ভাৰতত সুদীৰ্ঘ ১০৬ দিনৰ অন্তত প্ৰথমবাৰৰ সক্ৰিয় কোভিড ৰোগীৰ সংখ্যা পাঁচ লাখৰ তললৈ আহিছে।
কেন্দ্ৰীয় স্বাস্থ্য আৰু পৰিয়াল কল্যাণ বিভাগে প্ৰকাশ কৰা তথ্য অনুসৰি বৰ্তমান সময়ত দেশত মুঠ ৪,৯৪,৬৫৭ গৰাকী সক্ৰিয় কোভিড ৰোগী আছে।
আনহাতে, ভাৰতত ক’ৰ’না ভাইৰাছৰ দ্বাৰা সংক্ৰমিত হোৱা মুঠ লোকৰ সংখ্যাও ৮৬,৩৬,০১১ গৰাকীলৈ বৃদ্ধি পাইছে।
মঙলবাৰৰ দিনটোত দেশত নতুনকৈ ৪৪,২৮১ গৰাকী লোক কোভিড প’জিটিভ হয়।
ভাৰতত ক’ৰ’নাৰ সংক্ৰমণৰ ফলত এতিয়ালৈ ১,২৭,৫৭১ গৰাকী লোকৰ মৃত্যু হৈছে আৰু চিকিৎসাৰ অন্তত ৮০,১৩,৭৮৩ গৰাকী লোক ক’ৰ’নাৰ সংক্ৰমণৰ পৰা পুনৰ সুস্থ হৈ উঠিছে।
ভাৰতত ক’ৰ’নাৰ সংক্ৰমণ পূৰ্বতকৈ কিছু পৰিমাণে হ্ৰাস পালেও দিল্লীত পুনৰ ক’ৰ’নাৰ নতুনকৈ সংক্ৰমণ আৰম্ভ হৈছে।
দিল্লীৰ স্বাস্থ্য মন্ত্ৰীয়ে দিল্লীত ক’ৰ’নাৰ তৃতীয় পৰ্যায়ৰ সংক্ৰমণ আৰম্ভ হোৱা বুলি মত প্ৰকাশ কৰে।
উল্লেখযোগ্য যে, আমেৰিকা যুক্তৰাষ্ট্ৰত বৰ্তমানলৈ সমগ্ৰ বিশ্বৰ ভিতৰত সৰ্বাধিক সংখ্যক লোক ক’ৰ’না ভাইৰাছৰ দ্বাৰা সংক্ৰমিত হৈছে। আমেৰিকা যুক্তৰাষ্ট্ৰত কোভিড আক্ৰান্ত লোকৰ সংখ্যাই এক কোটি অতিক্ৰম কৰিছে।
