কাজিৰঙা ৰাষ্ট্ৰীয় উদ্যান কৰ্তৃপক্ষই বিভিন্ন সংগঠনৰ সহযোগত প্ৰথমবাৰৰ বাবে আয়োজন কৰা জলচৰ পক্ষীৰ গণনাত গণনাকাৰী সকলে নিৰ্দিষ্ট সময়ৰ ভিতৰতে জলচৰ পক্ষীৰ ৮০ টা প্ৰজাতিৰ ১০,৪১২ টা পক্ষী জলাহ ভূমিত প্ৰত্যক্ষ কৰে।
২০ ডিচেম্বৰৰ পুৱাৰ পৰা কৰা এই গণনাত কাজিৰঙা ৰাষ্ট্ৰীয় উদ্যানৰ কহঁৰা, অগৰাতলি আৰু বাগৰি বনাঞ্চলৰ ৮ খন জলাহভূমিত সম্পন্ন হৈছিল এই গণনা আৰু এই গণনাত গণনাকাৰী সকলে ভালেমান বিৰল প্ৰজাতিৰ পক্ষীৰ তথ্য সংগ্ৰহ কৰে।
কাজিৰঙা ৰাষ্ট্ৰীয় উদ্যানৰ এই জলচৰ পক্ষী গণনাত অসমৰ লগতে ৰাষ্ট্ৰীয় পৰ্যায়ৰ ১৯ গৰাকী প্ৰতিষ্ঠিত পক্ষী বিশেষজ্ঞ, পক্ষী গৱেষক , পক্ষী নিৰীক্ষক আৰু ফটোগ্ৰাফাৰে অংশ গ্ৰহণ কৰিছিল। এওঁলোকক গণনা কাৰ্যত সহযোগ কৰিছিল স্থানীয় মহাবিদ্যালয় সমূহৰ পৰা অহা ৪৮ গৰাকী স্বেচ্ছাসেৱক আৰু ৩৮ গৰাকী বনকৰ্মীয়ে।
পক্ষী গণনাৰ সমগ্ৰ ব্যৱস্থাটো নিৰীক্ষণ কৰিছিল ১০ পৰ্যবেক্ষকে। নিৰ্বাচিত স্থানত অৱস্থান কৰি নিৰ্ধাৰিত ক্ষেত্ৰত দূৰবীন, ৰেঞ্জ ফাইণ্ডাৰ, জি পি এছ, টেলিস্কোপ আদি ব্যৱহাৰ কৰি তেওঁলোকে পক্ষী গণনা কৰিছিল বুলি ৰাষ্ট্ৰীয় উদ্যানখনৰ ডি এফ অ’ ৰোহিণী বল্লভ শইকীয়াই জনাইছে।
পৰৱৰ্তী সময়ত ৰাষ্ট্ৰীয় উদ্যানখনৰ সমূহ জলাহ ভূমিক সামৰি বহল ভিত্তিত সম্পূৰ্ণ বৈজ্ঞানিক পদ্ধতিৰে এনে গণনা কৰাৰ ব্যৱস্থা কৰাৰ বাবে উদ্যান কৰ্তৃপক্ষই সিধান্ত গ্ৰহণ কৰা বুলিও জানিব পৰা গৈছে।
