনীয়া এন ডি আৰ এফ আৰু ১২জনীয়া এছ ডি আৰ এফ বাহিনীক নিয়োগ কৰা হৈছে।
ইয়াৰ উপৰি সাহায্য অভিযানৰ বাবে তিনিখন মেচিন নাও অধিগ্ৰহণ কৰিছে।
পৰিস্থিতিৰ ভয়াৱহতালৈ লক্ষ্য ৰাখি জিলা প্ৰশাসনে জোনাই মহকুমাত উদ্ধাৰ অভিযান চলোৱাৰ বাবে সেনাৰ সহায় বিচাৰি যোগাযোগ কৰিছে।
অঞ্চলটোৰ বতৰ অপৰিৱৰ্তিত হৈ আছে। চিয়াং আৰু ব্ৰহ্মপুত্ৰ নৈ অৰুণাচল প্ৰদেশৰ পাছিঘাট আৰু নামনিৰ চিচিবৰগাঁৱত বিপদসীমাৰ ওপৰেৰে বৈ আছে।
জিলা দুৰ্য্যোগ ব্যৱস্থাপনা কৰ্তৃপক্ষৰ তথ্য মতে ধেমাজি আৰু চিচিবৰগাওঁ ৰাজহ চক্ৰৰ বান পৰিস্থিতি স্থিৰ হৈ আছে। চক্ৰ দুটাত ১২৪খন গাঁৱৰ ৫২হাজাৰ লোক বানত ক্ষতিগ্ৰস্ত হৈছে।
চলিত তৃতীয়টো বানত এতিয়ালৈকে জিলাখনৰ ১.৩ লাখতকৈয়ো অধিক লোক ক্ষতিগ্ৰস্ত হৈছে।
